ڕۆژنـامـەڤانییا گـوندان
ئیسماعیل بادی
ڕۆژنامەڤانی، ئەو كارێ گرنگ و پڕ ب مفا، وەكو شیرەكێ دو سەرە، دڤێت كەسێ ب وی كاری ڕادبیت گەلەكێ شەهرەزا بیت و بزانیت دێ چاوا سەرەدەرییێ د گەلدا كەت، دیسا فەرە پتر كارێ خۆ بێختە د خزمەتا خەلك و مرۆڤایەتیێ دا.
هەر چەندە ل ڤان ڕۆژێن بۆری، ب گەلەك رەوشا بەحس ل ڕۆژنامەڤان و كارێ ڕۆژنامەڤانییێ هاتە كرن، چونكی هندەك ب شاشی ڤە بكاردئینن، خۆ و خەلكەكی ژی دئێخنە بن بارەكێ گرانێ بەرپرسیارییێ.. كو ئەڤە دڤێت بهێتە ڕاستڤەكرن و ئەو كەسێن نە ڕۆژنامەڤان ژ وی كاری بهێنە لادان.
ژبلی ڕۆژنامەڤانییا ئاسایی، ئەڤا كوهەتا نوكە مە دیتی و خواندی و لێ كاركری، چ هەفتیانە و نیڤ هەیڤانە و وەرزی و ساڵانە و گەلەك ڕەنگێن دیتر، ل دویڤ دەم و جهێن لێ دەردكەڤن، ئەڤە چەند ساڵەكە، جۆرەكێ دی یێ ڕۆژنامەڤانییێ دەركەفتییە، ئەو ژی ئەم دشێین بێژینێ (رۆژنامەڤانییا گوندان)، ئانكو رۆژنامەڤانییا سەیرانییان. هەر گوندەكێ یان عەشیرەتەكا دچیتە سەیرانا خۆ یا ساڵانە، گەلەكان یا كرییە نەڕیتەك، كو بەلاڤۆكەكێ یان ڕۆژنامەیەكێ دەربێخن و هژمارەكێ داننە سەر بەرپەڕێن وێ، كو هەژی ل سەر ڕاوەستییانێ یە، ئێك ژ وان رۆژنامەیا (رەشاڤە)، بەری چەند رۆژان هژمارا وێ یا نوی یا (4)ێ گەهشتە من.
ب دیتنا مە، كو ئەڤە بۆ ماوەیێ چەند ساڵانە ئەم د وارێ ڕۆژنامەڤانییێ دا كار دكەین، فەرە ب چاڤەكێ ڤەكری سەحكەینە ڤێ دیاردەیێ، ئەرێ یا ساخلەمە، چەند مفایێ خۆ هەیە، كەسێن ئەكادیمی ل دۆر ڤی جۆرێ ڕۆژنامەڤانییێ چ دبێژن، كو هندەكان ژ وان ڕۆژنامەڤانان؛ كەسێن ئەكادیمی ب خۆ ژی د گەلدانە. ئەرێ دڤێت ناڤەرۆكا وان، ئانكو بابەت و مژارێن وان ب چ رەنگ و شێوە بن؟
ب هزرا مە، یا فەرە ئەڤ جۆرە رۆژنامە و بەڵاڤۆكە، پتر گرنگییێ بدەنە كولتۆر و رەوشت و نەریتێن وی گوندی یان عەشیرەتا ژێ دەردكەڤیت، هەروەسا كەسایەتییێن وێ دەڤەرێ بۆ نفشێ نوی بهێنە نیاسین، دیسا گرنگی ب زمان و ئەدەبیاتا نڤیسكی و زارەكی بهێتەدان، پتر ژ یا نووژەن. چونكو ئەڤ بەلاڤۆك و رۆژنامەیە، دێ بنە بنەكۆكەك بۆ دانانا پەرتوكەكێ ل دۆر وی گوندی یان عەشیرەتێ.
ئەز وەسا دبینم دەركەڤتنا وان، نە كارەكێ خرابە، باشیێن وێ پترن ژ خرابییان، هەكە ژ لایێ دارایی ڤە ژی لێ بنێڕین، كو هەمی گوندی یان عەشیرەت تێدا پشكدارن و نابیتە بارگرانییەك بۆ سەر ملێن كەسێ.
