ڕۆندلا 2018 تژی مزگینیه
محه‌مه‌دد چه‌لكی
چ ڕوودان چ جڤاكی، سیاسی و خوه‌زایی بن، ژ نشكانڤه ڕووناده‌ن، به‌لكو گه‌له‌ك هۆكار و سه‌ده‌م كه‌له‌كی سه‌ر هه‌ڤ دبن، ڕێكێ خوه‌ش دكه‌ن بۆ ڕوودانێ. سالا 2017 گه‌له‌ك ڕوودانێن كاره‌ساتبار بۆ هه‌رێما كوردستانێ ب خوه ڕا ئانین و سه‌متێ ئایینده‌یێ وێ دا نهاله‌كا كوورا تاری و دووماهی نه‌دیار. نه‌دیاریا ئایندێ هه‌رێمێ باندۆره‌كا نه‌گه‌تیڤ ل سه‌ر هێزێن سیاسی هێلایه و هه‌ر لایه‌نه‌ك بزاڤێ دكه‌ت گه‌رده‌ن ئازایا خوه ب هه‌زار ئاڤان بشۆت. هه‌لبه‌ت ئه‌ڤه وێ چه‌ندێ دگه‌هینیت، كو كاره‌سات گه‌له‌ك مه‌زنه و د شیانا ئه‌قلێ سیاسیێ وان لایه‌نان دا نینه، له‌وما هه‌ر لایه‌نه‌ك ژ به‌رپرسیاریێ دره‌ڤیت و خوه ل كاره‌ساتێ ناكه‌ت خودان.
كاره‌ساتا 16/10/2017 به‌رهه‌مێ ئه‌قلێ حوكمرانیا 26 سالێن بۆری بوو، ژبلی باندۆرا داگیركه‌رێن كوردستانێ ل سه‌ر جڤاكێ كوردستانێ كو ئه‌ڤه چاڤه‌رێكریه و نابیت بهێت فه‌رامۆشكرن.
هه‌وجا ناكه‌ت شاشیێن ده‌ستهه‌لاتا كوردی ل ڤێره دوباره بكه‌ین، هه‌زار جاركی هاتیه ڤه‌جوون، هه‌ر ژ لایێ ده‌ستهه‌لاتێ ب خوه ڤه چ جای ئۆپۆزسیۆن و نڤیسه‌رێن پێشكه‌فتنا كوردستانێ بۆ وان خه‌م. لێ یا سه‌یر و سه‌مه‌ره ئه‌وه كار بۆ چاره‌سه‌ر كرنێ نه‌دهاته كرن! ئه‌ڤه مرۆڤی ماتمایی دهێلیت، چنكو ئاریشا هه‌ری مه‌زن نه ناسكرنا شه‌نگستێ ئاریشێیه، ده‌ما ئاریشه هاته ده‌ست نیشان كرن، هنگی نیڤه‌كا ئاریشێ چاره‌سر بوو. خه‌ما مه‌زن ئه‌وه ڕایه‌دارێن هكومه‌تا كوردستانێ ته‌ڤ ئاریشه‌یێن به‌رووكا وێ گرتین، دزانین. لێ پێنگاڤێن چاره‌سه‌ریێ نه‌دهاتن هاڤێتن، سه‌ده‌مێن ڤێ نابانیێ بۆ وه‌لاتیان دبێ به‌رسڤبوون، هه‌یا ڤێ گاڤێ ژی دبێ به‌رسڤن.
ئه‌م یێن به‌ره‌ف ساله‌كا نووڤه دچین، ده‌ستهه‌لاتا كوردی یا ڕوو بروو هلوه‌شیانه‌كا نیڤ مسۆگه‌ر بووی و بۆ ده‌رباز بوون ژ ڤێ ڕیپێ، مخابن بێده‌نگی هلبژارتیه، ئانكو بزاڤێ ناكه‌ت ڕاستیا ڕه‌وشا ئابۆریا كوردستانێ بۆ وه‌لاتیان دیار بكه‌ت و پێنگاڤێن ته‌گشداندنێ ل دز و گه‌نده‌لچیان بشدینیت و هه‌وا دژی گه‌نده‌لیێ ده‌ستپێ بكه‌ت. هه‌موو بانگه‌شێن نه‌ته‌وه‌یی، بزڤاندنا هه‌ستا نیشتمانی و به‌رپرسیاریا نیشتمانی بۆ كه‌سێ هه‌تا قركێ دقه‌راندا خه‌ندقی و شیانێن برێڤه‌برنا ژیانه‌كا ئاسایی نه‌مای، ئانه‌كێ سۆر نائینن.
خه‌ونیشاندانێن نوكه هه‌رێما كوردستانێ ڤه‌گرتین، سه‌ده‌م بێده‌نگیا حوكمه‌تێیه، وه‌ك مه ل ژۆر سه‌ده‌م دیاركرین.
د ڕه‌ندۆلا سالا نوو دا ژ تشتێن هزر نه‌كری مشته، ئه‌گه‌ر حوكمه‌تا هه‌رێما كوردستانێ ب حه‌كیمانه سه‌ره‌ده‌ریێ ل گه‌ل خوه‌نیشانده‌ران نه‌كه‌ت، نه‌خشێ حوكمه‌تا عه‌بادی ب هاریكاریا ئیران و توركیا كێشای، مه‌ترسیا سه‌رگرتنێ هه‌یه. نه‌خشێ ئه‌بادی ئه‌وه حوكمه‌تا هه‌رێمێ نه‌مینیت و ئێكسه‌ر ل گه‌ل پارێزگه‌هان سه‌ره‌ده‌ریێ بكه‌ت. به‌رده‌وامیا قه‌یرانێ و چاره‌سه‌ر نه‌كرنا كێشێن وه‌لاتیان، دێ بیته ده‌رفه‌ت كو وه‌لاتیێن هه‌رێما كوردستانێ ژ نه‌چاری وی نه‌خشه‌ی ببپه‌ژرینن و به‌رخوه‌دانێ نه‌كه‌ن.
یا دلخوه‌شكه‌ر تشتێن د وێ ڕه‌ندۆلێ دا ئه‌مریكا نه‌خشه‌كێ نوو بۆ ڕۆژهه‌لاتا ناڤین كێشایه كو ب نه‌خشێ پاش داش دهێته ناسكرن، ئه‌و نه‌خشه پێدڤی ب هه‌ڤالبه‌ندێن نوویه، د وی نه‌خشه‌ی دا ژ هۆلێ ڕاكرنا باندۆرا ئیرانێیه. ئیران سه‌رپه‌رشتیا باسكێ دژی ئه‌مریكا دكه‌ت. ئه‌گه‌ر زلهێزێن هه‌رێمی و جیهانی د 2017 دا ته‌ڤ ل سه‌ر نه‌هێلانا داشێ دكۆك بوون د شه‌رێ نه‌هێلانا باندۆرا ئیرانێ ل ڕۆژهه‌لاتا ناڤین دا، دێ بێژینگبوونا هێزان ل سه‌ر دو باسكان بیت(ئه‌مریكا و ئیران). هه‌به‌ت ئیراق دێ ل به‌ره‌یێ ئیرانێ بیت، وه‌سا دشهێته ته‌خمێıن كرن كو توركیا ژی بكه‌ڤیته د ناڤ باسكێ ئیرانێ دا.
ئه‌گه‌ر ده‌ستهه‌لاتا كوردی ب هه‌كیمانه سه‌رده‌ریێ ل گه‌ل خوه‌نیشانده‌ران بكه‌ت، ل سه‌ر ئاستێ سیاسه‌تا ناڤنه‌ته‌وی ژی ل گه‌ل به‌ره‌یێ ئه‌مریكا بیت، دێ ڕه‌ندۆلا سالا 2018 تژی مزگینیێن خوه‌ش بیت و برینا 2017 دێ جه‌بار گرتی بیت.
سالا 2018 ل هه‌وه گشتان پیرۆز بیت.
