ژمارا قوربانيێن هاتنوچوونێ ل ئه‌لقوش زێده بوويه
ئەڤرۆ نیوز ، بارزان مزووری:
ل دووڤ ئامارەکا تایبەت بۆ ئەڤرۆ نیوز ژ لایێ پشکا ھاتنوچوونا ناحیا ئەلقوش کو د ماوێ 12 ھەیڤێن بوری دا ب درێژاھیا 17 کیلومەترێن رێیا سەرەکی ل ئوڤەرپاسا باعەدرێ حەتا زالگەھا بەدریکێ 28 روودانێن ھاتنوچوونێ دروست بووینە.
کومیسەر سەوری نەعمان، ژ پشکا ھاتنوچوونا ناحیا ئەلقوش بۆ ئەڤرۆ نیوز ئاشکرا کر کو د ماوێ وان 12 ھەیڤێن بوری دا د ناڤ 28 روودانێن ھاتنوچوونێ دا ژ جورێ لێکدان و وەرگەریان 17 کەسا گیانێ خو ژ دەست دایە 28 کەس ژی بریندار بووینە ژ وان برینداران ژی گەلەک بووینە کێم ئەندام.
ناڤھاتی خویاکر کو پتریا ئەو روودانێن دروست بووین د ناڤبەرا ترۆمبێلێن بارھەلگر و تایبەت دا بووینە و گۆت: “رێژا وەرگەریانێ گەلەک یا کێم بوویە، گەلەک ژ وان روودانا ترۆمبێلا لێکدایە ئاگر پێ کەفتیە شوفێر تێدا سوتیە”.
سەوری نەعمان گۆت: “ئەگەرێ ھەرە سەرەکیێ دروستبوونا روودانا رێ یا ئێک سایدە و یا بەرتەنگە ھاتنوچوونەکا زێدە ژی ل سەرە، ھەموو ترۆمبێلێن بارھەلگر د بارکرینە، پێدڤی یە د سالا بھێت دا ئەڤ رێیە بھێتە بەرفرەھکرن و نووژەنکرن”.
ناڤھاتی زێدەتر گۆت: “ھەڤبەرکی ل گەل سالا بۆری روودان و ژمارا قوربانیان زێدەتر لێ ھاتینە”.
