ژبه‌ر نه‌بوونا پشته‌ڤانیێ یاریزانێن بلیاردا پارێزگه‌هێ بێ به‌هربوون
د داخویانیه‌كێ دا جێگرێ سه‌رۆكێ فیدراسیۆنا بلیارد و سنۆكه‌رێ ل پارێزگه‌ها دهۆكێ بۆ رۆژنامه‌یا ئه‌ڤرۆ دیار كر ژبه‌ر نه‌بوونا پشته‌ڤانیێ ژ چو لایه‌نان ب مخابنی ڤه یاریزانێن وان بێ به‌هر بوون ژ هه‌ڤڕكییا ناسناڤێ قاره‌مانییا ئیراقێ ئه‌وا دوهی هه‌ڤڕكیێن وێ ب پشكدارییا 270 یاریزانان ژ 52 یانه‌یێن هه‌رێمێ و ئیراقێ ل باژێرێ به‌غدا ب دووماهی هاتین.
زێده‌تر ئه‌حمه‌د سه‌لاح گۆت: قاره‌مانییا ئیراقێ دهاته هژمارتن ئێك ژ مه‌زنترین خرڤه‌بوونێن باشترین یاریزانان و پێنگاڤا ئێكێ یا ژێگرتنا وان بۆ ناڤ رێزێن هه‌لبژارتیێ ئیراقێ دا، د ده‌مه‌كی دا هه‌تا چار یاریزانێن مه به‌رهه‌ڤی دكرن و بزاڤ دكرن ب ناڤێ یانه‌كێ پشكداری قاره‌مانیێ بن، لێ مخابن چو لایه‌نان به‌رهه‌ڤییا خوه بۆ پشته‌ڤانیێ دیار نه‌كر سه‌رباری داخوازییا مه كری كو ژبۆ پشته‌ڤانییا كورێن باژێری نه، ئه‌ڤچه‌نده ژی بوو ئه‌گه‌ر ئه‌و هیڤیێن مه‌زن ژ ده‌ستبده‌ن سه‌رباری ئه‌وان به‌رهه‌ڤیێن هه‌یڤانه یاریزانێن مه ئه‌نجامداین و چاڤه‌ڕێ قاره‌مانیه‌كا بڤی ره‌نگی بوون.
ژلایه‌كێ دووڤه ناڤهاتی گۆت: یارییا بلیارد و سنۆكه‌رێ ل پارێزگه‌ها دهۆكێ به‌ر ب پێشڤه‌چوونێ د چیت و یاریزانێن خودان شیان دهێنه دیتن، هه‌بوونا هۆلێن وه‌رزشی ل باژێر و قه‌زایێن پارێزگه‌هێ ئێك ژ ئه‌گه‌رانه، لێ هه‌كه قاره‌مانی نه‌بن پشكداریێ بكه‌ن ئه‌ڤ یاریزانه دێ چه‌وا شێت ئاستێ خوه پێشئێخیت و هیڤیێن خوه گه‌شكه‌ت بۆ ده‌ستڤه‌ئینانا ناسناڤ، هیڤییا مه ئه‌وه جهێن په‌یوه‌ندیدار پشته‌ڤان بن و نه‌هێلین ئه‌ڤ یارییه لاواز بیت بۆ زانین چو مه‌زاختیێ مه‌زن ژی بۆ ناچیت هه‌تا بشێن مه شیانێن پشته‌ڤانییا دارایی نینن، یا گرنگ بۆ مه پێشئێخستنا وه‌رزشا پارێزگه‌هێ یه و بلندكرنا ئاستێ كوڕێن دهۆكێ نه.
