ڕۆلـێ ئـافـرەتـا كـورد د وارێ ئـابـووری دا
جێریە غازی
هەر ژ سەردەمێن كەڤن و تا نهۆ ژی ئافرەتا كورد مل ب ملێ زەلامی د وارێ ئابووری دا پشكداربوویە. د سەردەمێن بەرێ دا و ب تایبەت ل گوندان ئافرەتا كورد ژبۆ پەیداكرنا پژێۆێ ڕۆژانە ل گەل هەلاتنا ڕۆژێ وەك زەلامی دەست دایە كاركرنێ، بۆ ئەڤێ مەبەستێ تەرش و تەوال خودان كرییە بەرهەمێ وان فرۆتینە و داهاتێ وان ل خێزانێ خەرجكرییە. دیسا د چاندنێ دا خودان پشك بوویە، ژبەركو پتریا ئافرەتێن كورد د كارێن چاندنێدا خودان هێزەكا دیار و بەرچاڤبوون و پتریا چاندن و چنینا (نۆك، خیار، پیڤاز، گوندۆر، باجان، …هتد) ل سەر دەستێن ئافرەتان هاتینە برێڤەبرن، ئەڤجا چ وەك كاركەرەك یان ژی وەك ئەندامەكا خێزانێ وەك هاریكارییەك و بارسڤكیەك بۆ زەلامی پشكداربوویە.
د سەردەمێ نهۆ دا ژی ئافرەتا كورد ڕۆلەكێ بەرچاڤ د وارێ ئابووری دا هەیە، لێ ب شێوەیەكێ پێشكەفتیتر، ژبەركو ژیانێ گوهۆڕینێن بەرچاڤ بخۆڤە دیتینە و ئاستێ خواندن و ڕەوشەنبیریێ بەرفرەهتربووە، لەورا كاروبارێن جیاوازتر و ئاسانتر پەیدابووینە. ئافرەتا كورد د نهۆ دا جهەكێ بەرفرەهتر و ڕۆلەكێ بەرچاڤتر دگێڕیت، پتریا ئافرەتێن نهۆ خودان كارێن جیاوازن، وەك (مامۆستا، نوژدار، فرۆشیار، ئەندازیار و …هتد.) ب ئەڤان كاران ئافرەتا كورد دشێت داهاتێ ڕۆژانە پەیدابكەت و خێزانا خۆ خودان بكەت، بێ كو تووشی هیچ ئاستەنگیەكێ یان ڕێگرییەكێ بیت.
ب ئەڤێ چەندێ خۆیا دبیت، كو ئافرەتا كورد هەر ژ سەردەمێن بەرێ و تا نهۆ دا ڕۆلەكی بەرچاڤ هەبوویە د وارێ ئابووری دا، بێ جیاوازییا ڕەگەزی كاركریە و شیایە ل گەل زەلامی دەست ب كاڕا بكەت، ئانكو ئافرەتا كورد هەردەم هاریكاریا زەلامێ خۆ و خێزانا خۆ كریە، سەرەڕای ئەوان هەمی كارێن سەخت و دژوارێن د ناڤ مالێ دا و پەروەردەكرنا زارۆكێن خۆ، د گەل هندێ دا د كاروباران دا پشكداربوویە بۆ ب دەستڤەئینانا داهاتی
