ژن دشـێت ل مـال ژی کـار بکـەت
بێوار حەمدی:
ماموستایەکا زانکۆیێ بۆ ڕوژنامەیا ئەڤرو دیار کر کو
چ کار ژ دایکینیێ ب بهاتر و بزەحمەتتر نینن بۆ ژنێ، لێ ژن یا ئازادە کار بکەت و گۆت؛ هەردەمێ ژنێ باوەری ب شیانێن خۆ هەبیت کەس نەشێت مێیاتیا وێ بکاربینیت.
دکتورە زوزان سادق، ماموستایا زانکویێ د دیدارەکێ دا بۆ رۆژنامەیا ئەڤڕۆ دیار کر کو کارکرنا ژنێ ژلایێ جڤاکی ڤە هاریکارەکە بۆ ئاڤاکرنێ، چونکە ئەو ژی یا هاریکارە ژ بۆ خێزان یان هەڤژینێ خۆ و گۆت؛ چ کار ژ دایکینیێ ب بهاتر و بزەحمەتتر نینە ژبۆ ژنێ، لێ ئەو یا ئازادە کار بکەت، ئەڤجا چ کارێن حکومی بن یان ژی یێن تایبەت.
ماموستایا زانکۆیێ د بەردەوامیا ئاخفتنێن خۆدا گۆت؛ هەتا کو ژن دشێت ل مال ژی هندەک کاران بکەت وەکو دروینا جلکان، چێکرنا خوارنان، دیزاین، وانێن تایبەت، چێکرنا پڕۆژەیێن بچویک و کارێ ئونلاین و… لێ ب مەرجەکی ئەوکارە نەبنە ئەگەرێ تێکدانا خێزانا وێ یان ژی پشتگۆهـ خستنا زارۆکان.
د. زوزانێ ئەوچەندە ژی دا زانین کو گەلەک ئاساییە ژن ب ڕێکا ئونلاین ژی کار بکەت، چونکە مە بڤێت یان نە ئەم یێن تێکەلی پێشکەفتنا تەکنولوژیایێ بوین، لێ دڤێت ب ڕێکێن باش و ساخلەم بکار بینین.
د. زوزانێ زێدەتر گۆت؛ هەردەمێ ژنێ باوەری ب شیانێن خۆ هەبیت کەس نەشێت مێیاتیا وێ بکاربینیت، لێ پێدڤیە ژن ژی ب هەمی کاران ڕازی نەبیت بتایبەت ئەوێن کارتێکرنێ ل کەسایەتیا وێ دکەن.
