ژبه‌ر هرچێ وه‌لاتیێن به‌رێ گارێ بڤى ره‌نگى مێشا خودان دكه‌ن

ئه‌ڤرۆ نیوز، نه‌وزاد هلۆرى:

به‌شه‌ك ژ وه‌لاتیێن ده‌ڤه‌را به‌رێ گارێ یا سه‌ر ب قه‌زا ئامێدیێ بو ده‌ستكه‌فتنا هنگڤینه‌كێ خومالى و ئه‌سلى قه‌ستا زوزانێن ده‌ڤه‌رێ كریه‌ به‌لێ ژبه‌ر ترسا هرشێ و فروكێن توركیا مێشێن خوه‌ برینه‌ سه‌ر داران.

دڤى واریدا” ئه‌ڤراز زێبارى ” ل گوندێ گه‌له‌كا بو ئه‌ڤرۆ نیوز گۆت: (مه‌ وه‌كو خه‌لكێ گوندێ گه‌له‌كا و هنده‌ك ژ خه‌لكێ دن یێ ده‌ڤه‌رێ ب مه‌ره‌ما درۆستكرنا هنگڤینێ خومالى و ئه‌سلى مه‌ مێشێن خوه‌ برینه‌ ده‌ڤه‌را به‌رێ گارێ و دناڤ سرۆشت و زوزانێن وێ به‌لێ ژبه‌ر هرچان مه‌ مێشێن خوه‌ برینه‌ سه‌ر داران و جهێن تایبه‌ت بو درۆستكرینه‌ و هه‌ر ب تنێ ل گوندێ مه‌ نێزیكێ 500 سه‌رێن مێشان و سندوقێن وان هه‌نه‌)

زێده‌تر گۆت: (سه‌ره‌راى كو ل ده‌ڤه‌را به‌رێ گارێ هرچ هه‌نه‌ و مه‌ترسى بو سه‌ر مێش و ره‌ز و بیستانێن وه‌لاتیان درۆستكریه‌ د هه‌مان ده‌م دا هنده‌ك هرچ ژى ل ژینگه‌ها ده‌ڤه‌رێ به‌رداینه‌ و ڤێ یه‌كێ زێده‌تر مه‌ترسى بو سه‌ر مێش و ره‌ز و بیستانێن مه‌ درۆستكریه‌) ئه‌وى وه‌لاتى د درێژاهیا ئاخفتنێن خودا دیاركر ژى كو ژبلى هرچان دهه‌مان ده‌م دا فروكێن توركیا و بوردومانێن وان ژى مه‌ترسى بو سه‌ر مێشێن وان درۆستكریه‌ و زێده‌تر گۆت: (بوردومانا فروكه‌ و توبپخانه‌یێن سوپایێ توركیا مه‌ترسى لسه‌ر سوتنا ژینگه‌ها سرۆشتى یا ده‌ڤه‌رێ و پوش و پاوانى درۆستكریه‌ ، و ئه‌ڤ یك ژى ب پله‌ ئێك مه‌ترسیا سوتنا دارستان و ئاگربه‌ربوونا ده‌ڤه‌رێ درۆستكریه‌ ژبه‌رڤان هه‌ردوو ئه‌گه‌را نه‌چارین كو مێشێن خوه‌ لسه‌ر داران ب خودان بكه‌ین و ئه‌ڤێ یه‌كێ بارێ مه‌ گران كریه‌ ژبه‌ركو ئه‌م نكارین هه‌موو ده‌ما بچنه‌ سه‌ر دارا و سه‌خبێریا مێشێن خوه‌ بكه‌ین)

ل ده‌ڤه‌را به‌رێ گارێ نێزیكێ 28 گوندان هه‌نه‌ و به‌رێ گارێ ژى ناسیاره‌ ب خودانكرنا مێش و چاندنێ و بڤێ یه‌كێ به‌شه‌ك ژ وه‌لاتیێن ده‌ڤه‌رێ داهاته‌كێ بو خێزانێن خوه‌ په‌یدا دكه‌ن.

کۆمێنتا تە