ژیان د گه‌ل ڤایرۆسێن كۆرۆنایێ
د.فازل عومه‌ر
(هه‌فتیه‌كا كۆڤید-19 ل پارێزگه‌ها دهۆكێ)
ژ ئه‌نجامێ نه‌پێگیریێ ب رێنوماییێن ساخله‌میێ و رێكارێن خوه پاراستنێ، هه‌فتیه‌كا هلكشانا نومره‌یێن پیڤانكی یێن تووشبوونێ و مرنێ ب كۆڤید-19 ل دهۆكێ هاته تۆماركرن. تشتێ سه‌رنجراكێش ل به‌رانبه‌ر ئه‌ڤان ئامارێن ترسناك، خه‌مساریا خه‌لكی و كارڤه‌دانێن ده‌زگه‌هێن میریه؛ هه‌م سه‌روسیمایێن خوه‌پاراستنێ ل ناڤ خه‌لكی ناهێنه دیتن، هه‌م ده‌زگه‌هێن حوكمه‌تا خوه‌جه و یێن هه‌رێمێ، كارڤه‌دانه‌كا ل ئاستێ هلكشانا هه‌ژمارا پێكه‌فتیان دیارنه‌كریه!
ب گۆره‌ی ئامارێن فه‌رمیێن وه‌زاره‌تا ساخله‌میێ، هه‌ژمارا تووشبوویێن كۆرۆنایێ (ئه‌وێن پشكنین پۆزه‌تیڤ) و مریان، ب ئه‌ڤی ره‌نگی بوویه:
دیرۆك تووشبووی مری
18 تیرمه‌هێ 2021 284 2
19 تیرمه‌هێ 2021 976 3
20 تیرمه‌هێ 2021 636 3
21 تیرمه‌هێ 2021 611 4
22 تیرمه‌هێ 2021 233 10
23 تیرمه‌هێ 2021 736 3
24 تیرمه‌هێ 2021 722 9
سه‌رجه‌م 4198 34
خواندنه‌كا سه‌رپێ یا ئه‌ڤان نومره‌یان بۆ پارێزگه‌هه‌كا سه‌رژمێریا خه‌لكێ وێ ل كنار مه‌لیۆن و نیڤ كه‌سان بت و رێژه‌یا به‌لاڤه‌بوونا ڤایرۆسێ و ڤه‌گرتنێ بلند بت و پێڕابوونێن خوه پاراستنێ ل نزمترین ئاست بن، پێدڤیه ئه‌م چاڤه‌ڕێی ئه‌نجامێن گه‌له‌ك خراب بین، نه‌دووره بگه‌هنه ئاستێ هه‌لوه‌شانا سیسته‌مێ ساخله‌میێ.
ئه‌ڤ خه‌مساریا ل خه‌لكی و حوكمه‌تێ دیاردكه‌ت، وه‌سا دهێته خواندنێ كو ئه‌م هند ته‌نبه‌ل و وه‌ستاینه، ئێدی مرن و نه‌ساخی مه ناترسینن و هه‌ردو بووینه هه‌ڤالێن رۆژانه و دێ پێكڤه ژین! ئه‌رێ ئه‌ڤه نه ره‌وشه‌كا خوه‌كوژه؟ ئه‌رێ ژیان د گه‌ل مرنێ و نه‌ساخیێ په‌سه‌نتره یان د گه‌ل رێكارێن خوه‌پاراستنێ؟ تنێ (ماسك، خوه دووركرن ژ كه‌سێن دی، پاقژی).
داكو هێژ خۆشتڤیان بنئاخ نه‌كه‌ین و ب كێمترین زیان ژ ئه‌ڤێ پێلا نوو ده‌رباز ببین، فه‌ره ئه‌م دو كارێن هه‌ڤدژ پێكڤه بكه‌ین؛ هه‌م ژیانا رۆژانه ب رێڤه ببه‌ین و هه‌و ده‌رگه‌هێن ژیانێ ل به‌ر خوه و خه‌لكی ته‌نگ بكه‌ین؛ هه‌م رێكارێن خوه پاراستنێ ب كۆته‌كی بهێنه ب جهئینان (ڤاكسین دانان، ماسك، خوه ژێكدووركرن، پاقژی).
