ڕێڤەبەریا خوەسەر داخوازا هاریکاریێ ژ هەڤپەیمانیا نێڤدەولەتی دکەت
رێڤەبەریا خوەسەر یا رۆژئاڤایێ کوردستانێ راگەهاند، دەمەکە تورکیا ئێرشی هێزێن وان دکەت و هەتا نها گەلەک کەسان جانێ خوە ژ دەست داینە، لێ هەڤپەیمانیا نێڤدەولەتی یا شەرێ ل دژی داعشێ هەتا نها وەکو پێدڤی نەشیایە ب ئەرکێ خوە رابیت و دڤێت سنۆرەک بۆ ئێرشێن تورکیا بهێنتە دانان.
رێڤەبەریا خوەسەر یا رۆژئاڤایێ کوردستانێ د داخۆیانیەکێ دا رەخنە ل هەلوەستێ هەڤپەیمانیا نێڤدەولەتی یا شەڕێ ل دژی داعشێ گرت و راگەهاند، دەمەکە تورکیا بەردەوام ئێرشی هێزێن وان دکەت و د ئەنجاما ئێرشێن تورکیا دا هەتا نها گەلەک شەرڤان و بەرپرسێن هێزێن وان ل باکورێ سووریێ و رۆژئاڤایێ کوردستانێ جانێ خوە ژ دەست داینە و هەتا نها هێزێن هەڤپەیمانیا نێڤدەولەتی نەشیاینە سنۆرەکێ بۆ ئێرشێن تورکیا دانێن، ئەو یەک ژ نیشا ددەت کو وەلاتێن هەڤپەیمان وەکو هەڤپەیمان سەرەدەریێ ل گەل هێزێن سووریا دیموکرات و رێڤەبەریا خوەسەر ناکەن، چونکی ژ بەر ئێرشێن تورکیا دێ گەلەک ئاستەنگی ژی بۆ کارێ وان دروست بن.
رێڤەبەریا خوەسەر ئەو یەک ژی دیار کریە، ژ بەر ئێرشێن تورکیا ئەو دێ نەچار بن ئۆپەراسیۆنێن ل دژی داعشێ بدەنە راگرتن، دڤێت وەلاتێن هەڤپەیمان ب ئەرکێ خوە رابن و نەهێلن تورکیا بەردەوامیێ بدەتە ئێرشێن خوە، چونکی ئێرشێن تورکیا ل سەر دەڤەرێن جودا جودا یێن رۆژئاڤایێ کوردستانێ و باکورێ سووریێ دژوارتر بووینە و ئەو یەک ژی بوویە ئەگەر گەلەک کارێن وان بهێنە راگرتن.
د دووماهیا داخۆیانیێ دا ئەو یەک ژی هاتیە دیار کرن، دڤێت ئەمریکا و رۆسیا ژی رێ نەدەن تورکیا بەردەوام ئێرشی هێزێن وان بکەت، چونکی هەتا نها وەکو رێڤەبەریا خوەسەر و هێزێن سووریا دیموکرات چو مەترسیەکا بۆ تورکیا نەبوویە و دڤێت تورکیا ژی دەست ژ ئێرشێن خوە بەردەت.
ئەو یەک د دەمەکێ دایە کو د ڤان رۆژێن بۆری دا فرۆکێن بێ فرۆکەڤان یێن تورکیا ئێرشی چەندین دەڤەرێن جودا جودا یێن رۆژئاڤایێ کوردستانێ کرن و ل گۆر داخۆیانیا بەرپرسێن رۆژئاڤا د ئەنجاما ئێرشێن ڤێ دووماهیێ یێن تورکیا دا چەندین بەرپرسێن سیاسی جانێ خوە ژ دەست داینە و هەری دووماهیێ ژی چار شەرڤانێن وان بووینە قوربانی.
چاڤدێرێن سیاسی ژی دیار دکەن، ئەمریکا بەری نها رێ نەدا تورکیا دەست ب ئۆپەراسیۆنەکا نوو ل دژی رۆژئاڤایێ کوردستانێ بکەت، ژ بەر هندێ نها تورکیا ب رێیا فرۆکێن بێ فرۆکەڤان بەردەوام چاڤدێریا رۆژئاڤایێ کوردستانێ دکەت و ئێرشی هێزێن سووریا دیموکرات دکەت، چونکی تورکیا نەڤێت هێزێن سووریا دیموکرات ل رۆژئاڤایێ کوردستانێ خوە بهێز بکەن، تورکیا وان وەکو مەترسیەکا مەزن ل سەر ئاسایشا خوە دبینیت و تورکیا یا بەرهەڤە بۆ نەهێلانا رێڤەبەریا خوەسەر و هێزێن سووریا دیموکرات، هاریکاریا حوکمەتا سووریێ ژی بکەت.
