ڕۆژا “ره‌ش”، ڕۆژا داگیركرنا شه‌نگالێ، نا بێ ئه‌م هه‌رگیز ژبیر بكین
سیپانێ باڤی / ستوكهۆلم…
كاره‌ساتا كو ل3/8/2014 ده ل ده‌ڤه‌را شه‌نگالێ ب سه‌رێ مه ده هاتی، د ڤێ ب بێهێڤێنێ ژخه‌وا بێ ئاگه‌هیێ هشیار بین، ئێكگرتن و ڕابوونا مه گشت كورد و كوردستانییان.
باوه‌ریێن ئۆلی ب جهێ خوه. ڕێزا من هه‌یه ژ بۆ بیروباوه‌ریێن هه‌ركه‌سی و هه‌ر مله‌ته‌كی. لێ ده‌ما مرۆڤ ب حیكمه‌ت و دوور ژ سه‌رهشكی یا ئۆلی ل پێڤاژۆ یا داگیركرنا چه‌كدارێن داعشان هوور و كوور دبێ، ب تایبه‌تی كا چما ئێكه‌م جار ده‌ڤه‌را شه‌نگالێ و خه‌لكێ مه یێ كو هێشتا و سه‌ره‌رای 73 فه‌رمانێن هۆڤانه، شیاینه ئۆلێ و زمان و چاندا بابوكالێن خوه یێن كورد یێن كه‌ڤناره هه‌تا ڕاده‌یه‌كی ژ هێرشێن هۆڤانه یێن داگیركه‌ران و تێكچوونێ بپارێزن و پێره هێرش برنا سه‌ر كۆبانێ، كه‌ركووكێ، عه‌فرینێ و سه‌رێكانیێ و كا چی ئانین و تینن سه‌رێ خه‌لكێ وان ده‌ڤه‌ران، ب تایبه‌تی خووشك و برایێن مه یێن ئێزدی ل ده‌ڤه‌رێن شه‌نگالێ و عه‌فرینێ ب هێجه‌تا كو نه موسلمانن.
باش دییار دبێ كو ژ بۆ داگیركه‌ران، كورد هه‌ر كورد ده و د ڤێ نه‌مینن؛ ئێزدی بێ، فله بێ، جوهی بێ یان موسلمان بێ. داگیركه‌رێن مه هینگێ ژ مه د گه‌رن، یان مه ب كوژن و زارۆ و ژنێن مه وه‌ك به‌نی، كۆله و كه‌نیزه‌ك ژ خوه ڕه ب بن یان ژی، ژ ترسێن سه‌ربرین و كوشتن و تالان و نامووس هه‌تكاندنێ ده ئه‌م قه‌بوول ب كین كو ژ وان ڕه ب بین به‌نی و كۆله.
ئیرۆ د بهیسم كو هنده‌ك ئێزدی ژ دلشه‌واتا خوه دبێژن كو ئێزدی نه كوردن، یان هنه‌ك كوردێن موسلمان ژ سه‌رهشكی یا ئۆلی و نه‌زانین دبێژن ئێزدی نه كوردن. ئه‌ڤ دیتن ژ بلی كو نه وه‌یه و شاشییه‌ك مه‌زن ئه، دروست ئه‌وه یاكو داگیركه‌رێن مه یێن ئه‌ره‌ب، تورك و فارسان ب سه‌دێ سالان ئه كار و جه‌نگ ژ بۆ كرنه و به‌رده‌وام ژ بۆ كار دكن.
ئه‌ڤ جۆره دیتن ژ بۆ مه كوردان له‌نگی و مالوێرانییه‌ك مه زنه، لێ د هه‌مان ده‌م ده ژ داگیركه‌رێن مه ڕه سه‌ركه‌فتنه‌ك مه‌زنه.
دورست ئه‌ڤه به‌رهه‌مێ وی تۆڤی یه یێ كو سه‌دێ سالانه داگیركه‌رێن مه ب زه‌برا شوور و خوینێ وه‌كا ستری و درییان د ناڤ مه كوردان ده ل هه‌ر پێنج پارچێن كوردستانێ ده چاندنه و هێشتا دچینن.
له‌وما، ڕۆژ هاتی یه، ئه‌گه‌ر نه هنده‌ك دره‌نگ ژی بێ كو ئه‌م ژ خه‌وا بێ ئاگه‌هی یێ هشیار بین، هنده‌ك ڕاوه‌ستین و سه‌ر ژ نوی ل سه‌ر ڕێ یا نه‌ته‌وه‌یی و ڕزگار كرن ئاخ ئا وه‌لاتێ خوه كوردستانێ یه‌ك ب گرین و خه‌باتا ئازادی و ڕزگاری یێ هه‌تا سه‌ركه‌فتنێ به‌رده‌وام بكین.
ژبلی ئێكگرتنه‌ك پاك و موكم ڕێیه‌كا دن یا ڕزگاریا مه قه‌ت نینه.
