ژبه‌ر گۆتنا سترانێن كوردی هاتیه زیندانكرن
دهۆك، زنار تۆڤی:
سترانبێژ فورات مه‌د، كو خه‌لكێ باژێرێ ئامه‌دێ یه ل باكۆرێ كوردستانێ، د دیداره‌كێ دا بۆ رۆژناما ئه‌ڤرۆ دیاركر كو دژیه‌كێ بچووك دا وی ستران گۆتینه و ل سالا 2013 ب ره‌نگه‌كێ پرۆفێشنال ستران گۆتینه و ل هه‌مان سال ئه‌لبۆما خوه یا ئێكێ ب نا ڤێ (سپی)كو ژ یازده سترانان پێك دهات به‌لاڤكریه، و ئه‌لبۆما دویێ ب ناڤێ (خه‌یال) كو ژ هه‌شت سترانان پێك دهات، ل سالا 2020 به‌لاڤكریه و هه‌تا نوكه پتری ده‌ه كلیپان ژی چێكرینه، هه‌موو په‌یڤ و ئاوازێن وان سترانان یێن وی ب خوه‌نه.
ناڤهاتی گۆت: ژ به‌ر گۆتنا سترانێن كوردی ئه‌ز هاتیمه زیندانكرن و د زیندانێ دا من سترانه‌ك ب ناڤێ زیندان گۆتییه، هه‌روه‌سا نوكه ئه‌ز مژوولی تۆماركرنا ئه‌لبۆمه‌كا نوومه ب ناڤێ (فه‌قی) و من بۆ هه‌لبه‌ستڤانێ كورد فه‌قیێ ته‌یران كریه، چنكو چار سترانێن وی د ئه‌لبۆما من دا هه‌نه، ئه‌و ئه‌لبۆم ژی ژ هه‌شت سترانان پێك دهێت، هه‌روه‌سا دێ چار سترانان ژێ كلیپ كه‌م، بۆ زانین پرانیا سترانێن من شۆره‌شگێری نه، و نوكه ب ره‌نگه‌كێ گشتی سانسۆر ل سه‌ر زمانێ كوردی هه‌یه و ڤێ چه‌ندێ كاریگه‌ری ل سه‌ر هونه‌رێ كوردی ژی كریه، لێ كارتێكرنا ستران و هونه‌رێ توركی ل سه‌ر یێ كوردی نینه وه‌كو به‌ری نوكه، ئه‌م ب هونه‌رێ خوه خزمه‌تا زمان و كلتۆرێ خوه دكه‌ین، مه زمانه‌كێ ده‌وله‌مه‌ند هه‌یه، ئه‌ز حه‌ز دكه‌م كاره‌كێ هونه‌ری ل بهه‌رێما كوردستانێ ئه‌نجام بده‌م، چنكو چاڤێ مه هه‌موو كوردان ل باشۆرێ كوردستانێ یه و ئه‌و جهێ ناساندنا مه كوردانه ل هه‌موو جیهانێ، دیسان ئه‌م ستران و به‌رهه‌مێن خوه ب رێیا سۆشیال میدیایێ به‌لاڤ دكه‌ین.
