ڕۆژئـاڤـا و بزاڤـا ئـازادیخوازیا كـوردی
ئازاد بەرواری
رێچكا ستراتیجیا شۆڕەشا كوردستانێ ب ڕابەرایەتیا پارتی، نەخشە ڕێكا بزاڤا شۆڕەشگێڕیا كوردستانێ، هەر ل دەستپێكا چەپەر گرتنا بەڕەڤانیا ل ئاخا كوردستانێ دەستنیشان كر و پێنگاڤ ـ پێنگاڤ ل گۆرەی وێ سراتیجییا شۆڕەشگێڕیا دەستنیشانكری پەیڕەو كر و هەتا ئەڤرۆكە ژی ل سەر وێ ڕێچكێ بەردەوامە. ئەڤ ستراتیجیا ناڤبری دوو ئامانجێن سەرەكی هەنە، یا ئێكێ ئەوە كو شۆڕەش و خەباتا پارتی بۆ ب دەستڤەئینانا مافێن گەلێ كوردستانێ یە ل چارچووڤێ دەولەتا ئیراقێ دا، پێنگاڤا دووێ ژی ئەوە كو پشتەڤانیا بزاڤا رزگاریخوازیا گەلێ كوردستانێ ل هەر سێ پارچێن دن ب هەمی شیانێن خوە یێ شەڕڤانی و دیپلۆماسی، لێ بێی كو مایێ خوە ل بریارا سیاسی یا گەلێ مە بكەت ل وان پارچێن دن یێ كوردستانێ. ئەڤ چەند ل مەیدانا پڕاكتیكی دا سەلماند، ل پشتەڤانیا گەلێ مە ل ڕۆژئاڤا ل دەمێ بەڕەڤانی ژ كۆبانێ ل دژی هێرشێن ئێكێ یێن داعشییان و پشتی كو هۆڤێن داعشی هاتینە شكاندن، جارەكا دی پێشمەرگێن كوردستانێ ب بریارا ڕابەرایەتی ڤەگەریانە ڤە چەپەرێن خۆ یێن بنگەهین ل باشوور، بێی هیچ دەست تێوەردانەك ل كار و بارێن كارگێڕیین ڕۆژئاڤا. و هەروەسا ل ڤێ كۆمپلۆیا ڤێ جارێ ل دژی ڕۆژئاڤا كو گەلێ كوردستانێ ل باشوور ب بڕیارا ڕابەرایەتی گەل و پێشمەرگە سەفەر بوون بۆ پشتگیری ل ڕۆژئاڤا، كو ب ڕاستی ئەگەر پشتەڤانیا باشوور نەبا، ڕەنگە پیلانا چارقۆل یا سووریا، توركیا، سعوودیا و ترامپ سەربگرتبا و ببا سەدەمێ كارەساتەكا كوشندە بۆ برایێن مە ل ڕۆژئاڤا، لێ خۆشبەختانە، بەرخوەدانا گەلێ كوردستانێ ل وەلات و ل سەرانسەری جیهانێ پشتگیریەكا بێ وێنە هاتە ئەنجامدان و جیهان سەرسۆڕمایی ما، دوبارە ل ژێر ڕۆناهییا ڕابەرایەتی ل گۆرەی ستراتیجیا بزاڤا ئازادیخوازیا كورد دەستپێشخەریەك بێ وێنە هاتە ئەنجامدان و بوو وەرچەرخانەك ل هزرا تاكێ كوردستانی ل هەر چار پارچێن كوردستانێ كو هەر چار پارچێن كوردستانێ ژ نافكێ ڤە ب هەڤلێرا پایتەخت ڤە هاتینە گرێدان.
ل ڤێرێ ڕەوشەك دیرۆكی هەیە كو هەژی ئاماژە پێكرنێ یە، وەك بەرسڤەك بۆ گەلەك كەسێن كو ڕەخنە ل پارتی و ڕابەرایەتیا شۆڕەشا كوردستانێ دگرتن. ل دەرئەنجامێ كۆمپلۆیا جەزائیر! چاخێ ئەمەریكا دەستێ خوە ل پشتەڤانیا شۆڕەشا كوردستانێ ڤەكێشاند، بارزانی نەمر بڕیارا ڕاوەستاندنا شەڕێ چەكداری دا، گەلەك ڕەوشەنیرێن بێ ئەزموون ڕەخنە دگرتن و دگۆتن ل خانەقین هەتا زاخۆ پێشمەرگە لە چەپەرێن خوە بوون، لەوما پێدڤیە شەڕ نەهاتبا ڕاوەستاندن. لێ ڕابەرایەتی دزانی كو هیچ دەولەتەك ب شەڕێ چەكداری ناهێتە ڕوخاندن، ئەگەر پشتەڤانیا سیاسیا نێڤنەتەوەیی ل گەل نەبیت، لەوما بڕیارا شەڕ ڕاوەستاندنێ دا كو ل گۆرەی دویربینی و تیژبینیا ڕابەرایەتی، شكەستنا ل شەڕەكێ ناهێتە واتا پاشگەز بوون ل پاراستنا مافێ ڕەوایێ گەلێ كوردستانێ، لەوما ل ماوەیەكێ گەلەكێ قیاسی جارەكا دی شۆڕەشا ٢٦ گولانێ دەستپێ كرڤە.
ئەگەر هێڤ كەینە ڤان پێشهاتێن ئەڤرۆكە هاتینە پێش ل ڕۆژئاڤا و ئەڤ كۆمپلۆیا ل دژی ڕۆژئاڤا هاتیە گێڕان، ئەگەر هێز و پشتەڤانیا باشوور نەبا ب دەستپێشخەریا ڕابەرایەتی، ڕەنگە نوكە ببا كارەست ل ڕۆژئاڤا و ستاتۆیەك ب ناڤێ ڕۆژئاڤا نەمابا، لێ خۆشبەختانە هشیاری و پشتەڤانیا گەلێ كوردستانێ و هەلوەستێ ڕابەرایەتییا دیرۆكی بوونە قەلغانەك ل دژی دوژمنێن گەلێ كوردستانێ، هەروەسا هەولێن دیپلۆماسیێن ڕابەرایەتیا كوردستانێ ژی بوونە پشتەڤانیەك موكوم كو فشارێن مەزن ل سەر دیمەشقێ بهێتە كرن ڕازی بیت ل گەل رابەراتیا ڕۆژئاڤا بهێتە سەر مێزا دان و ستاندنان، ل سەر دفنا توركی و سعوودیێ و قەتەرێ و.. هتد.
ئاكامێن كومپلۆیا جەزائیرگەلەك دژواربوون و دیاربوو كو مە چ دۆست نینن، تەنێ گەلێ مە و چیایێن مە پشتەڤان بوون، لێ بۆ مە بوو ئەزموونەك كو ئەڤرۆكە ڕەنگڤەدانا وێ ل كوردستانێ و ل سەرانسەری جیهانێ كورد و كوردستانی كرنە ئێك دەنگ و ئێك ئالا. هەژی گۆتنێ كو بێژین ((هەر دربەكا دوژمن، ئەگەر پشتا مە نەشكێنیت، دێ بیتە سەدەمەك بۆ ب هێز بوونا مە)) پارتی ب هەلویەستێ خۆ یێ نیشتمان پەروەری بۆ جیهانێ و تەڤایا گەلێ كوردستانێ ل هەر چار پارچەیان خۆیاكر كو ماكا هزرا نەتەوایەتیا كوردستانێ یە ب پێشڕەویا ڕابەرایەتی.
