ژیرییا دەستكرد دێ بیتە ئەگەرێ گوهۆڕینێن مەزن یێن جڤاكی
زاخۆ، دلۆڤان هالۆ:
مامۆستایەكێ زانكۆیێ د دیدارەكێ دا بۆ ڕۆژنامەیا ئەڤرۆ دیار كر كو ژیرییا دەستكرد وەكو شۆڕەشەكا نوو یا تەكنەلۆژی یا گەشێ دكەت و گۆت: دێ گەلەك گوهۆڕینێن مەزن پەیدا كەت د گەلەك بیاڤێن هەمەجۆر یێن ژیانا مە دا، و دێ بیتە ئەگەرێ گوهۆڕینێن مەزن یێن جڤاكی و ئابووری و كەلتوری و هندەك ژ ڤان گوهۆڕینان ئەرێنی نە، و هندەك ژی نەرێنی.
مەسعود محەمەد، پڕۆفیسۆرێ هاریكار ل پشكا كۆمپیوتەری ل زانكۆیا زاخۆ و شارەزایێ ژیرییا دەستكرد، دیار كر كو ژ لایێ ئەرێنی ڤە، ژیرییا دەستكرد دێ شێت گەلەك بیاڤێن ژیانێ پێش ئێخیت و باشتر كەت و ژیانێ ب ساناهیتر لێكەت، وەكو چاڤدێری و چارەسەریا ساخلەمی و پەروەردە و فێركرن و ڤەگۆهاستن و بەرهەمئینان و گۆت: دێ هاریكار بیت بۆ ڤەدیتنا چارەسەریێ بۆ گەلەك ئاریشەیێن مەزن یێن جیهانێ، وەكو گوهۆڕینێن كەش و هەوای و وزە و ئاسایشا خوڕاكی.
مەسعود پڕۆفیسۆرێ هاریكار گۆتژی: ژلایێ نەرێنی ڤە ڕەنگە تەكنەلۆژیا ژیرییا دەستكرد ببیتە ئەگەرێ ژ دەستدانا گەلەك دەلیڤەیێن كاری و ژدەستدانا گەلەك تایبەتمەندیێن كەسایەتی و پەیدابوونا گەلەك ئاریشەیێن جڤاكی و توشبوون ب ئیدمانا ئەلكترۆنی و پەیدابوونا گەلەك ئالینگاریێن ڕەوشتی و یاسایی.
مەسعود محەمەد، پڕۆفیسۆرێ هاریكار و شارەزایێ ژیرییا دەستكرد، د بەردەوامیا ئاخفتنێن خۆدا گۆت: لەوما پێدڤییە دەرئەنجامێن بكارئینانا خراب یا ڤێ تەكنەلۆژیا نوو بهێنە دەستنیشانكرن ژلایێ جڤاك و حكومەت و دەزگەهێن ڤەكۆلینان ڤە و ڕێكێن دروست بهێنە دەستنیشانكرن بۆ سەرەدەریكرنا دگەل لایەنێن نەرێنی و گۆت: كێمكرنا وان و گرنگیدان ب بكارئینانا ڤێ تەكنەلۆژیایێ ب شێوەیەكێ بەرپرسیارانە و كاریگەر بۆ بدەستڤەئینانا مفایێن ئەرێنی بۆ جڤاكی.
