ژبهر پێكڤهژیانا ل كوردستانێ، جیهان رێزێ ل كوردان دگریت
پێكڤهژیان ئێكه ژ وان چهمكێن كو ل دهستپێكا مروڤایهتی بهحس ژێ دهێته كرن و گرنگی پێ هاتیه دان و پرانیا ئاینێن جودا جودا ب گرنگی ڤه سهحدكهنه چهمكێ پێكڤهژیانێ، د ئاینێ ئیسلام و مهسیحی و ئێزدی و كاكهییان دا ب گرنگی ڤه بهحسێ پێكڤهژیانێ هاتیه كرن و د كهڤندا پهیرهوێن ڤان ئاینان پێكڤه ژیاینه و مێژوویا كوردستانێ وێ یهكێ دووپات دكهت كو پێكهاتێن كوردستانێ كێشه و ئاریشێن خوه ب ئاشتیانه چارهكرینه و نههێلاینه پێكڤهژیانا ل ههرێمێ تێكبچیت و نموونهژی مزگهفت و دێر ل ئێك گوند ههبووینه و ههر ئێكێ پهیرهوێ ئاینێ خوه كریه و جهژن و سهرسالێن و رێورهسمێن خوه ئهنجامداینه.
تێد رۆبێرت گۆر، د پهرتووكا بۆچی مروڤ یاخی دبیت؟ “WHY MEN REBEL” رژدی ل وێ چهندێ كریه كو فرهئاین و ئاینزانی و نهتهوهیی خهسلهتێ پرانیا كومهلگههانه، كومهلگههێ كوردی ژی ئێك ژ وان كۆمهلگههانه كو پێكهاتێن جودا جودا تێدا دژین، سهركردێن كوردستانێ ههمی بزاڤ كرینه پێكڤهژیانا ل ههرێما كوردستانێ تێكنهچیت، ههتا ئهگهر دوژمنی خیانهت و كوشتار بهرامبهر ڤان پێكهاتان ئهنجام دابیت ژی، دووماهی نموونه ژی، مهسعود بارزانی سهرۆكێ ههرێما كوردستانێ ل دووماهی گوتارا خوهدا بۆ وێ خیانهتا عهرهبان ل كوردێن ئێزدی ل خهلكێ شنگالێ كرین، ل 3/8/2015 ل دهۆكێ گوته كوردێن ئێزدی” ئهز هیڤیێ ژ ههوه دكهم و هشیاربن پشتی رزگاركرنا شنگالێ پهنایێ نهبهنه بهر تولڤهكرنی، یێن غهدر ل ههوه كری دێ ب رێكێن قانوونی گههنه سزایێن خوه و بهردهوام ئهم ل گهل هندێ بووینه كو ب بهرپرسیارانه تولا خوه ڤهكهین ژبهر كو ئهڤهیه رهوشتێ كوردان”.
نموونا پێكڤهژیانا ل ههرێما كوردستانێ ههی، روویهكێ جوان ل سهر ئاستێ جیهانێ دایه دیاركرن و ئهو رێزا ل كوردان دهێته گرتن ژ بهر ڤێ پێكڤهژیانا ل كوردستانێ یه، كو ئهم دبینین سهرۆكێن جودا جودا یێن ئهمریكا بهردهوام پێشوازی ل سهكردێن كوردان كرینه و ل ڤێ دووماهیێ ئهمریكا و ئوروپا نههێلان داعش بگههته كوردستانێ و ئاسایش و پێكڤهژیانا ل كوردستانێ تێكبچیت.
ل ڤێ دووماهیێ سهرهرای قهیرانا ئابووری یا دژوار یا ههرێم ڤهگرتی، ههرێما كوردستانێ پتر ژ ملیون ئاواره ههمبێز كرن و دهستپێكا ئاوارهبوونێ، خهلكێ كوردستانێ ههمی رهنگێن هاریكاریان پێشكێش كرن و گهلهك جاران ل ڤێ دووماهیێ ب تایبهت ل ههولێرێ بهحسێ ههوێن دهركرنا عهرهبان دهێته كرن ژ ئالیێ هندهك لایهنان ژ بهر كو رژێما بهعس و عهرهبان كورد ئهنفالكرینه، بهلێ سهركردایهتیا سیاسی یا كوردی ئهڤ چهنده رهتكریه و نههێلایه كهسێن ل پشت تێكدانا ڤێ پێكڤهژیانێ مهرامێن وان سهربگرن و نوكه ب هزارههان خێزانێن عهرهب بێ گرفت ل گهل كوردان ل باژێركێن كوردستانێ دژیت كو ئهڤ چهندهژی بۆ قهبوولكرنا خهلكێ كوردستانێ بۆ پێكڤهژیانێ دزڤریت.
لهومان ل دووماهیێ دێ بێژم دڤێت ههر بزاڤهكا بهێته كرن بۆ بهرتهنگگرنا پێكڤهژیان و پشكداریا كومهلایهتی، رێ لێ بهێته گرتن ژبهر كو دێ كارتێكرنێن خراب كهته سهر ئهزموونا حوكمرانیا ههرێما كوردستانێ و زیانێ گههینیته نێرینا و دونیابینیا كوردان سهبارهت ب پێكهاتێن جودا جودا یێن كوردستانێ و ئهو ههولا ژ ئالیێ هندهك پهرلهمانتاران ڤه هاتیه هاڤێتن ل ڤێ دووماهیێ كو كوتایێن پێكهاتان ل پهرلهمانێ كوردستانێ ژ 11 كورسیان كێم بكهن ئێك ژ وان بزاڤان بوو كو باشبوو ل دووماهیێ ب هیمهتا خهمخورێن پێكڤهژیانێ و ئاشتیێ نههێلان ئهو بزاڤ سهربگریت.