ژیانا پێشمەرگایەتیێ هەمی نەخۆشـی بـوو
دیدار، سالار محەمەد دۆسكی:
5 – 5
ئەو بەری مە كەفت و ئاڤا بوش بووئەم ب چوپان دەرباز بووین. بیرا من دهێت جهێ مە هەمیان ل سەر چۆپی نەدكر و ئەوان گۆت: ئەگەر هندەكێن مەلەڤان هەبن دەربازبن باشە، چونكە هەكە چۆپ قولپی هوون هەر هەمی دێ بن ئاڤبن و ئەم پێنچ شەشەك ب مەلەڤانیا دەرباز بووین. ئەم هاتین سەرهلدان ب دووماهی هاتبوو و ئەم چووینە كانی ماسێ و هندەك چوونە لژنا ئامێدیێ و هندەك چوونە زاخو و ئەم چووینە كانی ماسێ و خودێ ژێ رازی ( سەید سالح )ئەم دیتین گۆتی: هوون هاتنە چ؟ كێ گوتیە هەوە؟ مە گۆتێ: مە ب دەلیڤە دیت و ئەڤە جارا دووێ یە ئەم بزاڤێ دكەین و هەتا دەرباز بووین. (زەعیم عەلی) هات و مە گۆتێ: ئەم بۆ خەباتێ هاتینە و ئەگەر ئەم ژی دزانین دناڤا مال و زارۆكێن خوە دابین و مە دڤێت هەر پێشمەرگە بین و خەباتا خوە بەردەوام بكەین.
پێشمەرگەیێ شۆڕەشا گولانێ، نەجمەددین مستەفا عوبێد كێستەیی گۆت: ل ژیانا خوە یا پێشمەرگایەتیێ دا دو جاران بریندار بوویمە جارەكێ ل داستانا كانی ماسێ شەڤا 13-14/9/1987 و جارەكێ ژی ل مە هێرشی ڕەبیێن دوژمنی یێن هنداڤی ئاشەوا كر ل رۆژا 11/4/1984 چار هەڤالێن مە شەهید بوون و ئەم ژی 9 پێشمەرگە برینداربووین.
هێشتا گۆت: ل ژیانا پێشمەرگایەتیێ تشتێ هەرە نەخوەش ئەو بوو دەما هەڤالەكی مرۆڤی شەهید دبوو. بۆ نموونە هەڤالەكی مە هەبوو بناڤێ (محەمەد تاهر تروانشی) یێ گەنج بوو و بیرا من دهێت رێكخراوا مە هەر هەمی گەنج بوون و دگۆتنێ ڕێكخراوا لاوان. ئەگەر ئەم چووباینە هێرشەكێ هو مە (محەمەد تاهر تروانشی) نەبربا عاجز دبوو. هێرشا هنداڤ ئاشەوا گۆت: دێ هەر هێم و هەر مە گۆتێ نەهێ وی گۆت دێ هێم و هات و شەهید بوو. بۆچی مەنەدڤیا بهێت دلێ مە پێڤە بوو چونكە هێشتا گەلەكێ گەنج بوو و هێشتا یێ چلكدار فڕۆكێن شەڕی یێن ئیراقێ ل گوندێ وان دابوو و دەیكا وی شەهید ببوو. ئەگەر مە هندەك بربانە هێرشەكێ جارا دی مە ئەو نەد‌برن و مە گوهەرین دكرن. بەلێ ئەوی دڤیا هەمی وەختا ل گەل با. دیسان ل داستانا دێرەلوكێ 11/1/1988 گەلەك هەڤالێن مە یێن خۆشتڤی و هێژا شەهیدبوون، كو پڕانیا وان كادرێن لەشكریێن بژارە بوون، و یێ ژ هەمیا پتر ژی ئەز بۆ غەمگین بوویم (بورهان ئامێدی) بوو. ئەز گەلەك بۆ عاجزبووم چونكە ئەڤە هەڤال بوون و من ژ نیڤا دلێ خوە دڤیان، وەك پێشتر من ئاماژە پێكری ئەز بۆ هەمی هەڤالێن خوە خەمبار دبووم و هەر ئێكی ژ وان كۆڤانا خوە هەبوو ل دەف من.
نەجمەددین كێستەیی دبێژیت: هەر ژ 1991 هەتا 2017 ئەزێ بەردەوام بووم ل سەر كارێ خوە یێ پێشمەرگایەتیێ. هێرشێن پ.ك.ك كرینە سەر كوردستانا ئازاد، شەڕێ ڕزگاركرنا ئیراقێ، شەڕێ داعش هەر ژ ڕۆژا ئێكێ و هەتا ب دوماهی هاتی و ل دوماهیێ ژی شەڕێ حەشدا وەحشی، مە پشكداری تێداكریە و بەڕەڤانی ژ ئاخا وەڵاتێ خوە كریە.
ل دووماهیێ پێشمەرگەیێ شۆڕەشا گولانێ، نەجمەددین مستەفا عوبێد كێستەیی گۆت: یا مە پێ چێبووی و مەشیای مە ئەنجامدایە و هەر تشتەكێ مەركری مە بۆ مللەتێ خوە كریە و مە دڤێـت دادپەروەری هەبیت و خودانێن شەهیدان نەعلەتا ل مە نەكەن، و دادپەروەری بهێتە پەیرەوكرن دناڤبەرا شەهیدان و كەسانێن ماندیبوون دیتی، و مافێ گەلەك پێشمەرگەی و خێزانێن شەهیدان هاتیە خوارن و راستە بۆ گەلەك خیێزانێن شەهیدان هاتیەكرن، لێ ژ ئەنجامێ نەدادپەروەریێ ژی گەلەك بێ ماف ماینە. بڕاستی دەما ئەز قارەمانەكی ڕۆژێن خەبات و بەرخوەدانێ دبینم كو یێ مافخواریە و غەدر لێ هاتیەكرن، ئەز گەلەك توڕە دبم. هیڤیدارم ئەو بێدادی نەمینیت و هەر خەباتكەرەك بگەهیتە مافێ خوە.
