ژانێن شەڤەكا ڤەوەریای
نایف مەحمود
شەڤە و ئاسمانی
ل هنداڤی من
یا خوە ب ئەورێن خەما پێچای
دەنگێ برویسیان
پەڕێن خوە یێن شوڕكرینە
هناڤێن عەردی و
ڤولكانەك ژ ژانێن من یا پەقای!
ئەو چ ڤولكانە
هۆ ڤێ عەشقێ سینگێ من كێلای؟
كانیێن ڕۆندكان
ژ چاڤێن من دزێن
بۆ وێ وەغەرا تەیا دوور
بۆ وێ خیانەتا تە یا سۆر و سۆر..
ئەرێ هۆ نارینا من
ما كەڤران، عەڤران
هەستێن تە خوارینە؟
ئەڤە شەڤ ل من بوونە مەه و سال
ڕۆژ ل من تاریستانە،
من نینە بەخت وئیقبال..
چوونا تە و ڤێ دووراتیێ
برینێن من كوورتر لێ كرن
شەڤەكا ڤەوەریای
ژێ پەشی و
هیڤیێن من بەرەف
سەكەراتێ برن و بن گۆڕكرن..
چ شەڤە بوویە كابوس؟!
خەونێن من دگەل بای برن
ئەرێ شەڤە؟
تاریاتیێ پێلێن خوە یێن خاپینۆك
بەردانە سەر هیڤیێن من
ئەو هەستێن ژ ئاگرێ عەشقا تە كەلین
تەڤدا شێلان و ساركرن
چ دەردەكێ گرانە؟
هێش ل ژییێ گەنجاتیێ
پۆرا من سپی
مینا پیرەك حەفتێ سالی
هش و خەیالێن من برن
هند دوور برن
بەرەف بیابانێ كوچبەركرن
شینی و گری بوونە مێهڤان
گوینان ل دورێن من
كینێ ڕەشێ هلدای!
ئەمان، زەمان هەر نەهاتی!
تو ژی یا بوویە دروەك
سیتافكەكا باژێلە و
مەلەڤانا فندو فێلای!
