ژیـان و گـرفتاری
قـاهـر محەمـەد
هەر جارەكا ئالۆزی و نەساخیا بارێ تە گرانكر و تۆ حێبەتی مای بخوەڤە دەرگەهێ بێی هیڤیبوونێ ل تەڤەبوو كەسەر و كۆڤان كەتنە سەر ملێن تە و ل سەر دلێ تە، ل وی دەمی خودای ژبیر نەكە كو شیفایێ بۆ تە ڤرێبكەت، هزر د هندێ دانەكە كو دێ هەردەم یێ پاراستی بی د ڤێ گەردۆنی دا خۆشیێن بەردەوام نینن.
لەوما ژی دڤێت ڕابییە سەر پێن خوە و دەستێن خوە بدەیە چۆكێن خوە و ل سەر پێیان بمینی و خوە رادەستی ژیانێ نەكەی، تە لدویڤ گێلەشۆكێ نەبەت تو ژیانێ ل دویڤ خوەڕا بكێشە و ببە سەركێش، دەستداهێلان و نە باوەری ب خوەبوون نیشانا كەسێن لاواز و ترسنۆكە، نابیت ژ گرفتاریێن ژیانێ ب رەڤی ل چارەهیێ بگەرە و ب شێوەكێ ڕۆن و راست وێ پرسگرێكێ چارەكە، ژیانا خوە رۆن بكە ژ راستیێ، خودایێ مەزن ژیان ئالۆز یا دروست كری، ئەڤجا یێ رێكێ خوە بەرزە بكەت دێ ژیان گەلەك ل بەر وی ب زەحمەت كەڤیت.
هەردیسا خودایێ مەزن دبێژیت بزاڤ و لڤین ژ تە بەرەكت ژ من. ڕامانا ژیانێ پەیوەندیا ب گرنگیا سروشتی ڤە هەی، دڤێت ئەم ڕامانێ ژ هەمی دەمێن ژیانێ ببەین. هەبوونا مە د ڤی گەردۆنی دا ئەوە ب سەرئەڤرازی بژین و ئەزمۆنەكە بۆ ئاخرەتێ، ئەڤجا دڤێت ب سەركەفتیانە ژ ڤێ ئەزمۆنێ دەربازببین، چێژ و خوەشیێ ببەین و ژ سنوورێن خوە دەرباز نەبین.
ئەو مرۆڤ بهێزن یێن كو دكەڤن، دشكێن و دبۆهژن، لێ جارەكا دی وەكی رۆژێ دهەلێن و ل سەر هەر پرسگرێك و بەربەستان زال دبن. بێی باران چ تشت ل چۆلان شین نابن، فێرببە كو باهۆز و باگەران هەمبێز بكە. چ جاران رێ نەدە كو دوهی ئەڤرۆیا تە داگیر بكەت. ژبیر نەكە پڕانیا تشتان ب زەحمەت بەری ب ساناهی بكەڤن. نەهـ جاران تو بكەڤی ژی دڤێت جارا دەهێ هەر راببییە ڤە، گەر نەڕابی دێ بۆ هەتا هەتایێ كەفتی مینی.
