ڕستا جلكان
بەهزاد بەهرام
لسەر سفرا خوارنێ هێدی هێدی هروبایێ خەیالێن پاییزی بسەردا دهات، هەر نە دزانی چەوا شیڤێ دخۆت، هەڤژینا وی پێ حەسیا كو د دەریا ئاشۆپاندا یێ دخەندقیت، لێ هزر كر زۆرێ ماندییە و هزر دكاریدا دكەت، دل نەدا ژوان خەیالان رزگاربكەت. هێشتا پارییێ خوارنێ دگەورییێ دا نە داعویرای ئیكسەر داخوازا چایەكا دیشلەمە كر، بەرەف هۆلێڤە چوو، روینشت، دیسان پێلێن ئاشۆپان ئازریان، كویر و دویر بر، لێ ڤێ جاڕێ هەڤژینا وی ب دەنگەكێ نەرم و نازك گۆتێ: چایا تە سار بوو. ئێكسەر ڤەجنقی، تەزینكەكێ گرت، مویێن لەشێ وی گژ بوون، بێ كۆ قوورچەكێ ل چایێ بدەت، بڕیار دا ژ ڤی تاخی باربكەت، بەرەڤ تاخەكێ دیترڤە بچیت.
هەڤژینا وی ژ ڤێ بڕیارێ ماتمایی ما، دگەل هەڤژینا خۆە كەفتە دانوستاندنێ كو مالا وان ل سێ وەڕزێن سالێ دمەترسیا ئاڤرابوونێدایە، ژبەر وێ شیفكا دانگا مالا وان ل ئاڤاهییەكێ چار قاتی و ل قاتێ چارێ دیسان بوونە كڕێدار . هەڤژینا وی داخواز ژێ كر كو ڕستەكا جلكان لسەر بانی بۆ دروست بكەت داكۆ جلكێن هەردو كچێن خوە یێن جێمك بناڤێ “یەكبوون” و “گولستان” ل رۆژین خوەشی لبەر تیرۆژكێن تاڤێ رابئێخیت و هشك ببن. ژنكێن جیران ب وێ ڕستا جلكان حەسیان، پشتی ژ جلك شویشتنێ خلاس بووی، هەردو كراسێن كچێن خوە یێن جێمك كو ب ئالایێ كوردستانێ هاتبوونە نەخشاندن لسەر رستێ رائێخستن. دەمژمێرەك پێڤە نەچوو، ئەو ڕستا جلكان پر بوو ژ جلكێن رەنگا و رەنگ و ژ هەمی رەنگان، زەر، كەسك، شین، قەهوەیێ و سۆر.. تو دا بێژی ڤێ ژنكێ دەما كراسێن ب ئالایێ كوردستانێ هاتینە نەخشاندن، پشتی رائێخستنێ، كریە ستریك و بۆ هەمی ژنكێن جیران فرێكرییە. ل قاتێ ئێكێ مامۆستایەكا هونەریێ هەبوو، یا ژ زارۆكان بێ بەهر بوو، مژویلی رێكخستنا وێنە و تابلۆیان بوو، ژبۆ پشكداریكرنێ د پیشانگەهەكێدا، زەنگا تێلەفۆنا وێ لێدا و بەرەف بانیڤە چوو، دەما چاڤێن وێ ب وێ ڕستا جلكان كەفتی، دجهدا راوەستیا و مەندەهۆش بوو، ئیكسەر تێلەفون گرت، بەرەف وی قەمیسیڤە چوو، ئەوێ ژ رستێ كەفتییە لسەر بانی و هەلدگرت و ودانا لسەر ڕستێ. پاشان ئێكسەر بەرەف ژۆرا خوەڤە دچیت، چەند تابلۆیەكا ژ وێ ڕستا جلكان ب دەستێ خوە د روست و بەرهەڤ دكەت ژبۆ پیشانگەهێ، ب دو تابلۆیان پلا ئێكێ وەردگریت، ئەو تابلۆیێ كو قەمیس ژ ئەردی راكری، تابلۆیێ دوێ ڕستا جلكان كو ژ كراسێن ئالایێ كوردستانێ و جلكێن ژ هەمی رەنگان پێك دهات.
