ژیانەك مری
فەهیما ئیبراهیم- ئەلمانیا
ژیان چەند كێلیكێن كورتن، لێ ژیێ تە حەفت سالێن هشكاتیێ ب سەردا هاتن، ب هەموو رامانێن گۆتنێ یا ماندیی، تە هەر دگۆت، بەختەوەری ل وێ دەمی دهێت، دەمێ ترس تێكەلی هەستێن مروڤی نەبت.
دگەل چوونا شەمەندەفرێ، دیمەن ب لەزتر دبۆرین، بانهۆف(وەستگەه) دبوو خالەكا رەش، وەكو گەلەك خالێن رەشێن دڤێ ژیانا كەچەل دا هەین.
هەموو تشت ب لەز دبۆرین و نیشانێن خەمەكێ ل دێمێ تە خویادكرن، ئەڤە دەمەكە تە دەرگەهێ دلێ خوە گرتی و بەرەڤ ئاشۆپان ڤە دچی. ئەو پێنوسێ دناڤ تبلێن تە دا ف تە را ناگەهت، چەند لەزێ ل نڤیسینێ دكەی، بیرهاتنەك ئاشۆپێن تە تێك دشێلت، قەهوا تە ژ هەستێن تە سارترلێدكەت. ل ڤێ بهارا بەهی، جار جار چاڤێن تە د پەنجەرێ را ب بەلگێن وێ دارا ل هەمبەر دكەڤن، چەند بایەكی ب هێز دهێت، هەدار ڤێناكەڤت، كۆمەكا بەلگێن وێ دگەل خوە دوور دبەت و دغەریبیێ را دكەتە كومتلەكێ گەنی. ژیان چەندا ب لەزە، تو ل ژیێ خوە ب لەزتربوویی.
چ جاران ب ئاخفتنێ تە نەشیایە ئەوا ددلێ خوەدا ب دروستی دەربێخی، یان شرۆڤەكەی، لەو پەنایێ دبەیە بەرنڤیسینێ، دناڤبەرا تە و هەستێن تەدا تشتەكێ ژ حەزژێكرنێ ب بهاتر هەبوو، تە ب هەبوونێ ڤە گرێددەن، دا چ روو دەت هەكەر هەموو تشت نە ب ڤی ئاوایێ بان؟ حەزدكەی بیرەوەرییێن خوە ب پێنووسەكێ رساسێ بنڤیسی، چنكو پتریا وان پێدڤی ب دوبارەكرنێنە، هەر جارەكێ دنڤیسی، حەزدكەی ژێببەی و دوبارە ژسەرژنووڤە هەر تشتی بنڤیسی، نزانی بۆچی د لێكدانا پەیڤاندا نە یا شارەزایی! هزر د نڤیسینێ دا ناكەی، ئانكو مینا سەرخۆشەكی چ بەر دەڤیبكەڤت دبێژت، ئەها تو ژی وەسا چ قالبا بۆ دارشتنا پەیڤێن خوە نابینی. تە دڤیا هەر تشت ب ئیرادا خوە جهێ خوە د رستەیێن تە دا ببینت، نە یا گرنگە كەسێ دخوینت ب تمامی تێبگەهت كا مەرەما تە چیە، یا گرنگ، دگەل تە د ناڤ هەست وبیرهاتنێن تە دا ب حەلت، حەزناكەی نهینیێن ئازارێن خوە بۆ كەسێ ئاشكراكەی، نوزانی ئەڤە ژی ژ كێم باوەری ب خوە بوونێ یە؟ ب چەند پەیڤەكێن كێم دێ دەربرینێ ژێكەی، حەز ژ دلۆڤانیا چ بەندەیان ناكەی، بتایبەت هەكەر ب هەستان ڤە گرێدای بن.
ئەڤە تو هاتییە هەبوونێ ل سەر ڤێ كورسیكا پەیكەفتیان یا روونشتی. جاران هزردكەی ئەو ژی دگەل تە یا ژ دایكبوویی، ئانكو هەڤالجێمكا ژیێ تەیە. گەلەك جاران ژێ تۆڕە دبی، گۆتنێن زڤر دبێژیێ، حەزدكەی ژ تە دووركەڤت، لێ دوبارە داخوازا لێبۆرینێ ژێدكەی. دەمێ كێمترین پەیڤ هەستێن تە دئازرینن حەزدكەی بگری بێی كەسەك رۆندكێن تە ببینت. ئانكو گریانا هەستان، نە یا چاڤان. بتنێ د وێ رەوشێ دا تو هەست ب ئێشانێ دكەی، ئەڤە رامانا هندێ ددەت تو یا گەهشتییە گۆپیتكا بێهیڤیبوونێ، دێ بۆ تە خویا بت چ كەس نینە وان رۆندكان ڤەمالت، ئەڤە ژی گۆپیتكا ئازارێن بێهیڤیبوونێ ژ هەركەسی بۆ تە پەیدادكەت.
هندەك كێلیك دبۆرن نە تو هەستپێدكەی و نە ژی تە حەزكرنا ئاخفتنێ هەیە، دێ ب بێدەنگی هەمبەر راوەستی، هەر تشت د ناخێ تەدا دئاخڤت، بتنێ پەیڤ بێدەنگ دمینن.
تشتی سەیر تو ژێدەرێ ڤێ هەستێ نوزانێ، نە ژی تە شیانێن رەڤینێ ژێ هەنە، ببیرهاتنێن مرۆڤان ڤە گرێداینە، دگەل تە دزڤڕۆكا ژیانێ دا دگەڕن، بتنێ دێ هەستپێكەی و نوزانی ژێ رزگاربی. جاران حەزدكەی بزانی گەڕیان بۆ توخیبێ دوویێ چەوایە؟ دەمێ ئەسمان رەنگین دبت، رەنگی شین دگەل رەنگێ ئاگری تێكەل دبت، ل وی دەمێ حەزا تە بۆ نڤیسینا ئازاران هار دبت، ل وی دەمی پتر حەزدكەی نێزیكی خوە ببی. نامەكێ بۆ كەسەكی د ئاشۆپێن تە دا ئافراندی و دهەبوونێ دا نەیی بنڤیسی، چەند ئەڤ نامە درەنگ بگەهت، تە باوەری یا هەی دێ هەر رۆژەكێ گەهت. لێ هەستەك بەردەوام تە دراكێشت، سەیرە گەلەك سەیرە هەروەكو بۆ تە ئاشكرا دبت ژیانا تە ژ هندەك تشتان یا ڤالا یە، مینا پەنابەرەكی ل ئاخەكا بیانی د ئاشۆپەكێ دا دژیی، دەمێ بیرهاتن تە دگرینن، دەربرینێن تە ب چەند پەیڤێن كیم دیاردبن، دناڤبەرا تە و ڤێ شەڤا درێژ دا بیرهاتن و نهێنی هەنە،، ئەگەر ژی ئەو هەموو گرێ و گرفتێن د كەتنە درێیا تە دا دبوونە ئەگەر كو هەردەم گرێیەگا دەرونی ل نك تە پەیداكەت، تە گەلەك قوناغێن زەحمەت دەربازكرینە، ل هیڤییا هیڤییەكێ، هەڤدیتنەكێ، ئەو ناما بەری دەمەكی تە هنارتی و دوبارە هنارتییە ڤە، تە نزانی ل كیژان وەستگەهێ ڤارێ مایە.
دەمێ زارۆكینییێ، تە حەزدكر تە دو چەنگ هەبان، هەردەم خەونا تە ئەو بوو بفڕی. بتایبەت، دەمێ شەڤێ شەبەنگێن خوە دبەردانە سەر باژێڕی و ستێران خویا دكر، تە حەزدكر پتر نێزیكی وان ببی، لێ هەر جارەكا تە خەون ب فڕینێ ڤە ددیتن هشیاردبوویی، یا ل سەر ئەردی د تەختی دا كەتیە خوار. نهۆ ژی خەونا تە یا بوویە كراسەكی سپی یێ ب هیزار، هەر ژ زارۆكینی ژ جهێن گرتی ڤەدجنقیایی، نهۆ یا هەموو دەرگەهان ل خوە دگری، هەستپێدكەی روحا تە یا پیربوویی، ئێشانا دلێ و ئازارێن هەستان نیشانێن پیریێ ل ناخێ تە خویاكرینە. سەیرە، ئەڤ شەڤە چەند ددرێژن، ب داوی ناهێن، هەر وەسا چ داوی بۆ ئازارێن تە نینن.
دڤێ كێلیكێ دا چەند هزرێن نەرێنی خوە ل سەرێ تە داینە. ل دۆر تە هەموو نیگەرانییە، پەككەفتی ژ دایكبوویی، دڤێ كورسیكا نفرەتی دا، هەر تشت مرییە، بتنێ بیرهاتن زێندی دمینن.
شەمەندەفر راوەستیا و دەرگەهێن وێ ڤەبوون، دەستەكی كورسیا تە راكێشیا و ژ شەمەندەفرێ پەیاكری و گۆتەتە، دێ نوكە چینە باخچەیێ گشتی.
