ڕێژەیا كەسكاتیێ ل قەزا باتیفا زێدەبوویە
زاخۆ، دلۆڤان هالۆ:
قەزا باتیفا یا سەر ئیدارەیا سەربخوە یا زاخۆ ڤە دەڤەرەكا چیایی یە و ب سرۆشتێ خوە یێ جوان و پڕی گول و چیمەن و هەمەجۆرییا داروباران یا ناڤدارە، سەرەرای ڤێ چەندێ ژی باژێڕڤانیا قەزا باتیفا ب چاندنا چەندەها جۆرێن گول و گیا و داروباران ڕێژا كەسكاتیێ ل دەڤەرێ زێدە كرییە.
مەسعوود غانم، سەرۆكێ باژێڕڤانییا قەزا باتیفا بۆ ڕۆژناما ئەڤرۆ دیار كر، سرۆشتێ قەزا باتیفا ب خوە كەسكاتی لێ هەیە و پڕە ژ گول و گیا و داروباران و جیاوازە ژ دەڤەرێن دی یێن كو بەهرا پتریا ئەردێ وێ كۆنكریت، لێ سەرەڕای ڤێ چەندێ ژی ئەم بەردەوام پێكولان دكەین كو ڕێژا كەسكاتیێ ل قەزا باتیفا زێدە بكەین.
ئاماژە ب وێ چەندێ ژی كر، مە ل گەلەك جهان گول و گیا و داروبار چاندینە، هەر دیسان ژ بۆ مەرەما زێدەكرنا ڕێژا كەسكاتیێ ل دەڤەرێ چەندین پاركێن بچووك هاتینە چێكرن و وەلاتیێن دەڤەرێ ژی هاریكارن ژ بۆ زێدەكرنا ڕێژا كەسكاتیێ ژبەركو هەر مالەكێ د حەوشا خوە دا یان ژی ل بەر دەرگەهێ خانیێ خوە چەندین جۆرێن گول و گیا و داروباران چاندینە، ب ڤێ چەندێ د نوكە دا ڕێژا كەسكاتیێ ل قەزا باتیفا زێدەبوویە.
گۆت ژی:»ل داهاتی ژی د پلان دایە كو پاركەكا گشتی یا مەزن ل سەر ڕووبەرێ ١٣ هزار و ٥٠٠ مەترێن ئەردی ل قەزا باتیفا بهێتە دروستكرن، لێ هێشتا دەلیڤە چێنەبوویە كو بۆدجەكا باش بۆ ڤێ پاركێ بهێتە تەرخان كرن».
