ژیان ئاداب و ئەتەكێتن
زهێر كۆرەماركی
ژیان گەلەك رەخ و گەلەك رەنگن، نە بەس رەش و سپی یە، بتنێ ناڤبەینەك ژی دناڤدا هەی، ژیان ب هەموو رەنگێن خوە و خۆشی و نەخۆشیێن خوەڤە یا خۆشە، ئەگەر نەخۆشی نەبن مرۆڤ چ ژ تام و چێژا خۆشیا نوزانیت، لەوما ئەم دشێین بێژین ژیان كۆمەكا ئاداب و ئەتەكێتانە گرنگە مرۆڤ وانا ب هند وەرگریت و لسەر برێڤە بچیت، داكو رەوشت دناڤ پێلێن ژیانێ دا بەرزە نەبن و مرۆڤ بێ بها نەبیت و شكۆیا مرۆڤ دناڤدا بشكێت، ئەگەر مرۆڤی دەست ژ ئاداب و ئەتەكێن ژیانێ بەردان ب ناڤێ ئازادی و گوهۆڕینا كو ژیان بەردەوام گوهۆڕینا دگەل پێلێن خوە دئینیت، ئەڤە مە پێنەك ل ستوونێن ژیانێ دا و مە ئەتەكێت و ئادابێن وێ بن پێكرن و مە رەوشتەكێ مەزن ژ دەست دا، نابێژین بلا گوهۆڕین نەبن مە بڤێت و نەڤێت دێ هەبن و دێ هەر هێن یان دێ مرۆڤی ل دووڤ خوە خشینن یان ژی دێ مرۆڤی هێلیت و دەرباز بیت، لێ بلا لسەر حسێبا رەوشت و ستوونێن ژیانێ نەبیت، هەموو تشت مرۆڤە دڤێت خوە دگەل كاودانان بگۆنجینیت و دگەل گوهۆڕنیان پێنگاڤێن هشیارانە بهاڤێژیت،مرۆڤ دشێت مرۆڤەكێ هەڤچەرخ و مەدەنی بیت و دگەل پێلێن ژیانێ بهێت و بچیت و یێ پڕی رەوشت بیت ژی ، ب دیتنا مە نابیت تۆ خوە بكەیە بەند و كویلێ ژیانێ و تە وەكی ئاش ئاشۆكا بینیت و ببەت، بەلكو دڤێت تۆ ژیانێ بكەیە بەند و كویلێ خوە و هیڤی و ئارمانجێن خوە بنەخشە و پلان لسەر دارێژی و كار و خەباتێ بۆ بكەی دا بگەهییە هەمی وان ئارمانجێن تە بۆ خوە داناین و وێنەكرین، پێلێن ژیانێ چەند د دژوار و دبێ رەحم و وژدان بن، فەر و گرنگە ئەو نەشێنە تە و نەشێن تە بێخن و پێ لتە دانن، دڤێت تۆ لسەر زال ببی و قۆناغا ببڕی و دەربازی كەنارێ ئارامیێ ببی، دێ هوسا هەست ب ئاسۆدەیا ژیانێ كەی، دناڤ خێزان و جڤاك و مللەتی دا هندەك داب و نەریت و ئەتەكێتێن هەین نابیت مرۆڤ خوە لێدەت و بشكێنیت و بن پێ بكەت، چونكیگرێدای بنەمایێن رەوشتێ مال و خێزانێ نە، شكاندنا وان شیرازێ خێزانێ دكەڤیتە د مەترسیێ دا، ئەم رۆژانە یێن دبینن چەوا تاك وخێزان و جڤاك یێن ژبەر دچن و بها و ژیانێ ل بەر پیا دكەڤن تەپانێ پێ دهێتە كرن.
