ژنەكا دهۆكێ ب رێیا پرۆژەیێ خۆ 14 گەنجان ددەتە كاری
بێوار:
كاركرن بۆ گەنجان گەلەك یا گرنگە ب تایبەت كچێن گەنج، خودان كارەك ژی دبێژیت: ئەڤە بۆ من خۆشترین هەستە كۆ خودایێ مەزن شیان داینە من بشێم ببمە ژێدەرەكێ داهاتی بۆ ژمارەیەكا گەنجان ژ هەردو رەگەزان و گۆت ژی: ل جهێ كارێ خۆ من پەرتوكخانەیەك ژی دانایە كۆ پەرتوكان دفروشین یان ژی هەر كەسێ بڤێت پەرتوكان بخوینیت ژی مە جهێ ڕوونشتنێ هەیە، بۆ هندێ كار ل سەر ئاڤاكرنا مێشكێ وێ ژی بكەین، چونكی ب ڕێكا خواندنێ مرۆڤ پتر دشێت خوە ئاڤا بكەت.
روژڤین خەلیل، خودان كارە د دیدارەكێ دا بۆ رۆژناما ئەڤرۆ گۆت: ئەز كارێ فروتنا جلوبەرگ و پێدڤیێن ئافرەتان دكەم و هەر ژ مێژەیە من حەزا ڤی كاری هەی، بێگومان چ كار د بێ زەحمەت نابن، بەلێ دەمێ ماڵباتا مرۆڤی پشتەڤان بیت و ب تایبەت هەڤژین ل وی دەمی چ ڕێگری نابن ژ بۆ كاركرنێ و گۆت: (14 گەنج ژ هەردوو رەگەزان كۆ 11 ژ وان كچن و 3 ژ وان كوڕن ل دەف من كاردكەن، ئەڤە خوشترین هەستە كو ب حەزكرنا خودایێ مەزن ئەز شیایم ببمە سەرچاوەیەكێ داهاتی بۆ ژمارەیەكا گەنجان).
د بەردەوامیا ئاخفتنا خۆدا ڕوژڤینێ گۆت: ل جهێ كارێ خۆ من پەرتوكخانەیەك ژی دانایە كۆ پەرتوكان دفروشین یان ژی هەر كەسێ بڤێت پەرتوكان بخوینیت ژی مە جهێ ڕوونشتنێ هەیە و گۆت: (مەرەم ژ دانانا ڤێ پەرتوكخانێ ئەوە، مە دڤێت ژبلی كۆ كار لسەڕ جوانكرنا بەژن و باڵا ئافرەتێ بكەین، د هەمان دەمدا كار ل سەر ئاڤاكرنا مێشكێ وێ ژی بكەین، چونكی ب ڕێكا خواندنێ مرۆڤ پتر دشێت خوە ئاڤا بكەت).
روژڤینێ ئەو چەندە ژی دا زانین، كاركرن ژ بۆ گەنجان و بتایبەت كچان گەلەك یا گرنگە هەتا ئەگەر ل دەسپێكێ ب خوەبەخشی ژی كاربكەت، چونكی ئەڤ چەندە دبیتە ئەگەرێ فێربوونا وان بۆ كاری و دەرێخستنا هێزو شیانێن وان، هەروەسا گۆت: ئەز رازی نابم كەسەك ل دەف من كاربكەت و مۆچێ وی یێ كێم بیت یان مافێ زەحمەتا خۆ نەوەرگریت، بەلكو بزاڤێ دكەم فێری زانینێ ژی بكەم و د هەمان دەمدا موچەیەكێ ل دووڤ زەحمەتا خۆ ژی وەربگرن.
