ژن ژ چنینێ بەر ب فەرمانبەریێ
ئاواز مەسعود
ژیان رێكەكە و گەلەكا درێژە و د ڤێ رێكێ ڕا گەلەك نەخۆشی و ئاستەنگ هەنە و مرۆڤێ زیرەك و سەركەفتی ئەو مرۆڤە یێ كو بێشێت ژیانا خوە برێڤەببەت ب تایبەتی ژن و مێر، چونكی ژیانا هەڤژینیێ بەروڤاژی كەسێن بێ هەڤژین بارێ وان گرانترە ب تایبەتی بۆ دەمێ سەردەمێ نوكە ئەم تێدا، چونكی مافێ هەر كەسەكی یە ئەڤرۆكە ئەو پێدڤین رۆژانە هەبن و ل بەردەستبن هەتا پشێت ب ئارامی ژیانێ ببۆرینن و ئەڤە ژی مافێن وی نە یێن بچویك.
لێ كاركرنا ژنێ د گەل زەلامی بۆ پەیداكرنا داهاتەكێ بۆ رێڤەبرنا مال بۆ دەمێ نوكە تشتەكێ پێدڤی یە، چونكی ژنا كورد ب هەماهەنگی ل گەل زەلامی دبەرێ ژی دا ل سەر دەمێ باب و باپیران كاركری یە مینا چوونا دارا و كۆمكرنا چلی و جنینا باجانان و گەلەك كارێن دی لێ ئەڤرۆ سەردەم هاتیە گوهۆڕین ژ بیستانی و كۆمكرنا چلی بۆ فەرمانبەریێ و كارگێری بوویە خودان كار و هەماهەنگیێ ل گەل هەڤژینێ خۆدا كەت بۆ برێڤەبرنا مالێ ئاڤاكرنا خێزانا خوە، چونكی سەردەمێ نوكە كاركرنا ژنێ پتر خێزانێ ددەت مەرەم هەبوونا دو داهاتان د مالەكێ دا پێ نەڤێت باشترە ژ هەبوونا داهاتەكی لێ نە كاركرنا ژنێ نە رامان ئەوە ژن نە شێت خێزانا خوە ئاڤا بكەتن مەرەما مە ژ ڤێ چەندێ ئەوە ئەگەر دو داهات مالێ دا هەبن دێ بارێ ئابۆری یێ وێ خێزانێ باشتر بیت.
كاركرنا هەڤژینان ژ دەرڤەی مال كارتێكرنا ئابۆری یێن ئەرێنی و نەرێنی ل سەر خێزانێ هەنە ژ لایێ ئەرێنی ڤە ئەگەر بەحس بكەین. دبیتە ئەگەرێ زێدەكرنا داهاتێ ڤێ خێزانێ ب تایبەتی د كۆمكرنا ڤێ داهاتی دا دادپەروەرانە ئەگەر بهێتە مەزاختن ئەڤە ژی دێ رێكێ خۆشتر لێكەتن باشتر پێدڤیێن خوە دابین بكەت و پارەیێ زێدە پاشەكەفت بكەت بۆ ئارمانجێن داهاتی و ل دەمێ ب بەرپرسیارانە ئەڤ داهاتێ هاتە كۆمكرن دێ بیتە ئەگەرێ باشتركرنا ئاستێ ژیانا ڤێ خێزانێ زێدەبوونا داهاتێ خێزانێ دێ خێزان پتر شێت كەلوپەلێن پێدڤی خزمەتگوزارێن دێ كریت یان خانیەكێ و ترۆمبێلەكێ یان گەشتان ئەنجام بدەت ئەڤەژی دێ ئاستێ ژیانا گشتی باشتر لێ كەت.
پێكڤەكاركرنا ژن و مێران دێ شێن هاریكاریا خێزانێ كەت بۆ بدەستڤەئینانا سەقامگێریا دارایی و دوركەفتن ژ قەرز و قەیرانێن دارایی.
و كارتێكرنێن نەرێنی یێن ئابۆری ئەوژی كاركرنا هەردو هەڤژینان دێ بیتە بارگرانی ل سەر هەردویان ب تایبەتی ئەگەر دابەشكرنا دادپەروەرانە دبەرپرسیاریەتیا مال و چاڤدێریا زارۆكان دا نەبیتن و دێ كارتێكرنێ ل سەر ڤان زارۆكان كەتن و گەشەیا وان ب تایبەتی ئەگەر ژن و مێر بۆ دەمێن درێژ ژ دەرڤە كار بكەن و دەمێ كێم بۆ زارۆكێن خوە تەرخان بكەن، هەروەسا دبیتە ئەگەرێ فشارێن دەرونی ئانكو كاركرنا دەمژمێرێن زێدە وەرگرتنا چەندین بەرپرسیارەتیان دێ فشارێن مەزن ئێخنە سەر ڤان هەڤژینان و دێ كارتێكرنێ كەتە سەر پەیوەندیا وان یا هەڤژینیێ و ساخلەمیا دەرونێ وان.
ل ڤێرێ دێ گرنگیا هەڤسەنگیێ دیاربیتن، داكو زۆرترین مفا هەردو هەڤژین ژ كاركرنا ژ دەرڤە ببینن و دیركەڤن ژ كارتێكرنێن نەرێنی.
دڤێت خێزان هەڤسەنگیەكێ د ناڤبەرا ژیانا كاری و كەسی و مال دا ب دەستڤەبینیت و ڤێ ژی پێدڤی دابەشكرنا بەرپرسیارەتیا دادپەروەرانە هەیە ئانكو دڤێت هەردو هەڤژین كارۆبارێن مال چاڤدێریا زارۆكان ب یەكسانی دابەش بكەت ل دویڤ شیان و رەوشا خوە و پێدڤی یە هەڤژین دەمێ خوە ب شێوەكێ باش رێكبێخن داكو هەڤسەنگیەك دناڤبەرا كار و خێزانێ دا ب دەستڤەبینن و پێدڤی یە هەڤژین ب ئاشكرا و راستگویانە پەیوەندی هەبیت سەبارەت پێدڤیا و كێشەیان و ل دویڤ چارەسەریێن هەڤپشك بگەریێن و پێدڤی یە هەردو هەڤژین پشگیری و پشتەڤانیا ئێك و دو بكەن د ڤێ ژیانێ دا و د هەمی لایەنێن ژیانێ دا.
