ژبه‌ر نه‌بوونا كه‌نالان كچێن ئاكرێ په‌نایێ بۆ كه‌نالێن ده‌ڤه‌رێن دی دبه‌ن
دهۆك، نه‌وزاد هلۆری:
جیهان حه‌جی، ئێك ژ وان میدیاكارێن كچه كو د ده‌مه‌كێ كورت دا شیایی شوون تبلێن خوه ل ده‌ڤه‌را ئاكرێ ببینیت و خه‌لكه‌ك حه‌ز ژكارێ وێ بكه‌ت، د دیداره‌كێ دا بۆ رۆژناما ئه‌ڤرۆ دا دیاركر كو وێ ب حه‌ز و ئاره‌زو ده‌ستپێكریه و هه‌تا نوكه قوناغێن باش برینه.
زێده‌تر گۆت: هه‌ر چه‌نده وارێ من تێدا خواندنی نه راگه‌هاندنه، به‌لێ هه‌ر ژ زارۆكینی من حه‌زا كارێ راگه‌هاندنێ هه‌بوویه، ل ده‌ستپێكا سالا 2019 وه‌كو میدیاكار ل ئێكه‌تیا ئافره‌تان ده‌ستبكار بووم، هه‌ر چه‌نده من چوو ئه‌زموون ژی نه‌بوون، به‌لێ ب هه‌ول و بزاڤێن به‌رده‌وام و پرسیاركرن ژ هه‌ڤالان شیام شاره‌زایه‌كا باش وه‌ربگرم و خوه دناڤ راگه‌هاندنێ دا ببینم، نوكه من به‌رنامه‌یه‌ك ل رادیۆیا ئاكرێ هه‌یه و ئه‌ڤه سێ ساله یا به‌رده‌وامم.
جیهان، كو ل سالا 1996 ژ دایكبوویه و ده‌رچوویا په‌یمانگه‌هێ یه و هێشتا ژیانا هه‌ڤژینیێ پێك نه‌ئینایه دیاركر ژی كو هه‌ر كه‌سه‌كێ كار بكه‌ت بێگومان دێ تووشی چه‌ند به‌رهنگاری و ئاسته‌نگان بیت و ئه‌ز دخوازم ل كه‌ناله‌كێ پێشكه‌فتی ببمه بێژه‌ر، بێگومان راگه‌هاندن كاره‌كێ كاریگه‌ره و شاره‌زایی و ژێهاتن بۆ دڤێت، جهێ داخێ یه نه‌بوونا كه‌نالان ل ئاكرێ بوویه ئه‌گه‌ر كو كێم كچ دیاربن و پتر ل كه‌نالێن ده‌رڤه‌یێ ئاكرێ كار دكه‌ن، داخوازێ ل هه‌موو دایك و بابان دكه‌م هه‌كه كچێن وان حه‌ز و ئاره‌زویه‌ك هه‌بیت بلا پشته‌ڤانیا وان بكه‌ن ژبه‌ركو پاشه‌رۆژه‌كا گه‌ش ل هیڤا وان هه‌یه.
