ڕاگرتنا خولا کوردستانێ دناڤبەرا مفا و زیانێ دا
ئەڤرۆ،
دەرئەنجامێ تۆندوتیژیا جەماوەرێ وەرزشی دژی دادڤانێن یاریێن خولا کوردستانێ ئەوا ل حەفتیا بوری ل چەند باژێرێن ھەرێمێ روودایی کو بۆ ئەگەر دادڤانێن خولێ بایکۆتێ رابگەھینن، سەرباری سزادانا تێکدەران ژلایێ ئێکەتیا تەپاپیێ یا کوردستانێ ھەروەسا بڕیارا راگرتنا یاریێن گەڕا دوێ ژ خولێن پلا نایاب و دەستپیچکا قۆناغا دوێ یا پلا ئێک دا و دەست ب کۆمبوونا ل گەل نوونەرێن ھەموو یانێن پشکدار کربوو پێخەمەت ئەگەرێن ڤان روودانا و رێکێن چارەسەریێ و وەرگرتنا سۆزناما و زێدەتر ھەڤکاریێ، یانێن پارێزگەھێ زاخۆ، دھۆک، گارە و ئاکرێ زەرەرمەندن لسەر بڕیارا ھاتیەدان و داخوازا دوبارە ڤەگەڕاندنا خولێ کرینە و ئەوێن بۆچوونێن خوە بۆ رۆژناما ئەڤرۆ بڤی رەنگی دیاردکەن.
زێرەڤان سەعدوللا ھاریکارێ راھێنەرێ دھۆکێ گوت: ھەرچەندە راوەستیانا خولێ زەرەرێن خوە دێ ھەبن ژوانا دوورکەفتن ژ ھەڤڕکیان لێ وەکو یانا دھۆک تا رادەیەکێ باش د بەرژەوەندیا مە دایە ژبەرکو د ماوێ ھەشت رۆژان دا تیما مە سێ یاریێن خولا عیراقێ و کوردستانێ ئەنجامدان و گڤاشتنەکا نەرێنی لسەر ئاستێ یاریزانێن مە کربوو، ئەڤچا بۆ ڤێ راوەستیانێ دێ بزاڤێ کەین بشێوەکێ باش مفایی ژێ وەربگرین پێخەمەت باشترین بەرھەڤی بۆ ھەردو خولان.
ژلایێ خوەڤە محەمەد یوسف راھێنەرێ زاخۆ ڕاگرتنا خولێ ب دەمەکێ نە گۆنجایی ھژمارت و گوت: نا بینم بڕیارەکا د جھێ خوە دایە دڤیابا ھندەک پێنگاڤێن دی ھاتبانە ھاڤێتن نەک ڕاگرتنا خولێ، ژبەرکو زیانێن وێ زێدەترن ژ باشیێن وێ، تیما مە بەرھەڤیێن باش ھەنە و بەردەوام یا ھەڤڕکیێ دکەت، ئەڤ راوەستیانە دێ کارتیکرنا نەرێنی ھەبیت لەورا دەم یێ گۆنجایی نەبوو.
وەلات عەبدولخالق ھاریکارێ راھێنەرێ گارە گوت: ئەم نە ل گەل بڕیارا ئێکەتیا تەپاپیێ بوون ژبەرکو دێ کارتیکرنێ لسەر بەرنامێ مە یێ راھێنانان و زاخا یاریزانا کەت، ھەروەسا دێ گڤاشتنێن دارایی ژی ل سەر یانێ زێدەکەت، ھەبوونا ڤان جورە بڕیارا دڤیابا ل گەل نوونەرێن یانێن پشکدار گەنگەشە کربا یان ژی ل رێکێن چارەسەریێ گەڕیابان بۆ تۆندۆتیژیا پەیدابووی بەری چو بڕیار بھێنە دەرکرن، ھەرچەوابیت دێ لدیڤ نەخشەکێ تایبەت راھێنانێن خوە ئەنجامبدەین پێخەمەت کارتیکرن لسەر ئاست و شیانێن یاریزانان نەبیت.
ژلایێ خوەڤە عامر سوسنا کاپتنێ تیما یانا ئاکرێ گوت: بڕیارا وان بەروڤاژی دێ کارتیکرنا چەستەیی و ھونەری لسەر ئاستێ یاریزانان ھەبیت تایبەت ئەگەر ڕاگرتنا خولێ زێدەتری حەفتیەکا دی ڤەکێشیت، یانا ئاکرێ دووماھی یاری سەرکەفتنەکا گرنگ تۆمارکربوو و ھێز و زاخا یاریزانان بلندکریە و من د باوەرێ دابووین بوو یاریا ڤێ حەفتیێ ژی بەردەوامیێ دەینە سەرکەفتنان، دبیت بڕیارەکا نەچاری بیت ژبۆ دۆڤچوون و چارەسەریا ئاریشێن روودانا لەورا ئەم ژی نەچارین بەرنامێ خوە ب گوھۆرین و چاڤەڕێ بڕیارەکا نوو بن ژبۆ شێوازێ نوو یێ نەخشێ راھێنانێ، دیسا دێ بزاڤێ کەین ڤێ حەفتیێ یاریەکا ھەڤالینی بکەین ژبۆ پرکرنا ڤالاتیا خولێ.
