ڕاگەهاندنا ئازاد و پەیدابوونا ئاریشەیان
لەزگین گراڤی/ زاخۆ
ئەڤڕۆ مایتێكرن د پتریا كار و كریارێن جڤاكێ دا یا بوویە دیاردەكا گشتی و بەربەلاڤ د تۆڕێن ڕاگەهاندنا جڤاكێ ود پتریا بەرپەر و گۆتارێن گۆتاربێژان و دەنگۆیێن بێژەران كەسانێن د ڕاگەهاندنێ دا كاردكن، بێی مەرج و سنوورەك و هێلەكا سۆڕ، هەر ژ لایەن و كەنالێن فەرمی و سیاسی، هەروەسا ژ كەسانێن جۆراو جۆر كو گرێداینە ب هندەك لایەنێن سیاسیێن مەرەمدار و ب درووشمێ ناڤێ ئازادانە و بێ لایەنی كارێ ڕاگەهاندنێ دكەن، هەروەسا ب سەدان دەزگەه و ڕادیۆ و تلفاز و گۆڤارێن ئەلیكترۆنی و.. هتد. ل كوردستانێ ب زمانێ كوردی ب ڤی كارێ ڕاگەهاندنا ئازاد و سەربەخۆ ڕادبن، بەلكو ب ناكۆكی و‌نە دروستی و جڤاكێ دهنگێڤن.
هەر وەك دیار گەلەك ژ ڤان دەنگۆیێن ئەم دبهیسین دیاردەكا سروشتییە و د جهێ ڕازەمەندیا ڕێژەكا كەس و جینێن جڤاكی یە، هەروەسا هندەك ژ ڤان دەنگۆیان و ڤان مایتێكرنا چەوت و مەرەمدارن ژبۆ ئازراندنا هەست و بیروباوەرێن خەلكەكێ دی كو دبیت ئەگەرێ دوبەرەكیێ و تێكدان و تێكڤەدانا تەخ و جینێن پێكهاتێن جڤاكی، هەلبەت ئەنجامێن وێ مەترسیدارن. پێدڤی ئەوە ئەڤ بابەتێن دهێنە بەلاڤكرن د سەر پیڤەرێن یاسایی و زانستی بن و ئەڤ بابەتە دووربن ژ ئازراندنا هەمی تەخ وجین و لایەنێن د جڤاكی و ولاتی دا دژین و تایبەت ئۆل و مەزهەبان هەتا دگەهیت باژێڕ و توخم و بنەمالان و..هتد.
ل ڤێرێ ڕاگەهاندكار ب گشتی دڤیا دویڤچوونێ د بابەتی خوەدا بكەن ب بەلگە و دیدەڤان، هەروەسا پرس ژ كەسانێن بسپۆڕ و زانا و تایبەتمەندی و لێقەومایان هەتا دگەهیت ئەنجامێن ڕاستەقینە و دروست و دویر ژ مەرەم و ئارمانجێن تێكدانێ و دوبەرەكیێ و هلوەشاندنا مافێ بەشەك ژجینێن جڤاكێ.
ئەڤەنە ئەركێ ڕاگەهاندنا جوان و پیڕۆز ڕاستەقینەیە، ئەڤ پێدڤیێن ڕاگەهاندنێ د سەر ملێ كەسانێن پاك و پاكژن، ئەڤجا چ پەیام و دەنگۆباس بن ب شێوەكی بێ كێم و كاسی بهێنە بەلاڤكرن، ئەم دبینین ئەڤڕۆ گەلەك فەرە ووتاربێژێن ئۆل و ئایینان ب گشتی ل سەر مەنبەران و ل كەنیشتان و ل هەمی پەرێسگەهان ڕۆلێ خوە یێ پیڕۆز ببینن و بۆ خەلكێ دیاركن كو پتریا ڕاگەهاندنا ئەڤڕۆ ژ ڕەنگەك مەترسیدارە بێ بنیاتە و داكو ژێ ئاگەهداربن و نەهێنە خاپاندن. جار دی ئەڤ ئاریشە و ناكۆكی یە د سۆشیال میدیان دا و د تۆڕێن چڤاكیێن ئەڤڕۆ دا بەربەلاڤ بوویە ژبێ چاڤدێرییەكا بەردەوام.
ئەڤ ڕاگەهاندنا ئەڤرۆ بەربەلاڤ ژ كار و ئەركێ كەسانێن ڕۆناكبیر و شۆلەژێنە وەك تایبەتمەند و ئەكادمی بن د كارێ خوەدا خوە لێ بكەن خوەدان، ژبۆ پاراستنا باوەریا تەڤایا خەلكێ مە دەمێ دەنگۆیان دبهیسن، بلا ژبیر نەكەین ل ڤێرێ ڕۆلێ سەنتەر و دام و دەزگەهێن مینا لەقێن ڕۆژنامەڤانان ڕۆناكبیران و هونەرمەندان دیار دبیت د خۆلێن فێربوونێ و فێركرنا چالاكڤان و پەیامنێران و ڕاگەهاندكاران…هتد. ب ڕەنگەك ئەكادیمی ژ هەمی ئالیان ڤە وەك زمان و گۆتن و لڤین جاردن پ بەلگە و بینەرێن دیدەڤان ل دەمێ ڕویدان و بوویەران د و تەڤ كار و چالاكیێن ڕاگەهاندنێ دا.
