ژیانا من ل سەر گرتنا وێنەیانە
عەزیز هەورامی:
وێنەگر (سارا جەعفەری) كو خەلكا باژێرێ (سنە) یە، ل رۆژهەلاتێ كوردستانێ، د دیدارەكێ دا بۆ رۆژنامەیا ئەڤرۆ گۆت: ئەڤ پازدە سالن ئەز وەك وێنەگر كاردكەم و هەتا نوكە من هژمارەكا پێشانگەهێن فوتۆگرافی ل هەولێر و هەلەبجە ڤەكرینە، هەروەسا ل رۆژهەلاتێ كوردستانێ ژی من هندەك چالاكی هەبوون، لەورا هندی دژیانێ دا مابم و من شیان هەبن دێ یا بەردەوامبم.
هەروەسا گۆت: دەمێ ئەز ل رۆژهەلاتێ كوردستانێ من بۆ چەند ئاژانسان كاردكر، ژوانا ئاژانسەكا ئەمریكی و چەند ئاژانسێن كوردی ل هەرێما كوردستانێ، هەروەسا وێنەیێن من گرتین ل چەند پێشانگەهێن نێڤدەولەتی هاتینە بەلاڤكرن، لەورا هەردەم دبێژم ژیانا من ل سەر وێنەگرتنێ یە و ب دیتنا من ل دەستپێكا هەر كارەكی دڤێت مرۆڤ باش خوە فێربكەت و هەكە گەهشتە ئاستێ پرۆفیشینال ل وی دەمی دێ شێی ل گەل ئاژانسێن باش كاربكەی، هەروەسا هاریكاریا هندەك كەسێن دی ژی بكەت، بۆ زانین پتریا وێنەیێن من گرتین باژێر و سروشتێ رۆژهەلاتێ كوردستانێ نە.
