ژبه‌ر روودانه‌كا سه‌یر بایرن دێ هێته سزادان
ئه‌ڤرۆ،
ژ نشكه‌كێ ڤه كرێستیان دینگێرت دادڤانێ یاریا یانا بایرن میونخ و فرایبۆرگ یاری د خوله‌كا 85ێ راوه‌ستاند ئه‌وا ل شه‌مبیا بوری ژ چارچووڤێ هه‌ڤڕكیێن گه‌ڕا 28ێ یا خولا ئه‌لمانیا هاتیه كرن كو ب سه‌ركه‌فتنا بایرن میونخ ب چار گۆلان به‌رامبه‌ر گۆله‌كێ ب دووماهی هاتی، پشتی وێنه‌گرێن ڤه‌گۆهاستنا یاریێ دناڤ یاریگه‌هێ دا به‌رێ كامیرا خوه دایه یاریزانێن بایرنێ كو ژ هژمارا یاسایی زێده‌تر بوون ئه‌وا 12 یاریزان دناڤ یاریگه‌هێ دا دهاتنه دیتن و دووڤدا پشتی 17 چڕكان دادڤانێن هاریكار ئاگه‌هداربووین.
لدووڤ سایتێ گۆل یێ جیهانی كو ئه‌ڤ روودانه‌په‌یدابوو ده‌مێ یانا باڤاریا دو پێكهۆر ئه‌وژی كینگسلی كۆمان و كورنتین تۆلیسۆ ل شوونا وان مارسێل سابیتسر و نیكولاس سۆلی بهێنه دناڤ یاریگه‌هێ دا، لێ سابیتسر چوو ناڤا یاریگه‌هێ و كۆمان ده‌ر نه‌كه‌فت ژبه‌ركو ژمارا وی 11 د تابلۆیێ گوهۆڕینێ دا دیار نه‌بوو و ل شوونا وێ ژماره 29 دیاربوو كو چو یاریزانا ل به‌ر خوه نه‌كربوو، دیسان پشتی سۆلی ل شوونا تۆلیسۆ هاتیه گوهۆڕین بوونه 12 یاریزان، دادڤانێن یاریێ ڤه‌گه‌ڕیان بوو ئامیرێ ڤارێ كر و دیاربوو بایرن میونخ ب 12 یاریزانا و ب چه‌ندین چڕكان یاری دكر.
رۆژناما بێلد یا ئه‌لمانی دیاركر لدووڤ یاسا ئێكه‌تیا ته‌پا پێی یا ئه‌لمانی ئه‌و یانا ڤان جوره خه‌له‌تیا بكه‌ت دێ هێته هژمارتن خوساره‌ت ب سێ گۆلان بێ به‌رامبه‌ر، لێ دبیت راپۆرتا دادڤانێ یاریێ یانا بایرن میونخێ ژ ڤێ سزایێ قورتالبكه‌ت .
