ژبەر گرانیا جهێن گەشتیاری گەشتیار پتر قەستا دەرڤەی وەلاتی دكەن
هەرهین محەمەد:
ل هەموو وەلاتێن جیهانێ بهایێ كەل و پەلان بۆ خەلكی وی وەلاتی و گەشتیاران نەوەكو ئێكە، بەلێ ل هەرێما كوردستانێ بۆ خەلكێ دەڤەری و گەشتیاران وەكو ئێكە، لەورا خەلك پتر ژ بۆ گەشتوگوزارێ قەستا وەلاتێن بیانی دكەن.
عەبدولرەزاق نهێلی، بسپوری د زانستێن گەشتیاری بۆ ئەڤرۆ گۆت: ل هەموو وەلاتێن جیهانێ ئەوێن ب دروستی گەشتوگۆزاركری، ژێدەرێ ژیان و ئابوورێ وەلاتێ خۆ ب میكانزم ب پلان ل سەر ڤی تشتی كاركریە ژ بۆ ئەوێ چەندێ كەرتێ گەشتوگۆزارێ تووشی لەنگ و لاوازیان نەبیت د هەر بیاڤەكی دا و نەخاسمە د دانانا بهایان دا ل هەر وەلاتەكێ گەشتیاری مرۆڤ بچیتی ل جیهانێ و هەكە ئەم بەحسێ وەلاتێ توركیان بكەین، ئەگەر وەلاتیێ وان بچیتە جهەكێ گەشتیاری بها بۆ وان كێمترە ژ گەشتیارەكی ژ نوو دچیتە وی وەلاتی و ئەڤە ل پەیی میكانزما دارێتنا گەشتوگۆزارێ بۆ وێ چەندێ دا وەلاتیێن وی وەلاتی پتر د مفاداربن ژ جه و بنگەهێن گوزاری د وەلاتێ خوە دا و هەرێما كوردستانێ ب گشتی یا وەلێهاتی هەموو بها ئێك نرخن بۆ وەلاتێن ناڤخۆیێن هەرێما كوردستانێ و گەشتیاران و ئێك بها ژێ دهێتە وەرگرتن.
زێدەتر گۆت: ڤێ چەندێ ژی دلگرانی ل نك وەلاتیێن هەرێما كوردستانێ پەیداكریە و گەلەك جاران كەرتێ گەشتوگوزارێ گازندا ژ وێ چەندێ دكەت وەلاتیێن هەرێما كوردستانێ گەشتێن ناڤخۆیی ناكەن، بەلكو دچنە ژ دەرڤەی وەلاتی گەشتان دكەن، چونكو هەكە جوداهی بهێتەكرن و وەلاتیەكێ هەرێما كوردستانێ گەشتەكا ناڤخۆیی بكەت، دبیت مەزاختێن وێ پتر بن كو بچیتە دەرڤەی وەلاتی گەشتێ بكەت، لەورا پتریا وەلاتیێن هەرێما كوردستانێ گەشتێن ژ دەرڤەی وەلاتی دكەن، چونكو بهایێ كەل و پەلان و جهێن گوزاری و خارنێن و ڤەخوارنێن بنگەهێن گەشتیاری ل هەرێما كوردستانێ بهایێ وان وەكو گەشتیارەكێ بیانی دهێتە هژمارتن و ڤێ یەكێ كارتێكرنا خوە هەیە ل سەر ڤەلڤینا كەرتێ گەشتوگوزارا هەیە، چونكو بارگرانی پەیدا دبیت ل سەر وەلاتیێن هەرێمێ و كارڤەدان چێدبن.
زێدەتر گۆتژی: ب دیتنا من سازیێن پەیوەندیدار ب كەرتێ گەشتوگوزارێ ڤە خەمێ ژ ڤێ چەندێ بخۆن و میكانزمەك بهێتە دارێتن كو بها بۆ وەلاتیێن هەرێما كوردستانێ ب پلان و میكانزم بهێتە دارێتن، چونكو گەلەك یا ب ساناهیە خودانێ وێ وەكو هەموو كەرتێن دی یێن ئابوری و هاڤینگەهەكا گەشتیاری بزانیت كا ئەرێ گەشتیار یێ بیانی یە، یان یێ ناڤخۆیی یە و بها بۆ گەشتیارێ ناڤخۆیی كێمتر بیت ژ یێ بیانی.
ئاشكرا ژی كر، من دڤیت ئاماژێ ب ئەوێ چەندێ ژی بكەم ئەو پلان و میكانزمێن من بەحس لێ كری نەهاتینە دارێتن، چونكول سەر ئاستێ دەستەیا گەشتوگوزارێ و هەموو دەمان تەكەزێ ل وێ چەندێ دكەین كو كەرتێ گەشتو گوزارێ وەكو هەموو كەرتێن دی یێن ئابوری یێن هەرێما كوردستانێ كەسانێن شارەزا بسپور ب رێڤە ببەن دا كو بزانن ئێش و ئازارێن ڤی كەرتی چنە و نەبوونا چو پلان ژی خەلكێ هەرێمی هەست ب هندێ دكەن كو بهایێ جهێن گوزاری گەلەك یێ گرانە بۆ وان، چونكو كەسانێن شارەزا و بسپورێن گەشتوگوزارێ ل دەستەیا گەشتو گوزارێ وەكو رازێژكارو داهێنەر و دانانا پلانا ل وەزارەتا شارەوانی و دەستەیا گەشتوگوزاری و سازیێن ب سەر ڤە خوە خوە د ڤان جهان دا نەدیتیە و دەلیڤە ب دەرچووێن گەشتوگوزاری یێن ئەكادیمی نەهاتیە دان، دا كو ب دروستی ڤان كێشەیان چارەسەربكەن و دانانا رێنمایێن گونجای ل دووڤ جیهانا سەردەم یا گەشتیاری و وەلاتیێن هەرێما كوردستانێ پتر خۆشیێ و لەزەتێ ژ جهێن گەشیاری یێن هەرێما كوردستانێ ببەن.