ڕزگاربوون ژ زیندانێ
رەمەزان زەكەریا
ئەو ئێڤاریا تو بەرزە بووی، دەنگێ لێدانێن دلێ تە مینا لێدانا زەنگا كەنیسێ ناهێت گوهێ من، لڤینا لێڤێن تە وەك لێدانا دو پێلێن ڕوباری ناهێن دیتن، دەنگێ خڕخالێن تە یێن وەك برویسیا یێن بەرزەبووی، باغەڤان ژی ناچیت سەخبێریا گولان بكەت و جۆتیاران ژی دەست ژ چاندنێ بەردا، داپیرێ تەشیكێ خۆ دانا، زارۆك یارییا ب بووكێن لاسیتك و تەقنێ ناكەن، كچێن گەڕەكێ ژی وەك جاران ناچنە سەر كانیكا پشتا گوندی.
هەموو یێن د ئاشۆپەكێ دا دژین و كەس نزانیت هۆكارێ بێدەنگیا گوندی چیە.. هەموو یێن دپرسن ئەڤ چ وەرزێ سالێیە؟ بۆچی كەس كارەكێ ناكەت؟ بۆچی هەموو بالندێن رۆژانە دهاتنە سەر سڤاندێن خانی ل ئەسمانا ناهێن خوار؟ بۆچی ماسی حەز ژ هشكاتیێ دكەن؟ بۆچی باران ل دەمێ خۆ نابارن و بەفر رێكا ناگریت؟
هێشتا تە نەزانیە هەموو ژبەر بەرزەبۆنا تە یێن دناڤ خۆ دا بەرزەبووین، ئەڤ گوندە بێی تە وەك زیندانێ یێ لێهاتی، گەلەك بلەزم لێدەركەڤم، ئەگەر ئاستەنگ و رێگری چیا بن، ئەگەر دەریا و ڕوبار بن، ئەگەر چوونەكا بێ زڤرین بیت.. هەموو یێن بەرهەڤییا دكەن بچن بۆ دیتنا تە دگەڕن، تو زانی ب رەنگەكێ من بەحسێ تەكریە نوكە هەموو وەك من یێن ژتە غەریب بووین.
هەموو گوندیا خۆ كریە ئاسنگەر و پەنجەرێن زێندانێ شكاندن.. هەموو بزاڤ بۆ شكاندنا دیوارێن غەریبیێنە، هەموو یێ بزاڤا رزگاربوونێ دكەن، بۆ وێ چەندێ ژ دیتنەكا گوندی دووركەڤن و بەرەڤ جیهانەكا نەدیار بچن بۆ دیتنا تە، دوور ژ هەر مرۆڤەكێ و چوونەك بێ ئاڤری ڤەدان و زڤرین، باوەریا خۆ ب قەدەرێ بینیت كو هەر ئەو یاریێن مە ل زارۆكینێ دكرن و خۆ لێك ڤەدشارت وەسا ژیانێ تو ل من ڤەشارتی و بۆ خۆ بری.
گەر ب زڤرمە دەمێ چوونا تە، ل بیرا منە، وێ ئێڤاریێ هەموو جۆتیاران زەڤیێن خۆ هێلانە ب نیڤەروو، ژ كۆلانێ و شڤانا زووتر هەموو رۆژێ بەرێ پەزێ خۆ دا گوندی و هێش ئێڤار بوو بەرێ رۆژێ سۆر بوو، بێدەنگییەك ب هەمووان ڤە دیاربوو، هەمووان دگۆت: سوباهی دێ بەفر باریت، دونیا یا بێدەنگ بووی بەلێ كەسێ نەزانی لێدانێن دلێ تە و لڤینا پرچا تە نەمایە وەك بەرێ، خۆشی دگەل خۆ برینە و نە رۆندكێن من زوها دبن و نە هەدارا من دهێت.
هێشتا ژ بەرزەبوونا تە بێ هیڤیی نەبوومە، د كوراتییا خەوێ دا دەمێ دەنگەك وەكی چپكێن بارانێ دهێت ب ئاسمانێ خانی دكەڤیت، بۆ دیتنا تە بلەز چاڤێن خۆ ڤە دكەم، هەر دیار نینی و یا بەرزەیی، ئەو پیرەمێرێن رۆژانە ل بەر هەتاڤێ رادوەستان لفكا جەمەدانا خۆ ل سەر چاڤێن خۆ راكرینە و چاڤێ وان ل دیتنا تەیە، نە زستان هات و نە بهار وەرزێن سالێ راوەستاینە.. ما تە نییەت نینە وەك هەیڤێ دەركەڤیە ڤە و رۆناهییا ستێرا بەرزە بكەی، گولێن هشك بووی گەش بكەیەڤە و داڤێن سپی زێدەتر نەكەی ل سەر و ڕهێن مندا دیوارێن بەرزەبوونێ بشكێنی.. ژیانێ ئاڤا بكەیەڤە و من ژ زیندانێ رزگاربكەی.
