ژن نە (ژنا شۆلا)یە دایکا جڤاکی یە
بێوار حەمدی:
چالاکڤانێن جڤاکی بۆ ڕوژنامەیا ئەڤرۆ دیار کر کو ژن ژیانە، لێ دەمێ بۆ کارەکێ کێم یان ژی کێمکرنا کەسێ بەرامبەر دبێژن؛ ژنا شولایە یان ژنا تشتایە.. بێگۆمان وەکو سفکاتیکرن و کێمکرنا ژنێ دهێتە بکارئینان. چیمەن ڕەشید، چالاكڤانا جڤاكى و بەرپرسا ڕێکخراوا ژیندا دیار کر کو جڤاکێ کوردی هەر د بەرێدا ڕێز ل ژنێ گرتیە و ژنێ مل بملێ زەلامی کار کریە و گۆت؛ مە گەلەک جاران گەنگەشە و نەڕازیبون لسەر وێ چەندێ کریە دەما ژبۆ ئاخفتنێن زڤر یان بۆ کێمکرنا کەسێ بەرامبەر دبێژن (ژنا شولایە، ژنا تشتایە، ژنا ژنا خۆيه…).
بەرپرسا ڕێکخراوا ژیندا گۆتژی؛ بکارئینانا ڤان پەیڤان یا جوان نینە و دویرە ژ ڕەوشەنبیریێ، ژبەرکو بلا هەر کەس هزر بکەت وی ژی دایک و خۆشک هەنە و بزانیت ئەو ئاخفتن دەربرینێ ژ وان ژی دکەن.
هێلان سلێمان چالاکڤانە سەبارەت هەمان بابەت دیار کر، ژن ئانکو ژیان، لێ دەمێ بۆ کارەکێ کێم یان ژی کێمکرنا کەسێ بەرامبەر دبێژن (ژنا شولایە) بێگۆمان وەکو سفکاتیکرن و مرۆڤەکا سادە دهێتە دیتن و گۆت؛ بکارئینانا ئەڤان پەیڤان گەلەک دیتن هەنە لێ جڤاکێ کوردی نوکە وەکو بچوک کرن بەرامبەری ژنێ بکاردئینن.
هێلانێ دیار کر کو مخابن پشتی داگیرکرنا جڤاکێ کوردان زارۆکێن وان لسەر بنگەهێن پەروەردەیا خەلکی هاتنە ئاڤاکرن، ژبەر هندێ ئەڤ پەیڤێن شاش دهێنە گۆتن و گۆت؛ چونکو ئەگەر مرۆڤ لسەر بنگەهێ ژنبۆنێ بیت دێ دلۆڤانی و جوانی و هێزو ڕەوشت هەبیتن و ئەگەر نە دێ بەرۆڤاژی بیت.
