ڕیفراندۆم.. سـامـانـەكـێ هـەلگرتـی یـێ نـەتەوەیـا كـوردە
سندس سالح سلێڤانەی
ڕیفراندۆم، ئەو پەیڤا كو ل ٢٥ ئیلۆنا ٢٠١٧ بوویە خەونەكا راستی، ئەڤرۆ وەك سامانەكێ هەلگرتی و پاراستی یێ نەتەوەیا كورد دهێتە دیتن. ئەڤ سامانە، یێ كو ب خوینا شەهیدان هاتیە پاراستن و ب ئیرادەیا خەلكی هاتیە مۆركرن، دێ بۆ هەمی دەمان وەك رۆناهیەك ل پێش چاڤێن مە بیت سامانێ ریفراندۆمێ، نە ب زێر و زیڤ دهێتە پیڤان، بەلكو ب وێ هەستێ دهێتە دیتن كو د دلێ هەر كوردەكی دا هەی. ئەو ئیرادەیا كو بوویە سەبەب كو خەلكێ كوردستانێ، ب سەدان هزاران، بچنە سەر سندوقێن دەنگدانێ و «بەلێ» بۆ سەربەخۆبوونێ بدەن گەلۆ چ سامان هەیە ژ ئازادیێ بەهادارتر؟ گەلۆ چ دەولەمەندی هەیە ژ مافێ دیاركرنا چارەنڤیسێ خۆ ب دەستێ خۆ گرنگتر؟ ریفراندۆما كوردستانێ، ئەو رۆژا پیرۆز، بوویە چریسكەكا گەش د تاریا دیرۆكا نەتەوەیا كورد دا سامانێ ریفراندۆمێ، پتر ژ دەنگەكێ بوو. ئەو هەستا ئێكبوونێ بوو كو خەلكێ كوردستانێ پێكڤە گرێدا. ئەو باوەریا ب خۆ بوونێ بوو كو ل هەر لایەكێ دنیایێ، كوردەك دیت كو گەلێ وی پێكڤە دەنگێ خۆ ددەت بۆ ئازادیێ ژ وی دەمی پێڤە، ریفراندۆم بوویە بەشەك ژ ناسنامەیا كوردی. بوویە سامانەك كو هەر كوردەك پێ شانازیێ پێ دبەت. دەمێ زارۆكێن مە دێ گەهن، ئەم دێ بۆ وان ڤەگێرین چاوا كوردان خەونەكا خۆ یا هزار سالی كرە راستی. ریفراندۆم بوویە دەرسەك بۆ دوژمنێن مە ژی. وێ دیار كر كو گەلێ كورد، ئەگەر پێكڤە بیت، دێ شێت چ كەت. وێ دیار كر كو ترس و گەفان نەشێن مە ژ ئارمانجێن مە دویر بێخن. وێ ئاشكەرا كر كو گەلێ كورد یێ ئامادەیە بەرەڤانیێ ژ سامانێ خۆ یێ هەری بهادار بكەت، ئەوژی سەربەستی و ئازادی یە. ریفراندۆم وەك سامانەكێ هەلگرتی ژ بۆ نفشێن داهاتی یە ژی. هەر دەمێ ئەو پرسیار دێ هێتەكرن: «ئەرێ كورد بۆ خۆ نەتەوەیەكە؟ ئەرێ كورد خۆدان ئیرادەیەكا سەربەخۆ یە؟» ئەم دێ بشێین ب شانازیەڤە بەرسڤێ بدەین: «بەلێ، ٩٣٪ ژ دەنگدەرێن كوردستانێ ب ‹بەلێ› بەرسڤ دایە.»دەنگێن وی دەمی، دێ هەتا هەتایێ د گوهێن دیرۆكێ دا دەنگ ڤەدەن. ئەو دەنگێن كو ئەم هەمی پێكڤە گرێدان و كرنە ئێك، وەك سامانەكێ هەلگرتی دێ بۆ هەمی دەمان ل دەف مە بن.بلا ژبیر نەكەین كو ئەڤ سامانە ب ساناهی نەهاتیە بدەستڤەئینان. گەلەكان جان و خوینا خۆ دانە بۆ وێ. لەوما، ئەركێ مە هەمیانە كو بپارێزین ڤی سامانی. ئەم دڤێت خودان دەرئێخین و پێشڤە ببەین داخوازێن وی دەمی، و هەولبدەین كو رۆژەكێ، ئەو خەونا كو د دلێ هەر كوردەكی دا هەی، ببیتە راستی.
ریفراندۆم دێ هەتا هەتایێ وەك سامانەكێ هەلگرتی، وەك خەزینەیەكا نەتەوەیی، وەك دەنگەكێ بلند مینیت: «ئەم مللەتەكێ زیندی نە، و ئەم وێ هەردەم خەباتێ بۆ مافێن خۆ بكەین.»
