ڕاهێنەر و یاریزانێن هەردو تیمان: مە ئەو یاری ژبیركریە و ڕژدین ڤەگەڕینە سەركەفتنان
قەیس وەیس:
هەردو نوونەرێن بەهدینان تیما یانەیا دهۆك و یانەیا زاخۆ نە شیان سەركەفتنێ ل سەر هەڤڕكێن خوە یێن گەڕا شەشێ ژ خولا ستێرێن ئیراقێ دا ب دەستڤە بینن پشتی تووشی خوسارەتیێ بووین، د یاریێن واندا ئەوا ل شەمبیا بۆری ل هەردو یاریگەهێن دهۆك و كۆت هاتینە كرن.
تیما یانەیا دهۆك بەردەوامی دا ئەنجامێن خوە یێن خراب و نەشیا ڤێ جارێ ژی جەماوەرێ خوە ئاشتبكەت پشتی دگەل مێڤانا خوە یانەیا كەرخ تووشی خوسارەتیەكا نە چاڤەڕێ كری بوو ب سێ گۆلان بەرانبەر گۆلەكێ، هەرچەندە گۆلا دەستپێكێ تیما دهۆكێ د خولەكا 14ێ دا ئینابوو ژلایێ یاریزانێ هێلا بەرەڤانیێ بەیار ئەبۆبەكر، لێ د خولەكێن 74، 78 و 84ێ دا تیما مێڤان شیان سۆپرایزەكا دل ئێش بۆ جەماوەرێ دهۆكێ چێكەن و سێ گۆلان ل دووڤ ئێك تۆماربكەن و یاری بەر ب سەركەفتنەكا مەزن ببنەن.
ل دۆر ڤێ یاریێ یێ ئەندرێس كارسیا هاریكارێ راهێنەرێ دهۆكێ گۆت: د نیڤا ئێكێ دا ئەم گەلەك باشتر بووین و كۆمەكا دەلیڤان ژ دەستدان، لێ د نیڤا دویێ دا یاریزانێن مە ڤالاتی هێلانە د ناڤا یاریگەهێ دا تایبەت هێلا بەرەڤانیێ كو بۆ ئەگەر دەلیڤەكا باش ژلایێ هێرشبەرێن كەرخێ بهێتە وەرگرتن، هەرچەندە پشت گەرمییا مە ب هێرشێن هەڤدژ و چێكرنا پاسێن مەترسی، ب ئۆمێدین بۆ یارییا بهێت دێ قەرەبووكەین.
ژلایێ خوەڤە ل یاریگەها كوت تیما یانەیا زاخۆ بەرانبەر یانەیا جەوییە ب لێدانا پەنەلتیەكێ تووشی خوسارەتیێ بوو ئەوا یارییا وان ب گۆلەكێ بێ بەرانبەر ب دووماهی هاتی كو دبیتە ئێكەم خوسارەتی پشتی بۆرینا شەش یارییان ب دو سەركەفتن و سێ وەكهەڤی هەنە،.
ل دۆر ڤێ یاریێ عەلی كازم گۆلپارێزێ یانەیا زاخۆ گۆت: هەرچەندە مە سێ خال ژ دەستدان لێ وەكو ئاست تیما مە باشترە و نە ژ هەژی خوسارەتیێ بووین، هەرچەوابیت مە ئەڤ یارییە ژبیركر ژبەركو یارییەكا دی یا گرنگ بەرانبەری مەیە ئەوژی دگەل هەولێرێ، ل دووڤ خشتەیێ یارییان ب شێوەیێ زانستی كارتیكرنێ ل سەر ئاست و جەستەیی یاریزانان دكەت گڤاشتنەكا بەردەوام ل سەر ئاستێ یاریزانان هەیە.
فدراسیۆنا فوتبۆلا ئیراقێ ڕاگەهاند ژ بەرپشكدارییا دەرڤە دێ دو یاری ژ هەڤڕكیێن گەڕا حەفتێ هێنە پاشئێخستن، یا ئێكێ یارییا دهۆك بەرانبەر یانەیا شورتە، دهۆك دێ ل چارشەمبییا بهێت پشكداری كۆپا كەنداڤی بیت بەرانبەر زەفار یا عومانی ل پایتەختێ عومان، ئەڤرۆ شورتە دێ بیتە مێڤانا یانەیا ئەهلی یا سعۆدیێ ژ كۆپا ئاسیا یا پیشەكاران، یارییا جەوییە و نەفت میسان ژی هاتە پاشئێخستن ژبەر پشكدارییا جەوییە د چامپیۆنزا ئاسیا دو دا ئەوا ل چارشەمبییا بهێت بیتە مێڤانا ئەلخالدییە یا بەحرەینی، یانەیا زاخۆ ل پێنج شەمبییا بهێت د كلاسیكۆیا كوردستانی دێ مێڤاندارییا یانەیا هەولێر كەت.
