ڕاهێنەر و مایتێكرن د پلانێن ویدا
ئیحسان حەسەن
ئەز دبێژم هوون ژی دگەل ڤێ بوچوونێ نە، كو پیڤەرێ هەلسەنگاندنا یاریزانان لدەڤ هەر راهێنەرەكی یێ جودایە ژ پشتگیری و حەژێكرنا پشتەڤانان بۆ وی، هەر ئەڤ جوداهی یە یا كو راهێنەرەكێ بسپۆر دگەل پشتەڤانەكێ كو پێزانین لسەر زانستێن راهێنانێ نەبەن جودا دكەت، ژبەر كو هەر راهێنەرەكێ خودان ئەزمون، رێ نادەت كەس مایی خوە دكارێ وی دا بكەت، هەر چەندە جوداهییەكا مەزن یا هەی دناڤبەرا دان و ستاندنێ دگەل راهێنەری، یان گڤاشتن لسەر و مایتێكرن ب دانانا هندەك ناڤێن دەستنیشانكری ژ یاریكەران دناڤا لیستەیا سەرەكی دا، یان ژی دەستبەردانا هندەكێن دی ژبۆ رازیكرنا جەماوەرێ تیمێ، یان ژی ئینانا خوارا تۆرەبوونا وان، ژبەر كو ئەوا ئەم دبینین ومە گولێ دبیت، گەلەك جاران دێ بینی كو پشتی یاریێ ب تایبەت ئەگەر تیما وان ڤیان لسەر هەی هاتبیتە دۆراندن، یان ژی ئەنجام ب دلێ وان نەبیت، دێ بوچوونێن خوە بۆ دەزگەهێن راگەهاندنێ دیاركەن، دێ گلەیی ل راهێنەری كەن، كا بۆچی ئەڤ یاریزانە ئیناخوار و ئەڤێ دی نەئینا خوار، بۆ چی ناڤێ وی نەكرە د پێكهاتییێ سەرەكی دا، بۆ چی دەلیڤەنەدایێ یاریێ بكەت، هەتا هندەك ژ كارگێریێن یانەیان و تیمان ژی مایێ خوە د كاروبار و هەلبژارتنێن راهێنەری دا دكەن، دگەل رێزێن مە بۆ وان هەموو بوچوونان، كو بێ نەڤێت دكەڤنە دخانەیا دل پێڤەمانێ و حەژێكرنێ وان بۆ تیمێن خوە، ئەز دبێژم هەر راهێنەرەك ئەگەر بڤێت ب سەركەڤیت دكارێ خوەدا، پێدڤییە لسەر دان و ستاندن و گەنگەشێ تنێ دگەل وان كەسان بكەت، دیسان بۆچوونێن وان وەربگریت، یێن وەكو وی بسپۆری هەبیت، یان ژی یاریزانەكێ دێرین یێ خودان ئەزمون ودیتنا تەكنیكی بیت، ژبەر كو ئەز هووسا دبینم كو ئێك ژ زیانێن هەرە مەزن یێن كو ب وەرزشا مە كەڤتی ئەوە، مایتێكرنا بەرپرسێن یانەیان و تیمێن مە یە د كاروبارێن راهێنەران دا، ژبەر گڤاشتنێن جەماوەری لسەر وان، بێ نەڤێت ئەڤ ڕەفتارە ژی لسەر حسێبا كەسایەتییا راهێنەری یە، ئەگەر ئەو نەشیایە بەرەگیرییێ ژ بۆچونێن خوە یێن تەكنیكی بكەت و مافێ خوە پارێزیت، ئێدی نە شێت ببیتە خودان بریارا خوە، پاشی هەبوون و نەبوونا وی دێ ئێك بیت، لدووماهییێ یا من دڤێت بێژم، ڕاهێنەرێ هەر یارییەكێ مرۆڤە، یێ زیرەك و خودان هەیبەت ئەوە یێ كو باوەری ب بۆچوون وكار و پلانێن خوە یێن تەكنیكی هەبیت، گوهێ خوە نەدەتە هەلویستێن جەماوەری و كارگێرێن یانەیان، كا چەند دگەلن و چەند دژی وی نە، یا گرنگ لدەڤ وی ئەوە بیت، بشێت ئستراتیجیەتا خوە وزانینا خوە یا راهێنانێ بكەتە دخزمەتا تیما خوەدا و پلان بەرنامەیێ خوە بجهبینیت، ژبەر كو هەر گەنگەشەك و مایتكرنەكا شاش یا گرێدای كارێ وی ئەنجامێن خراب هەبووینە، هەر ئەڤە بوویە ئەگەرێ هندێ كو زۆربەی راهێنەران نەشیایە چەند وەرزەكان دگەل تیمێن مە بمینن، هەر زوو بریار داینە دەست ژ كارێ خوە بكێشن.
