ژبەر ئەرزانیا بهایێ (بامیا) جۆتیار داخوازا قەرەبوویێ دكەن
سندس سالح سلێڤانەیی
پتریا جۆتیارێن ئەڤ سالە (بامی) چاندین گازندان ژ وێ چەندێ دكەن كو ئەڤ سالە بەرهەمێ وان گەلەك ب ئەرزانی دهێتە فرۆتن و پارێ كڕینا گازوایل و تۆڤێ وان دەرناكەڤیت و دخوازن حكومەت وەك پشتەڤانی ب بهایەكێ ئەرزان وان كەرەستەیان بۆ دابین بكەن.
سەدیق هلۆری، جۆتیارەكێ گوندێ هلۆرێ یە، بۆ رۆژناما ئەڤرۆ دبێژیت: ئەڤ سالە ژی وەكو هەموو سالێن بۆری مە هژمارەكا جۆرێن بامیا چاندن و سوپاس بۆ خودێ بەرهەمەكێ باش بوو، لێ ئاریشە ئەو بوو هەر ل دەستپێكا چنینێ كیلۆ ب هزار دیناران ژمە دهاتە كڕین و ئەڤە ژی پارەیەكێ كێمە، چنكو ئەم گازوایل و كیمیایێ و تۆڤی ب گرانی دكرین، هەروەسا پالا دگرین، ب تایبەت ل دەمێ چنینێ، هەلبەت هزارەك ژی گەلەك كێمە و بەر زەحمەتا مە ناكەڤیت، لەورا پێدڤیە حكومەت پشتەڤانیا مە بكەت و گازوایل و كیمیایێ ب بهایەكێ ئەرزان بدەتە مە، هەكە نە زیان دێ گەهیتە مە، بۆ زانین ل سالێن بۆری مە كیلۆیا بامیا ب حەفت هەتا هەشت هزار دیناران دفرۆت و ئەڤ چەندە بوومە یا باش بوو.
موتەلیب عۆزێر، جۆتیارەكێ دی یە، دبێژیت: ئەڤ سالە چاندنا بامیان زیان گەهاندمە، چنكو مە گەلەك ب ئەرزانی فرۆتن و ئەڤ سالە ئەم دخۆسارەتین، لەورا پێدڤیە رێیەك بۆمە بهێتە دیتن ئەم بچین بامیێن خوە لێ بفرۆشین، یانژی حكومەت مە قەربوو بكەت و هەر چو نەبیت تۆڤ و گازوایلێ بدەتە مە و هەكە بڤی رەنگی بیت ل سالا بهێت كێم جۆتیار دێ بامیا چینن.
ئەسكەندەر هاشم، دبێژیت: چو سالان وەكو ئەڤ سالە بامی ب ئەرزانی نەهاتینە فرۆتن، بیرا من دهێت بەری چەند سالان مە كیلۆیا بامیا ب دەه هەتا دوزادە هزار دیناران د فرۆتە دوكانداران و وان ب بیست هەتا بیست و پێنج هزار دیناران دفرۆتن، لێ ئەڤ سالە ب هزارەكێ هەتا هزار و نیڤان دفرۆشین و ئەڤ پارە تێرا كەرەستەیێن مە یێن چاندنێ ناكەت و دخوازین رێڤەبەریا چاندنێ مە ب دانا تۆڤی و گازوایل و دەرمانان قەرەبوو بكەت، چونكو ل سالا بهێت دەست و دلێ مە ناگریت بامیا بچینبن.
