ژبه‌ر گۆتنا سترانێن سیاسی دو جاران هاتیه زیندانكرن
دهۆك، شاكر ئه‌تروشی:
سترانبێژ (ئیبراهیم سالح) به‌رنیاس ب ئیبراهیم كۆچه‌ر، د دیداره‌كێ دا بۆ رۆژناما ئه‌ڤرۆ دیاركر كو ئه‌ڤه ده‌مه‌كه ئه‌و یێ به‌رهه‌ڤیێن خوه دكه‌ت بۆ تۆماركرنا ئه‌لبۆمه‌كا سترانان، لێ ل ده‌ستپێكێ بتنێ دێ چار سترانان تۆماركه‌ت، چونكو هه‌تا نوكه چ سپۆنسه‌ر په‌یدا نه‌كرینه.
ناڤهاتی گۆت: نوكه من تێرا ئه‌لبۆمه‌كێ و پتر ژی ستران یێن هه‌ین، لێ ژبه‌ركو پشته‌ڤانی نینه و سپۆنسه‌ر ژی مه په‌یدا نه‌كرینه، له‌ورا ل نێزیك بتنێ دێ چار سترانان تۆماركه‌م، ئێك فۆلكلۆرێ یێن دی ژی ژ په‌یڤێن (خالد عه‌لی سلێڤانه‌یی و جه‌لال كۆچه‌ر) ن، ئاواز ژی یێن من بخونه، من دڤێت جاره‌كا دی بهێز بهێمه دناڤ هونه‌ری دا، له‌ورا دێ هه‌موو شیانێن خوه مه‌زێخم كو سترانێن من دباشن و دێ كلیپ ژی كه‌م.
ئیبراهیم سالح، ژدایكبوویێ سالا (1970) یه، خه‌لكێ قه‌زا سێمێلێ یه، ل ناڤه‌راستا سالێن هه‌شتێیان ده‌ست ب سترانگۆتنێ كریه، ل گه‌ل هونه‌رمه‌ندان (ته‌حسین تاها و حه‌سه‌ن شه‌ریف و محه‌مه‌د تاها ئاكره‌یی) پشكداری دگه‌ل ئاهه‌نگان دا كریه، هه‌روه‌سا سازێ ژی دژه‌نیت، بۆ ده‌مه‌كی كار دگه‌ل تیپا روباد یا هونه‌ری كریه و ژبه‌ر گۆتنا سترانێن سیاسی دو جاران ژ ژلایێ رژێما ژناڤچۆی ڤه هاتیه زیندانكرن.
