ژیانا پێشمەرگایەتیێ هەمی نەخۆشـی بـوو
دیدار، سالار محەمەد دۆسكی:
2 – 5
ئەم چووینە دەڤەرا بەرواری باڵا و مە پەیوەندی ب وان كر. هینگێ دایكا من ئەو ژی هەر یێ ز یندانێ دا و دایكا من هەر ناما فرێ دكەت و دبێژیت: ب چ رەنگان خوە رادەستی حوكمەتێ نەكەن سەرخاترا. پشتی كو مە پەیوەندی ب سەید سالح و شەهید شەعبان غەفاری كری، ئەم ئەو مەفرەزا چار كەسی، جارەكا دی زڤڕینەڤە دەڤەرا دهۆكێ چەند چالاكی مە ئەنجامدان، دا كو بۆ دوژمنی دیاربكەین كو پێشمەرگە هەنە و شوڕەشا بەردەوامە. بیرا من دهێت كارگەهەكا قێری ل نێزیك سەرتەنگێ بوو. جارەكێ ئەم هاتین مە ئاگر بەردایێ و ماكینە تشتێن حكومەتێ تێكدان. دەمەكی ئەم ماینە ل دەڤەرا شاریا و هەتا گەلی كورتكی و قەشەفرێ و هەتا ئێتیتی، ل دۆرێن دهۆكێ، بتنێ ب شەڤ دەركەفتین و گەلەك جاران ب رۆژ ئەم دهاتین و ئەم ل شكەفتێن كێڤلا دماین و نوكە ئەو جه بووینە باژێر و پەزێ هندەك بێدهیان ل وێرێ بوو جامێران گەلەك دباش بوون و گەلەك هاریكاریا مە دكر و هەتا بالاڤێن مە دكرن و هەر پێدڤیەكا مە هەبان جامێرا بۆمە ل گەل خوە تینان و (قەشەفرێ، باكوزێ، لیناڤا، بێسكێ) ئەم ماوەكی ل ئەڤان دەڤەرا و هەتا (كەمكا و بێسفكێ) ماین.
پێشمەرگەیێ شۆڕەشا گولانێ، نەجمەددین مستەفا عوبێد كێستەیی، بەحسێ بیرهاتنەكا وی دەمی دكەت ودبێژیت: رۆژەكێ (یاسینی) گۆتە مە: تڤەنگەكا برنویا مرۆڤەكی مە یا شۆڕەشا ئیلۆنێ، كو ل گوندی یا ڤەشارتی بوو، منا ئینایە (گوفكێ)، لبن حەلانەكی منا ڤەشارتی، ل سەر لێڤا خابیری بنێ ( گوفكا خوارێ). دێ شەڤەكێ چینێ ئینین. دەم چلێ زڤستانێ بوو و ئێڤاری مە ل (كەمەكا) شیف خوار و ئەم چووینە (بێسفكا سەری) و ئەم چووینە مالا (دەروێشی)، وی دەمی هەمی نهێنی بوو و مە گۆتێ: ئەم دێ چینە ناڤ بەروارییا. وێ شەڤێ ئەم چووینە ناڤ هندەك بەران ل وی چیای ل بەرامبەر مانگێشكێ و ئەم نڤستین هەتا بوویە سپیدە. ب ڕۆژ ژی ئەم ماینە ل وێرێ هەتا بوویە مەغرەب، پاشی د ناڤبەرا (دیلیا و مانگێشكێ) دا ئەم جهەكی دەربازكرین و ئەم وێ شەڤێ چووینە ناڤشكێ، دوتمامەكا مە ل وێرێ بوو و ئەم وێ شەڤێ چووینە مالا وان، مە شیڤەكا درەنگ خوار و بەرێ سپێدێ نانێ مە بوومە حازركر، سەقایێ دونیایێ نختە بوو، وەك مژێ بوو. ئەم دەركەفتینە چیایی هەتا ل مە بوویە مەغرەب و دوڤدا چووینە بەر خابیری و مە درەنگی شەڤ دا خابیری، ئاڤ گەلەكا بووش نەبوو و ئەم دەرباز بووین و چووین، مە ئەو تڤەنگا بڕنۆ ژ بن وی حەلانەكی ئینا دەر، بەلێ مە دیت كو یا پیچ بووی و ژەنگێ یا گرتێ، جارەكادی مە داڕێ و مە ل خابیری دا و دوڤدا هاتینە گوندێ ( ناڤشكێ) مالا دوتماما خوە (حوسنایێ)، جارەكا دی شیفا مە چێكر و هەتا درەنگی شەڤ، (یاسین) گۆت دا: بچین و ژڤانێ مە ژی چیایێ پشتا دێراگژنیكە. مە گۆتێ: رێكا دویرە و ئەم گەلەك دوەستیاینە، ئەم قەترە ناكەین. وی گۆت: ئەم نەشیێن ل ئەڤان درا بمینین و دڤێت هەر بچین. ئەم ب نەچاری دەركەفتین و مە داڕێ نایفی هەر گۆت: دێ گولەكێ هاڤێژم، هەر مە گۆتێ: ئەڤان دەڤەرا هەمی رەبیێن حوكمەتێ نە دێ چەوا گولێ هاڤێژی؟ ئەوی هەر خواست گولەكێ ب هاڤێژیت و ل وێ مالا دوتماما مە هەر ئەوی برنۆیا خوە پاقژ دكر و گۆت: دڤێت گولەكێ ب هاڤێژم و مە نەهێلا ب هاڤێژیت. ئەم یێ بڕێكێ دچین و ئەوی گولە بەرهەڤكر بوو و ناڤ بەینەكێ تبلا خوە دانا سەر و گولەك هاڤێت و گۆت: بێدەستی بوو. ئەم هاتینە (دیلیا) ل مالا جامێرەكی و كاك (یاسین) گۆت: ئەز كەسەكی دنیاسم ل ڤی گوندی ئەم دێ چینە مالا وی. راستە مە شیف خوار بوو، بەلێ ئەگەر رێكا مرۆڤی یا دویر بیت و سەقا سارما بیت مرۆڤ زیكا برسی دبیت. مە گۆتێ: (یاسین) ئەم دبرسینە. وی گۆت: دوستەكێ من ڤێرە هەیە بهزرا من ناڤێ وی (محەمەد ئەمین) بوو و دێ نانەكی خو‌ین و چین وی دەرگەهـێ وێ مالێ قوتا. ل سەرێ گری بەرامبەر مالا وی رەبیەكا لەشكرێ ئیراقێ هەبوو. وان دەرگەهـ ڤەكر و بخێرهاتنا مە كر و هندەك نان و ماست و دوشاڤ بوومە ئینان. ژوورڤە هەمی تاری كرن هەتا مە شیڤا خوە خاری و ئەم هاتین بەرامبەر مالا وی ئەفرازی بوو و سەقا گەلەكێ سار بوو، ژ سەرما و وەتیانێ ئەم گێژبووین. ئێدی ئەم ژ لڤینێ بووین و هەر دو هەڤالێن مە (زكری و نایف) گۆتن: خلاس ئیدی ئەم نەشیێن بهێین. ئەو ژ وەستیانێ و خەوێ سەرمایێ كەفتن. وان هندەك چلی ژ دهەكێ ئینا خوار و گۆت: ئەم دێ پشتێن خوە پێكڤە نین و دێ خوە ل ڤێرە درێژ كەین. چەند خولەكا مە چاڤێن خوە گەرمكرن و ئێكسەر یاسینی گۆت: ڕابن دا بچین. هەر دوو هەڤالێن مە گەلەكێن ماندیببوون. وێ شەڤێ تاڤە هەیڤ بوو، جهەكێ بێ تراش و گیا بوو و ئەم ب سەركەفتین بۆ هنداڤێ حوجاڤا و ئەمێ بەرەڤ دێراگژنیك ڤە دچین، هێشتا نەبوویە سپێدە ئەم یێ بزاڤێ دكەین كو بگەهینە جهێ خوە هێشتا نەبوویە سپێدە، دەمەكی هەردوو هەڤالێن مە زكری و نایف نەشیان ئیدی بێن و كەفتن، ئەو مانە دشیفكەكێ دا. ئەز و یاسین بەردەوام بووین. پچەك مە ژ هەڤالێن دی ناڤبەردا.
