ڕۆلـێ ڕاگەهـاندنـێ د پێشڤەبرنـا، زمـان، ئـەدەب، چـاند، دیرۆكـا كـوردان
فـەرید نوورەدین بـۆزۆ
خۆیا و بەرچاڤە، كو ڕاگەهاندن ئالاڤەكە ژ ئالاڤێن بەربەلاڤ ژبۆ گەهاندن و بەرچاڤكرنا ڕویدانێن ڕۆژانەیێن ناڤخۆیی و جیهانی، ئانكو چاڤێن تاكێن جیهانی ڕۆژانە بینەریا ڕویدانان دكەن، و ئەو ڕویدان ب چەندین تەوەر و پروگرام و مژارێن جودا جودا دهێنە پەخشكرن، و ئەم دشێین ب ئەڤێ ڕێكێ، زمان و ئەدەب، چاند، دیرۆك، كولتۆر…هتد یێ كوردی نیشانی جیهانێ بدەین.
نەبوونا تێلەفزیۆن و ڕادیۆ و دەزگەهێن ڕاگەهاندنێ د كەڤندا، هۆكاربووینە ژبۆ بن ئاخبوون و نەمانا چەندین بەلگەنامە و دوكیۆمێنتان لسەر نەتەوێ كورد، هەروەسا ل سەر چالاكی و لڤینێن ئەوانێن سیاسی و ئەدەبی و زمانی…هتد. دیسا هۆكارێ نەبوونا ئەڤان دەزگەهێن ڕاگەهاندنێ ژی ڤەدگەڕێن ژبۆ ڕێگریكرن و نەجێگیربوونا كوردان ل جهـ و وەلات و دەڤەرێن خۆ، دیسا پارچەكرنا كوردستانێ و هەڤڕكیێن ساسی و لەشەكری و ئاوارەبوون و شەڕ و ئالۆزی…هتد ژ وان ئەگەرانە یێن بووینە ڕێگرێن نەبوونا دەزگەهێن ڕاگەهاندنێ.
پشتی سەرهەلدانا پیرۆزا سالا ١٩٩١، و ڕزگاربوون ل ژێر عەورێن ڕەش و بندەستیێ و دگەل ڤەخوارنا ئاڤا ئازادیێ، هزرێن نەتەوەیی و كوردایەتیێ وەكی پێنگاڤەك ب كریار هاتنە پێش، ئەو بوو كو ل سالا ١٩٩٢، تێلەفزۆینا (دهۆك تیڤی)، وەكی بنگەهەك ژبۆ پەروەردەیا مالان، ژ ڕویێ زمان، ئەدەب، چاند…هتد، ل باشوورێ كوردستانێ هاتە دامەزراندن، ئێدی چاڤێن زارۆك و پیر و گەنجێن كوردان ب گشتی و ل بەهدینان ب تایبەتی كەفتنە سەر ئەڤێ شاشا ڕەنگین، هەتا گەهشتیە ڕادەكی كو ئەڤ تێلەفزیۆنە ب (تێلەفزیۆنا دایك)، دهاتە ناڤكرن و ناسكرن، ئانكو مینا دایكەكێ ببوو ڕێنیشادەرێ ڕێكا ڕاست ژبۆ تاكێ كوردی.
تێلەفزیۆنا ناڤهاتی، پشتی سەرهلدانێ ب تایبەتی ل سالێن ١٩٩٤ هەتا پشتی كەفتنا ئیراقێ، نفشەك دروستكر كو پڕانیا ئەوان هزرێن نەتەوەیی د مێشك و سەرێ ئەواندا هاتبوو چاندن، و چەندین بیرهاتنێن زارۆكینیێ یێن جوان و قەشەنگ و پڕ بها كرنە پاشخانە كو ڕۆژەك ل ڕۆژان وەكی ئەڤڕۆ ب خۆزیان زڤڕن بۆ ئەوان سەردەمان.
ل دویماهیێ من دڤێت بێژم، تشتێ ژ هەمی تشتان جوانتر و زەلالتر ژ تێلەفزیۆنا دایك، پێشكێشكرن و پەخشكرنا تەوەر و مژارێن وێ بوون ب زمانێ پەتیێ كوردی، ئەڤە د دەمەكیدا كو ماوەكێ كورت بوو ژ بندەستیێ و قەدەغەكرن ل خواندن و نڤیسینا كوردی ب پلا ئێكێ، ڕزگاربووی، دیسان مە دڤێت خۆیابكەین، ئەم دشێین ب ڕاگەهاندنێ تاكی ژبۆ ئێك ژ دو ئاراستەیان ببەی، ئاراستێ خراب یان ئاراستێ باش، تشتێ مە دیتی ژ ئەوێ تێلەفزیۆنێ، ئاراستێ باش بوو.
