ژڤانێ مە
ناجح فەخری
دەمژمێر دێ سەر٧ ێ ڕاوەستیت و ژڤانێ مە یێ نێزیك دبیت، ب رێكا مالا وان ڤە دبم كالەمێرەكێ 70 سالی و كەلەخێ من هەمی وەكی بیا دناڤ ئاڤێ دا دلەرزەیت، پشتا من یا چەمیایی وسەروچاڤێن من یێن قۆرمچین، دیمێ من یێ زەرو پێتی و پرچا من یا سپی بووی، جار ژی دعەشقا وێ دا دبم سنێلەكی ١٦ سالی و باهۆز، بارۆڤ، بەفر و سەڕما شەڤێن تلچاڤ نابن رێگڕ، دەرگەهێ مالا وان ژ من ڕا دبیتەقیبلە و دجڤاتا وێ دا دبم مڕۆڤەكێ دەڤ ترتیری و چاڤ حۆتم دبن و دگوهشم ، گوهێن من گران دبن ، دەنگێ لێدانا دلێ من زێدەدبن، مویێن لەشێ من هەمی دبن زخت و ژ بەژنا من بلندتر دبن، جاران ژی مڕۆڤەكێ پڕبێژ و گوهێن من دلڤلڤینا مێیان دا دبن زێرەڤان و چاڤ دبن ستێر ستێرۆك و لەشێ من هەمی ب تەڤدا ئارام دبیت، ئەو پەڕچەمكا هنداڤ هەردوچاڤێن وێ دبنە دادوەرەكێ بێ (ئەنساف ) و مە ژئێك ڤەدقەتینین، لێڤێن وێ ل سحارا بهارەكا نیڤ خوناڤی و بەری ڕۆژهەلاتنێ دبن جهێ ژڤانا مە و سینگێ وێ تەواف دكم ، ڕۆندكێن چاڤێن وێ دبن خۆیسارا پا ییزەكا سەرمایی و دناڤ دا بەرزەدبن، ڤەهاندینا كەزیێن وێ دبن جوانیا پەیڤێن هۆزانێن من، دەستێن من د پاخلێن وێ دا دبن سوفیەكی دخەلوێ دا مایی وجاران ژی دبم سڤیانۆكەكێ سەر سیڤاندێن خانیێ وان، خوە ڤەدجنینم و ل بەندا پێژنەكا وێ مە، هندەك جاران ژی وەكو كۆترەكا ئاشتیێ خوە نیشانددم وناما مرۆڤایەتیێ دگەهینم.
