ژنا بهێز چو جاران دەستان داناهێلیت
بێوار حەمدی:
رێڤەبەرەكا ژن دیار كر كو هەتا بەری چەند سالان ژی زەلامی پتر بها هەبوو د كاری و ڕێڤەبرنێ دا و گۆت: بەلێ نها گرنگی ب ژنێ ژی دهێتە دان، لێ هێشتا جڤاكی باوەریەكا مكۆم ب ژنێ نینە، چونكی ژن بتنێ ب كارێ ناڤمالێ هاتیە نیاسین.
شیلان یونس، رێڤەبەرا ڕاگەهاندنا چاپ و بەلاڤكرنێ ل دهوكێ، د دیدارەكێ دا بۆ ڕۆژناما ئەڤرۆ دیار كر كو بەری چەند سالان ژی ژن نە دشیا هەموو كاران بكەت، ژبەركو داب و نەریتێن كوردەواری و جڤاكێ عەشائیری زاڵتر بۆ و گۆت: (جڤاكی هەتا نۆكە ژی باوەریەكا مكۆم ب ژنێ نینە، چۆنكی ژن پتر ب كاروبارێن ناڤمالێ و خۆدانكرنا زارۆكان هاتیە نیاسین، لەوما ئەڤ چەندە دبیتە ئەگەر كو باوەریا وێ ب شیانێن وێ كێمتر بیت).
شیلانێ د بەردەوامیا ئاخفتنێن خۆدا گۆت: (چ جوداهی دناڤبەرا كاركرنا ژنێ و زەلامی دا نینە ، بەروڤاژی بارێ هەرە گران دكەڤیتە سەر ملێن ژنێ، بو نمونە سەرەدەریا وێ ل گەل خێزانێ، خۆدانكرنا زارۆكا، مێهڤانداری، كارێ ڕوژانە یێ ناڤماڵێ…، بەلێ ژنا ب كەرامەت و خۆدان باوەریەكا بهێز چ جاران دەستا نا داهێلیت، هەرچەندە زەلامی پتر دەرفەت یا هەی د كارێن ڕێڤەبرنێ دا، لێ ژن ژی دشێت كارێن مال و دەرڤەی مال ب رێڤە ببەت).
رێڤەبەرا ڕاگەهاندنا چاپ و بەلاڤكرنێ شیلانێ ئەو چەندە ژی دیار كر كو خۆدایێ مەزن زەلام بهێزتر ژ ژنێ ئافراندیە، د بەرێ دا و هەتا بەری چەند سالان ژی زەلامی پتر بها هەبوو د ڕێڤەبرنێ دا، بەلێ د نها دا پتر ڕێك ب ژنێ دهێتە دان، ژبەركۆ د جڤاكی دا هندی تبلێن دەستان ژن د كارێن ڕێڤەبرنێ دا هەنە.
شیلانێ گۆتژی: (د كاری دا چ ژن بیت یان زەلام پێدڤی ب هێزێ ناكەت كا كی ژ وان بهێزترە، یان ژن دێ شێت ل سەر زەلامی زاڵ بیت، ژبەركو ئەم یێن د جڤاكەكێ گرتی دا و ژنێ چ جاران خۆ نەگەهاندیە وی ئاستی كو خو ل سەر زەلامی زاڵ بكەت، بەلكۆ بەرۆڤاژی دڤێت ژن ژی پتر ڕێزێ ل كاروبارێن زەلامی بگریت و ل گەلدا یا هاریكار بیت).
