ڕوومەتا ئالا قودرەتێ
نایف مەحمود
د گەریا ڤی ئەسمانیدا
ڕۆژەك یا بووی
ژ ڕەنگێ ئالا قودرەتێ
یا ژدایك بووی
گەش و قەشەنگ
دڕ و یاقوت و زێرو گەوهەر،
پڕ شوخ و شەنگ…ئەڤ ڕۆژە
دسینگێ ڤی گەردونیدا
ستێرەكە، گولا حەفت ڕەنگ..
د دولا ڤی ئەسمانیدا
ڕووبارەك ژێ دهەڕكیت
مێرگ و چیمەن،
زوزان و بەر زیرو چیا
كەسكە بوهار لێ شین دبیت
ئەڤ ڕووبارە، بویكا جوان و كوبارە
ل هەرچوار دۆرێن جیهانێ
ب ناڤ و دەنگ..
ل سەر سینگێ ئەڤێ ئاخێ
بایەك ژ بێهنا ڤێ زاخێ
عەتر و مسك ژێ دبارن
تەڤ جوانی دبنە كەڤال
گوسك و گولاڤ دوست و هەڤال
ل دەردورێن مە پارڤەكرن،
تاڤیەك ژ چپكێن بارانێ
دناڤ باخچێ بەهەشتا چیایێ جۆدی
بو سەر تۆز و غوبارێ ژ ئەڤێ داخێ
ئەورێن ڕەش و تاری دبەت..
بیابانا ئوف و نالین و فیغانا
دكەت ستران، ئاواز و پەست..
ڕوژ ئاڤابوون لێ شاهیە
هەلاتن لێ مزگینیە،
شالیل و بلبل و شاهین
كەو ل قاد و بەر زنارا
هەر دقەبن، ژین و ئەڤین
ژ یەزدانی، خودانێ ئاخ و ئەسمانی
ناڤێ تە چەندێ شرینە
ئەی كوردستانا
شوخ و شەنگ.
