ڕاگەهاندن پرەکە بۆ گەهاندنا دەستێ هاریکاریێ
بێوار حەمدی:
زانایەکێ ئایینێ ئیسلامێ دیار کر کو د ئیسلامێ دا کارێن خێرخوازی ژ کارێن گەلەک پڕ بها و سەنگینن، چالاکڤانەکێ ژی گۆت: دلوڤانیا ژنێ بنەمایێ کارێن خێرخوازییە، ڕاگەهاندکارەکێ ژی دیار کر، بکارئینانا شاشەیێن تیڤیان هەلبژارتنەکا دروست و باشە.
زانایێ ئایینێ ئیسلامێ مەلا توفان خۆرشید، د دیدارەکێ دا بۆ ڕۆژنامەیا ئەڤرۆ دیار کر کو د ئیسلامێ دا کارێن خێرخوازی ژ کارێن گەلەک ب قەدر و قیمەتن و دبنە ئەگەرێ زێدەکرنا مالێ مرۆڤی و مرۆڤی ژ هەمی نەخۆشی و موسیبەتان دپارێزیت.
مەلا توفان گۆتژی: “ب تایبەتی د هەیڤا ڕەمەزانا پیرۆزدا هەر کەسێ خێرێ دگەل هەژارەکی بکەت یان خوارنەکێ بدەتێ دێ خێرا ڕۆژیا وی ژی گەهیتە وی”.
عەبدوللا مەلا حەیدەر، راگەهاندکارە سەبارەت بابەتی دیار کر کو بو ماوێ دوو سالایە ئەو بەرنامەیێن خێرخوازی ل کەنالێ ئەی تیڤی پێشکێش دکەت و گۆت: “من ئەڤ بەرنامەیە هەلبژارتن و حەز دکەم خزمەتا چینا هەژاران بکەم”.
عەبدوللا د بەردەوامیا ئاخفتنێن خودا گۆت:” بکارئینانا شاشەیێن تیڤییان هەلبژارتنەکا دروست و باشە کو ئەڤ خزمەتە تێدا بهێتە پەخشکرن و تشتێ ژ ڤی کاری ئەز فێربویم ئەوە کو ب دلەکێ خوش و وژدانەکا ئارام سەرێ خوە دانمە سەر بالیفکێ”.
شرین بەرواری چالاکڤانە و ڕێکخراوا کارێن خێرخوازی هەیە و گۆت: “گەلەک ژ مێژەیە ئەز کارێن خێرخوازی ئەنجام ددەم، هەر د کەڤندا ژنێ کارێن پیرۆز و خێرخوازی ئەنجامداینە و لدویڤ شیانێن خو خزمەت کریە، ژبەرکو دلوڤانیا ژنێ بنەمایێ کارێن خێرخوازییە ژنێ دلۆڤانیەکا بێ سنور هەیە”.
