ژیانا پێشمەرگایەتیـێ هەمی نەخۆشـی بـوو
دیدار، سالار محەمەد دۆسكی:
3 – 5
یاسینی گۆتە من: تە گولێ هەیە دەنگ و دۆرەكێ تێت؟ من گۆتێ: بەلێ هزر كەم لەشكرە. دەمەكی هۆسا مە تەماشەكر، هەما لەشكر وەكی كەرێ پەزی یێ ب وی چیای وەربووی و یێ تێت. ئەز بلەز چووم من زكری و نایف ڕاكرن و من گۆتێ: ڕابن دوژمنی ئەم گرتین. دەستپێكێ وان هزركر ئەزێ حەنەكا ب وان دكەم، پاشی دەمێ وان ئەو كەریێ لەشكری دیتی، ڕابوون. ئێدی دەلیڤە بۆ نەما ئەم ل چیای بچین. چونكی لەشكرێ دوژمنی چیا هەمی گرتبوو. یاسین كەفتە پێشیا مە و گۆت: وەرن. مە ئێدی خوە بەردا دەشتێ. دبەر حوجاڤا ڕا مە خوە بەردا دەشتێ. مە وەكی كەلێن كویڤی ئەو دەشت د كەلاشت و دا بێژی هێچ وەستیان و خەو ل دەف مە نینە، ب نێزیكی 15 خولەكا مە خوە گه هاندە گۆڕستانا(شێخ ماوی) ل دێرا گژنیك. ئێدی ل وێ دەشتێ دناڤ دارێن گۆڕستانا شێخ داود را مە وێ ڕۆژێ خوە هشاردا. ب ڕۆژ دەمێ مە ب دووربینێ تەماشەی دەڤەرێ كری، بۆستەكا وی چیای و دۆرێن دێراگژنیك نەمابوو لەشكر لێ نە. ئەگەر وێ ڕۆژێ یاسینی ئەو تەكتیك نەكربا و ئەم نە ئیناباینە دەشتێ ڕزگاربوونا مە نەبوو. دەڤەرا دۆسكیا و دەردۆرێن دهۆكێ هینگێ پێشمەرگە زوی ب زوی نەگەهەشتێ، تنێ ئەم ئەو مەفرەزا چار كەسی بووین. ژ بەر كو دەڤەر گەلەكا بمەترسی بوو، ئەم زیدە دوەستیای و ڕوونشتن و ئارامیا مە نەبوو. لۆما ئەو چەند بوو ئەم هەمی ب (یاسین) ڤە بووین مە گۆتێ ئەم گەلەك وەستیاینە دێ چینە دەڤەرا بەرواری باڵا بهێنا خوە ڤەدەین. لێ وی قەبوول نەدكر و دگۆت: ئەڤە پێشمەرگاتیە و شەڕێ پارتیزانیە دێ هۆسا بیت.
وی دەمی ژیانا پێشمەرگاتیێ ل وان دەڤەران گەلەكا بزەحمەت بوو. ژبلی هندێ كو دەڤەر یا تژی لەشكر و سیخوڕ و بنگەهێن دوژمنی بوو. دیسان هەر گوندەكێ ئەم چووباینێ پێزانین دگەهشتنە دوژمنی. وی دەمی مەفرەزێن جاشێن ئستخباراتێ هەبوون. بەردەوام ئەو ل دووڤ پێشمەرگەی دگەڕان و بۆسە ل سەر ڕێكێن مە ددانان. وی دەمی ئێك هەبوو دگۆتنێ (شێخ سەلام) بەرپرسێ مەفرەزەیەكا جاشێن ئستخباراتێ بوو. گەلەك گوندان داچینێ و ب شەڤێ دەركەڤین، خەلكێ گوندی دا بێژن سپێدێ (شێخ سەلام یان حەجی بەرۆشكی یان حكمەت نەجمان) هاتبوو گۆت جهێ ئەوان نیشا مە بدەن، ئەو ل وە دگەڕیان. د هەمان دەم دا خەلكەكێ دلسۆز و پاك و وەڵاتپاریز ژی ل دەڤەرێ هەبوو، وەكی خەلكێ گوندێ (لیناڤا) بۆ نموونە رەشیدێ محێ و برایێ وی تاهر و ئیسفێ لیناڤای و هەر كەسەكێ ئەم دیتین وان گەلەك هاریكاریا مە دكر. دیسان مالا سمائیلێ محێ ل بێسكێ و كورێ وی شەمسەدین، كو ئەم چەند شەڤا ماینە ل وێرێ. ئەڤان گەلەك هاریكاریا مە دكر.
ڤی دەمی هێشتا دایكا من ئەو د زیندانێ دا و كورەك من هەبوو ژدایك بوویێ سالا 1979 ێ بوو و ل زیندانێ نەخوشیەك بوو دروست بوو و نەهێلا ببەنە خەستێ چارەسەریا وی بكەن.
پشتی ڤێ گەڕا پڕی زەحمەت و مەترسی و وەستیانا دەڤەرا دهۆك و مانگێشكێ، ئەم جارەكا دی زڤڕینەڤە دەڤەرا بەرواری باڵا. هینگێ ئێدی رێكخراوێن لەشكری هاتنە دروستكرن و ئەم ل گەل رێكخراوا شەهید (ئەنوەر مایی) هاتینە دانان كو شەهید (شەعبان غەفار) بەرپرسێ وێ بوو. پشتی هینگێ ئەركێ مە كەفتە دەڤەرا بەرێ گارەیی و ئێدی نەما هەر كەسەك سەربەخوە ل جهەكی بیت و ئێدی رێكخستنەك كەفتە ناڤ پێشمەرگەی. هەڤالێ مە زكری كێستەیی چوو لگەل ڕێكخراوا شوڕەش ل گەل شەهید مەلا رەمەزان بهەشتی و ئەم هەرسێ یێن دی ژی ماینە ل گەل ڕێكخراوا شەهید ئەنوەر مایی. ئەز مامە ل ڕێكخراوا ناڤبری و ل گەل وێ ڕێكخراوێ ئەم پشكداری چەند چالاكیەكا ژی بووین، هەتا كو ل بهارا ساڵا 1983(شەعبان غەفار) شەهید بووی. ل سەر دەمێ شەهید شەعبان غەفاری ڕێكخراوا مە گەلەكا مەزن بوو، ژمارا پێشمەرگێن وێ خۆ ل 150 پێشمەرگا ددا. لۆما ئێدی رێكخراوا مە هاتە دابەشكەرن بۆ دوو رێكخراوا ئێك بناڤێ شەهید (شەعبان غەفار) كو شەهید حەمدی بەگ بوو بەرپرسێ وێ و ئەز ژی بوومە جێگرێ وی. یا دی ژی هەر ما شەهید ئەنوەر مایی و شەهید عەلی ئەڤبابەكر ئیسفكی بوو بەرپرسێ وێ.
نەجمەددین كێستەیی دبێژیت: ژیانا پێشمەرگاتیێ هەمی نەخوشی و رەزالەتی بوو چونكە 24 دەمژمێرا دوژمن ب دوڤ مە ڤە بوو هەر جهەكێ ئەم دیتباین دلێ خوە ب مە نە سوت. ل سالا 1986 هێرشەكا لەشكر و جاشێن دوژمنی هات بۆ دەڤەرا شرتێ و تنێ، ئەم ژی چووین بۆ بەرسینگرتنا وان. پشتی هێرشا دوژمنی شكەستی، ئەم زڤڕین هاتینە نێزیك گوندێ هەسنپێركا و مە دیت ئەڤە ڕاست كۆمەكا هەلیكۆپتەرێن دوژمنی هاتنە مە. ئەم نێزیكی 60 پێشمەرگا بووین. مە ژی د وان شیڤك و نهالا دا خوە بەڵاڤكر و خوە هشاردا. ئەو هاتن و نێزیكی 15 خولەكا ل سەر سەرێ مەزڤڕین. وان دزانی ئەمێ ل وێ دەڤەرێ، بەلێ پا كەس ژ مە نەدیت و پاشی پاشڤەزڤڕین.
