ڕێكا ڕەڤێ مرنە
بەشیرا دەروێش
د رۆژێن ب خەجخەجۆكان رە
من دلیست
تو ل كوبوو؟
رۆژێن من ب چڤیكان رە
ئاواز دگۆتن
ب دلەكی خەمگین
تو ل كوبوو
ئەز هەر دەم
ب تەنێ بووم
تە من تەنێ هشت
هەر بهۆستەك
ئاخا باژارێ ئەڤینێ
سەران سەرێ وێ
نەما و ئەز لێ نە گەڕیام
ل دو خەونێن مە
سۆزێن مە
چاڤەڕێ بووم
ب تەنێ
ژ بەدەنێ و شكەفتێن وێ
تا مێرگا هلكۆ
گاڤ ب گاڤ
من مووهرا خوە
ل دیوارێ ناڤبەرا
سەرخەت و بن خەتێ خستیە
تو ل كوبوو؟
تە ژ خوە نە دپرسی
تووركێ خەونان
ل پشتا تە بوو
تو ببوو رێوی
ل بەلەمان د شەڤێ تاری دە
ب هێڤیێن شكەستی
هێسرێ پەنابەریێ
ل بەندا تەبوون
تو ببوو مێڤانێ خوەنێن
شەڤێ منی درێژ
و بەرێ خوە
تە دا وەلاتێ قەشایێ
سار و سەقەما بەرفا
بێ داوی
چما
چما جارەكە دن
تە برینێ لاشێ من ڤەكرن؟
هێلینا ئەڤینێ خەراكر
و د تابووتەك هشك دە
بێ دەنگ، ل من زڤڕی
كانیێن سۆزێن تە
كانیێن سۆزێن كو
تە ب من رە دابوون
ما نە تو بوو
خوەدیێ سۆزێ هەڤالتیەك
بێ داوی؟
ما نە تو بوو
تە دگۆت كو ئەڤ وەلات
خەونێن مە چەمبەر دكە؟
ژ مە رە نابە وار
شەڕ
ترس
خزانی
لێ هێڤیێ من ئەو بوو
كو تو ڤەگەڕە
ل بوهارا باژاڕێ ئەڤینێ
دارەكێ بچینە
ل سەر بەدەنا پیرۆز
نە ژ مرنێ بڕەڤە
و مرن
مرن ب خوە
ل هێڤیا تە بوو
تە ژمن رە رێكر
ب لاشەكی زەر
سار
قەرسی نا لەبتی.
