ژینا گوندییان یا جاران
سەربەست بۆتی
خانیێن گوندێ مە ئاخ بوون
خەلك دلۆڤان و دلساخ بوون
رەسەن و خودان ئیجاخ بوون
سۆز و باوەڕی ئەو چاخ بوون
دەنگێ گازییا مە ژدویر هات
پەیام ژبرینەكا كویر هات
نەڤییا گۆت ئەڤە باپیر هات
یاد و گەنجاتی ل بیر هات
دكر بازارێ بزن و گیسكا
دبەرا دكێشا تویتنا كیسكا
دهات دەنگێ كەوا و سیسكا
ل چۆل و چیا و سەرێن خیسكا
بۆ مەخەلێ پەز دبر شڤان
ل نیڤرۆییا هەبوو ژڤان
دهاتنە بێڕێ بێریڤان
كۆم كۆم دهاتن برێز و ڤیان
دایك داشیری كێت ب مەشكێ
دا چێكەن كوتلكێن كەشكێ
دگەڕیان ل چیای و دەشتێ
تۆلك و قوراد و كەربەشكێ
هاڤینێ دچوونە ناڤ ڕەزی
بو چنینێ سپێدەكا زوی
دگەل خۆ دبر قەلیا پەزی
هەبوون زۆر ئارمانج و خوەزی
چەند خۆش بوو وەرزێ پاییزا
چنینا فستەقا و گویزا
ژبۆ مێڤان و عەزیزا
ب ڕەوش بوون خودانێن بەرگویزا
قازانێن مەزن دایكا
دا تێدا چێكەن دانیكا
ژبۆ ساڤاری و دانهێركا
دهێران ب دستار و جونیكا
دەمێ دبوو سەرما و زستان
د بارین بەفر و باران
دنیا دبوو مژ و دۆمان
باگوردانی دگێرا بان
دچوونە ئاقاری بارا
دكرن لپشتا دەوارا
ب ملی دئینان جار و بارا
بۆ ئاگری و سۆپا دارا
بەرژەوەندا گشتی دپاراست
ڕێبازەكا دروست و ڕاست
ئەو دكر یا خودایی دخواست
خودان وژدان بوون، خودان ئاست
وی سەردەمی زۆر هەژاربوون
وەفادار و دەست بژاربوون
ڕۆژێن گران و دژوار بوون
بو ئێش و ژانا نۆژداربوون
ب ڕۆژێ دچوونە سەر كاری
ل ناف ملكی و ل ئاقاری
دگەل ئێك دكر هاریكاری
هەڤگرتن و خزمەتكاری
شەڤ بێری ل مالەكێ دكرن
دیوان پرخۆش و گەرم دكرن
دەمەكێ ب رەوش دەرباز دكرن
ئەڤ یادگارە مە ساخ كرن
لبەر شەوقا لەمپێ و فانۆسا
ژیانا خۆ دبۆراندن هۆسا
فەرە لبەرچاڤكەین ڤان پڕسا
نفشێ نوی وەرگریت دەرسا
كتكێن هژیر و مێویژا
نانێ گەرم، سەوكێن گژنیژا
دروینشتن گوندیێن هێژا
پێكڤە بوون وان شەڤ درێژا
دا ل چۆلی بینی لاۆكا
یێن دچووینە بەر كاركا
پێ خوارنا دخۆن ب دۆركا
ماست و سەرتیك و لۆركا
زەری دچوونە سەركانیا
خوارن چێدكرن كابانیا
پێكڤە دخوارن لسەر سێنیا
دگەل پێشمەرگە و كاروانیا
سەربلند و هەژار بژی
بۆ رابردۆیەكێ ژهەژی
باشترە ناڤێ خۆ بكوژی
زێڕ و زیف تەهەبن تژی
