ژڤانێ پشككێشان و خولا پلا ئێكا عیراقێ هاته دیاركرن
ئه‌ڤرۆ،
د داخویانیه‌كێدا ئه‌ندامێ ئێكه‌تیا ته‌پا پێ یا عیراقێ بۆ رۆژناما ئه‌ڤرۆ كو ب فه‌رمی ژڤانێ پشككێشانا وه‌رزێ نوو یێ خولا پلا ئێك ده‌ربازبوون بۆ پلا نایاب هاتیه دیاركر و دیسا هه‌ڤڕكیێن وێ كو برَیاره ب پشكداریا 28 یانا بیت و بهێنه به‌لاڤكرن ل سه‌ر دو كۆمان.
زێده‌تر ئه‌حمه‌د كامل كوچه‌ر گوت: بڕیاره ل 26ێ هه‌یڤێ دێ پشككێشانا خولا پلا ئێك ل باژێرێ به‌غدا هێته كرن و یاریێن خولێ دێ ب پشكداریا 28 یانا ب شێوێ خول ئێك قۆناغ ل ئێكێ هه‌یڤا بهێت ده‌ستپێكه‌ت ژبۆ هه‌ڤڕكیێ بۆ بده‌ستڤه‌ئینانا دو پلێتێن ئێكسه‌ر بۆ پلا نایابا عیراقێ و پلێته‌كا ئێكلاكرنێ ل گه‌ل تیما خودانا رێزا 18ێ ل پلا نایاب ژبۆ بده‌ستڤه‌ئینانا پلێتا سیێ و بڕیار هاتیه دان دڤێت هه‌موو یانه پێگیریێ ب رێنمایێن خوه پاراستنێ ژ ڤایرۆسێ كورونایێ بكه‌ن.
زێده‌تر ناڤهاتی گوت: پێنچ یانێن كوردستانێ دێ پشكداریێ كه‌ن ئه‌وژی، دهۆك، نه‌وروز، پێشمه‌رگا سلێمانیێ، برایه‌تی و گازا باكۆر و یانێن دی ژ پارێزگه‌هێن عیراقێ نه و چاڤه‌ڕێ یه شه‌ش یانێن مایی دڤێ حه‌فتیێ دا بهێنه ئێكلاكرن پشتی هه‌ڤڕكیێن كۆمێن وان ب دووماهی بهێن و دیسان بڕیار هاتیه دان چو یاری نه هێنه پێشئێخستن ژبه‌ركو ده‌م یێ كورته و یاریێن وان پێدڤی ب دیڤچوونا ته‌سه‌له و ناهێلێن چو زێده‌گاڤی ژی په‌یدابن.
لدووماهیێ ئه‌حمه‌د كۆچه‌ر دیاركر وه‌كو كوڕده‌ك دناڤ ئێكه‌تیا ته‌پاپیێ یا عیراقێ دا دێ هه‌موو بزاڤا كه‌ت بیێ راوه‌ستیان پشته‌ڤانی و هه‌ڤكاریا یانێن كوردستانێ كه‌ت و هیڤی خواست پلێتێن ده‌ربازبوونێ بۆ یانێن كوردستانێ بن و گوت: دێ ب رژدی لسه‌ر كاروانێ یانێن كوردستانێ راوه‌ستیاین و ناهێلین چو غه‌در لێ بهێته كرن.
