ڕزگاربوویەکا دەستێ داعش: دەمێ رۆژ بەر ئاڤابوونی دچوو، لاشێ من د لەرزی
ئەڤرۆ نیوز:
(م، ن) کچەکا 17 سالیە پشتی ھانەسەیەکا کوور ھەلکێشای گۆت: دەمێ رۆژ بەر ئاڤابوونێ دچوو لەرزینێ ھەموو لەشێ من دگرت ژ ترسا ئەز ھشک دبووم ، خوارن و ڤەخۆارن و ھەموو تشت ژ ترسا دا و ژبەر بێ بەخت و بێ ووژدانا ژبیرا مە دچوون پورا تیرۆرستان یا گژاڤژ رووح ژ جانێ مە دئێنا دەر، چونکی مە نەدزانی دێ داعش چل مە کەن.
(م. ن) کچەکا د ژیێ 17 سالیێ دایە ل تلقەسەب ل رۆژا 3/8/2014 دھێتە رەڤاندن بۆ ئەڤرۆ دیارکر ھەموو ھیڤی و ئومێدێن مە ئەو بوون کراسێ سپی بکەینە بەر خوە و گۆت: لێ مخابن گورگا بێ بەخت و بێ ووژدانا دلێن ھزارەھا کچان شەوتاندن و گەلەک کچێن خورت ل شەڤێن تاری دناڤ دەستێن داعشێن گورگ دا ژیانا خوە ب دووماھی ئێنا.
ئەڤ کچا 17 سالی گۆتژی: دیمەنێن وان رۆژێن ڕەش کارەساتا شنگالێ ھەموو وەکو زنجیرەیا فلمەکی ل بەر چاڤێن من دبۆرن، ل دەستپێکی دەمێ ئەم کەڤتینە دەستێ داعشا دا ل تلقەسەب ئێکسەر ھەر تشتەکێ پەیوەندی ب ئێزدی و ئاینێ ئێزدیاتیێ ڤە ھەی تیرۆرستان ژ مە وەرگرتن ژن و کچ و زارۆ و زەلام ھەموو ژێک جودا کرن ئەم گەلەک کچ ئێکسەر بەرب مووسل ڤەگوھاستین و بۆ ماوێ 15 رۆژان ل مووسل ھێلام و پاشی بەرب باژێری رەقە ل وەلاتێ سوریا ب ترۆمبیلان ل درەنگی شەڤ برینە رەقە بۆ ماوێ دو ھەیڤان ل باژێرێ رەقە ھێلام.
ھەروەسا ڤێ کچێ ب چاڤێن تژی روندک و دلەکێ شکەستی گۆت: ل باژێری رەقە تیرۆرستان دەست ب کرین و فروتنا کچێن ئێزدی کر دناڤ ئاڤاھیەکێ دا ، ئەمیرەکێ تیرۆرستان ئەز ژێ گرتم و بخوە ھێلام ئەز گریام من گەلەک ھیڤی ژ وی ئەمیری کرن دەستدرێژی ل سەر من نەکەت، لێ بێ مفا بوو ئەز ئەشکەنجە دام من چ دەستھەلات نەبوو بەرەڤانیێ ژ خوە بکەم و کەس نەبوو ھەوارا خوە بگەھینمێ، تیرۆرستان ھەموو تشت ب زورداری ب کچێن ئێزدی دانە کرن و شێخ و ئەمیرَین داعش گەلەک کچ ئەشکەنجەدان دەمێ کچێ خوە دەستڤە بەر نەدابا.
ڤێ کچێ دا زانین ژی کو، ئەمیرێ داعش نەھێلا ئەم ژ خانی دەرکەڤین بۆ ماوێ دو ھەیڤان شەرێ دەروونی ل گەل رەڤاندیان دکر و گۆت: شەڤەکێ من بۆ وی ئەمیری باوەری چێکر کو ئێدی ئەز دێ ل گەل بم وی ناھێلم ھەتا من رازی کری رێ ب من بدەت دەرکەڤم دا بخوە ل رێکەکێ بگەرم، رۆژەکێ ئەز شیام تێلەفونێ ب دەستخوڤە بینم و ناڤ و نێشانا بدەمە مال و ب ریێا نڤیسینگەھا ئێزدیان یا کاروبارێن رەڤاندیان ئەز ھاتمە رزگارکرن ژ رەقە چوومە تورکیا و پاشی گەھشتمە دھۆکێ نوکە ل کەمپا قادیا باژێری زاخو ئاکنجینە.
م، ن ئەو چەندە ژی گۆت: ب چاڤێن خوە مە دیت ل مووسل تیرۆرستان زارۆ ژبەر سینگێ دایکێ ڤەدکرن بێ دایک دھێلان، ئەڤە نێزیکی سالەکێ یە ئەز ژ دەستێن داعش رزگاربوویم ھەتا نوکە ب شەڤی ئەز دترسم ترسەکا گەلەک مەزن یا د دلێ مە دا چێبووی یێ ب چاڤێن خوە نە دیتبت نزانیت کا چ ب سەرێ کچێن ئێزدی ھاتیە دناڤ دەستێ رێکخراوا تێرۆرستێ داعش، من بچاڤیێن خوە دیت ژن و زەلام ژێکڤە کرن ل پێش چاڤێن زەلامێ تەحرووشی ژنێ بوون، زەلام ئەشکەنجەدان و گۆتنی موسلمان ببە و ژن برن من دیت ھندەک زەلام کوشتن چونکی ئاینێ خوە نە گۆھوری و تیرۆرستان ژن ل گەل خوە برن بتنی گونەھا ئێزدیان ئەو بوو چونکی کورد بوون و ئێزدی بوون.