ژبۆ من نڤیساندن هەزكرنە و كارێ منێ راگەهاندنێ ژ نەچاریێ یە
هەڤپەیڤین:
دەمهات دێركی
نڤیسكار و پەیامنێرا كورد «سەڤدا كاپلان» ل ناڤچەیا ئەرخەنییا ب سەر باژارێ ئامەدێ ل باكورێ كوردستانێ هاتیە دنیایێ. خوەندنا خوە ل زانینگەها دژلە بەشێ وەرزشێ ب داوی كریە. ژ سالا ١٩٩٣ ئان ڤە د ناڤا بوارێ راگەهاندنێ دە كار دكت. ل جان رادیۆ، ل كەنالا جان تیڤی و كانالا ٢١ وەكو كارێ بێژەریێ كریە. هەر وەها دەمەكێ وەكو نووچەگەهانی د رۆژنامەیا دیاربەكر هابەر دە كار كریە. ل سالا ٢٠٠٢ ئان دە كارێ دەنگدانا نووچەیان ل تەرەتێ گاپ تیڤی كر و ل سالێن ٢٠١٠ و ٢٠١٤ ئان ل دونیا تیڤی بەرنامەیێن چاند و هونەری پێشكێش كر. د هەمان سالان دە گەلەك نڤیسێن وێ ب زمانێ كوردی د مالپەران دە هاتن بەلاڤ كرن. د ناڤبەرا سالێن ٢٠١٤ و ٢٠١٧ ئان دە ل كانالا نرت كارێ پەیامنێریێ كر. ل دۆرا ٢٨ سالانە كارێ راگەهاندنێ دكت. هەتا ئیرۆ ژی نڤیسكار و پەیامنێرا كورد «سەڤدا كاپلان» وەكو نووچەگەهان و قونجكنڤیس د رۆژنامەیا یەنیگونا ئامەدێ دە كار دكت و د هەمان دەمێ دە نوونەرا نڤیسنگەها كوردستان تیڤی یە و كارێ پەیامنێریێ ژی دكت. هەتا ئیرۆ دو پرتووكێن» سەڤدا كاپلان» ب زمانێ كوردی چاپ بوونە. یەك ب ناڤێ ژن و ژیانێیە، ئەڤ پرتووك لێكۆلین و فلۆكلۆریكە.یا دویێ ژی ب ناڤێ دینۆ رۆمانچە نڤیسی و چاپكر.
ئەڤرۆ: برێز سەڤدا كاپلان، تە زانینگەه بەشێ وەرزشێ ب داوی كر، لێ ئەڤ دۆرا ٢٨ سالانە د ناڤا كارێ راگەهاندنێ دەیی، چما نە كارێ وەرزشێ لێ كارێ راگەهاندنێ، گەلۆ سەدەم چ نە؟
بەرسڤ:
بەریا كو ئەز بچم زانینگەهێ من دەست ب كارێ راگەهاندنێ د رادیۆیەكە خوەجهی دە كربوو. پشتی وێ ئەز دەرباسی كەنالەكی تەلەڤیزیۆنێ بووم. ب سالا من بێژەرتییا بەرنامە و نووچەیان كر. كارێ راگەهاندنێ وەكە نەخوەشیەكێیە، جارەكێ مرۆڤ پێ بكەڤە نكارە خوە ژێ خلاس بكە. د دەما من كارێ بێژەریێ دكر، د هەمان دەمێ دە من زانینگەه ب داوی كر. د دەما خوەندنا بەشا وەرزشێ دە ژی من دەڤ ژ كارێ تەلەڤیزیۆنێ بەرنەدا. ب رۆژ دچووم زانینگەهێ، ئێڤارا ژی دهاتم كەنالێ و من بەرنامە پێشكێش دكر. كارێ من ب ڤی ئاوایی چار سالا ئاژۆت، پاشێ بووم مامۆستەیێ وەرزشێ ل دبستانان، ڤێجارێ ژی ئەز ب رۆژ دچووم دبستانێ و ئێڤارێ دهاتم كەنالێ من نووچە پێشكێش دكرن. نە راگەهاندن نە من دەڤژ وێ بەرنەدا. ب راستی وەكە سەهرەكێیە. مرۆڤ ب سەهرا وێ پێ بكەڤە، ژیانا تە پێ رە دمەشە.
ئەڤرۆ: تو چاوا كارێ كارێ راگەهاندنێ ویێ نڤیسكاریێ ب هەڤ گرێ ددی، گەلۆ ل گۆر تە هەر دو جیهان نێزیكی هەڤن؟
بەرسڤ:
بەلێ نێزیكێ هەڤدونە. ژ بەر كو راگەهاندن ژی بەشەك خوە نڤیساندنە. من د گەل كارێ مامۆستاتی و بێژەریێ، د رۆژنامەیەكێ دە ژی دنڤیساند. جار جاران من گۆتار د مالپەر و رۆژنەمەیان دە دنڤیساند. نڤیسێن من دهاتن وەشاندن. ئەو شیانێن نڤیساندنێ ژ ور ب من رە چێ بوو. نیڤیساندنا گۆتاران، ب خوە رە نڤیسكاری ژی ئانی. ژ خوە د قۆنجكێن رۆژنەمەیان دە ناڤێ من ژ بەر خوە ڤە بوو قۆنجكنڤیسكار. هاتووباتا منا نڤیسكاریێ ژی ب گۆتارێن قۆنجكێن رۆژنەمەیان دەست پێ كربوو. دەستپێكا رۆژنامەگەریا نڤسی نڤیساندنە ژبۆ وێ مرۆڤ نكارە ژ هەڤدو جودا بكە.
ئەڤرۆ: ل وەلاتێن ئەورۆپا و هندەك وەلاتێن دن كارێ پرۆفەسیۆنەلی هەیە و هەر كەسەك ب كارەكی تەنێ ڤە مژوولە، وەكە رۆژنامەڤان تەنێ كارێ خوە دكە، نڤیسكار تەنێ كارێ خوە دكە، لێ ل جەم مە كوردان هەموویی ب هەڤ رە دكن، گەلۆ چما؟
بەرسڤ:
گەلەك سەدەمێن وێ هەنە.یا یەكەم دناڤا مە دە كەسێن خوەندا بەرێ كێم بوون. هەمان دەمێ دە، ژبۆ باكورێ كوردستانێ دبێژم، خوەندن و نڤیساندنا ب زمانێ كوردی قەت نەبوو. هەگەر یەكی- یەكێ كو بزانبا ب كوردی بخوینە و بنڤسینە، دڤێ دو ئان سێ كار ب هەڤدورە بكرانە. ژبەر كو پێدڤی ب مرۆڤێن وسا هەبوون. نها نفشێن نوو دو ئان سێ كاران ب هەڤدورە ناكن. یەك كاری دكن. لێ مەزنێن مە ژ ڤی ئالی ڤە بێ سوود بوون. ژبۆ زانینێن خوە دەرباسی نفشێن نوو بكرانا، ئەركەكی وان هەبوو. من ژی خوە ژ ڤێ بەرپرس دیت. ژنێن كو دنڤسینن ژی كێمن. ب تایبەت د ناڤا جڤاتا مە دە. ل گەل مە، مەبەستا من باكوورێ كوردستانێیە، ژن ،كەچێن نفشێن نوو، خوەدی ل زمانێن خوە دەرناكەڤن، ب تركی دخوینن و دنڤسینن و دئاخڤن. دەولەتەك مرۆڤی نەبە، سازیێن مرۆڤی نەبە، دبستانێن مرۆڤی نەبە ، بارێ هەر كەسەك كورد زێدەیە..
ئەڤرۆ: باشە، تو بێهتر خوە نێزیكی كیژان كاری دبینی، راگەهاندن یان نڤیسكاری و ئەگەرێن خوە چ نە، یان هەر دو كار ژبۆ تە ئاسایینە؟
بەرسڤ:
ئەز خوە پتر نێزیكی كارێ راگەهاندنێ دبینم. ژبەر كو ئەز دراڤێ خوە ژ ور بدەست دخم. ئەز نەچارم خوە خوەدی بكم. هەزكرنا منا كارێ راگەهاندنێ وەكە بوویە تشتەكی ئاسایی. نەخوەشی، ،ئاگاهی دایین، گرتن ژ بۆ من بوویە وەكە نەچاریێ. هەلبەت نڤیسكاری ژی ژبۆ من گەلەك گرینگە. لێ ژ بۆ من نڤیساندن وەكە هەزكرنەكە. هەزكرنا زمانێ كوردیە، بەرهەمێن كوردی نە، دیرۆكە، هەبوونە.
ئەڤرۆ: ژ كەرەما خوە گەر زەهمەت نەبە، تو دكارە بەهسا زەهمەتی و ئاستەنگیێن ل پێشیا كارێن تە دەردكەڤن بكی؟
بەرسڤ:
ل باكورێ كوردستانێ كارێ راگەهاندنا ب زمانێ كوردی ب سەرێ خوە ئاستەنگیان دەردخینە. ژبەر كو كوردێن باكور د گەل تركان رە دژین، دەستهەلاتدار تركن. تركی نەچاریە، كوردی ب سالا قەدەخە بوو. راگەهاندنا كوردی نەبوو. ڤان سالێن داویێ دە، سەربەست بوویە، لێ دیسا ژی د بن چاڤدێریا دەولەتا تركیێ دە كارێ خوە دكی. ئەڤ ژی جار جاران دبە ئاستەنگ. زەهمەتیا وێ ئەوە كو تو ژ بەر ناسنامە و زمانێ خوە نكاری خوە ب رەهەتی بگەهینی زانیاریان ب تایبەت ژ دەزگەهێن فەرمی نكاری ئاگاهی بستنی، ب زۆر و زەهمەتی دگەهیژن. د هەمان دەمێ دە، ژ ئالیێ پۆلیسێن ئەولەهیێ ڤە ژ بەر دەزگەها خوە زەهمەتی دبینم. لێ من چ جار خوە ئاجز نەكر، ئەز سەدەمان زانم، هەول ددم كو كارێ خوە ب راست و دورست بكم. ژ بەر كو پێدڤی ب مرۆڤێن وەكە من هەنە. ئەز خوە وەكە كەسەك بەشەك پێشمەرگە، و شەرڤانێ وەلاتێ خوە دبینم. ژبەر كو تێدكۆشم. ل گەل ڤان ناسناما منا رەگەزی ژی ل قادان دبە پرسگێركەك. ل گەل زلامان كار كرن ژی زەهمەتە. پێیامنێریا ل قادان هێزبوونەك ددە سایكۆلۆژییا مرۆڤ. ئەز خوە پتر ب هێز هەست دكم. ژ هەر كەسی پتر دڤێ هەول بدم. ژ ئالیێ دن ڤە، د چاڤێ خوەدیێ دەزگەهاندە ژی ژن وەكە دیكۆرن. شكێناندنا ڤێ زهنیەتە ژی زەهمەتی دەردخینە پێشیا مرۆڤان.
ئەڤرۆ: هەتا ئیرۆ دو بەرهەمێن تە چاپ بوونە، گەلۆ بەرنامە و پلانا تەیا ژبۆ پاشەرۆژێ د وارێ نڤیساندنێ دە چ نە؟
بەرسڤ:
هەری داوی من رۆمانچەیا ب ناڤێ دینۆ نڤیساندبوو، ڤێگا ئەز رۆمانچەیەك وەكە بەردەوامیا دینۆ ڤەجا دینێ دنڤسینم. هێڤی دكم سالا بێ ئەز تەمام بكم و بدم چاپێ. هندەك سووپریزێن دن ژی هەنە. ئەزێ هەر د نڤیساندنێ دە بەردەوام بم.
ئەڤرۆ: گۆتنا داوی؟
بەرسڤ: گەلەك سپاس ژ بۆ تە و ژ بۆ كارمەندێن هەمی بەشێن راگەهاندنێ. سپاس ژ بۆ خوەندەڤانێن وە، سلاڤ و رێز.
