ژنێن ئه‌فغانی د به‌ره‌یێ پێشیێ یێ شه‌رێ ل دژی تالیبانێ دانه
ئه‌ڤرۆ:
ده‌زگه‌هێن راگه‌هاندنا جیهانی دیار دكه‌ن كو پشتی رێكخستنا تالیبانێ شیا پرانیا ده‌ڤه‌رێن ئه‌فغانستانێ كۆنترۆل بكه‌ت نها نه‌رازیبوونه‌كا مه‌زن ل دژی تالیبانێ ده‌ستپێكریه، ب تایبه‌تی ژی ژنێن ئه‌فغانی د به‌ره‌یێ پێشیێ دانه، هه‌روه‌سا به‌ره‌یه‌ك نوو ب ناڤێ به‌ره‌یێ به‌رخوه‌دانێ هاته ئاڤاكرن كو پشكه‌ك ژ له‌شكرێ ئه‌فغانستانێ د ناڤ ڤێ به‌ره‌یه‌كێ دا جه دگرن و هێزێن وان شیاینه د ماوه‌یێ دو رۆژێن بۆری دا سێ باژێران ژ ده‌ستێ تالیبانێ رزگار بكه‌ن و پتر ژ ٦٠ چه‌كدارێن تالیبانێ ژی هاتینه كوشتن.
ل گۆر راپۆرته‌كا ئاژانسا بی بی سی رێكخستنا تالیبانێ پێگیری ب سۆزێن خوه نه‌كر هه‌ر زوو چه‌كدارێن تالیبانێ ده‌ست ب گرتن و كوشتنا كه‌سێن دژبه‌رێن خوه كرن، زۆلم و زۆرداریێ ل ژنان دكه‌ن، تالیبان چو رێزه‌كێ ل ژنان و مافێن وان ناگریت، ژ به‌ر هندێ ژی ژن د به‌ره‌یێ پێشیێ یێ شه‌رێ ل دژی رێكخستنا تالیبانێ دانه و رۆلێ وان د ئاڤاكرنا به‌ره‌یێ به‌رخوه‌دانێ دا گه‌له‌ك گرنگه.
ده‌زگه‌هێن راگه‌هاندنا جیهانی ژی دیار دكه‌ن كو ره‌وشا ناڤخوه‌یی یا ئه‌فغانستانێ گه‌له‌ك خرابه و ب سه‌د هزاران وه‌لاتیێن ئه‌فغانی دخوازن هه‌ر زوو ژ ترسا چه‌كدارێن تالیبانێ ژ ئه‌فغانستانێ بره‌ڤن و ئه‌و یه‌ك ژی دشێت ئاریشێن مه‌زن بۆ ئورۆپا دروست بكه‌ت.
