ژینگه‌ها په‌روه‌ردێ نه‌یا هاریكاره رۆژا شه‌مبی ببیته بهێنڤه‌دان بۆ قوتابخانان
ئه‌ڤرۆ، سالار محه‌مه‌د دۆسكی:
ده‌نگۆیێ بهێنڤه‌دانا رۆژێن شه‌مبی ل قوتابخانا و تورێن جڤاكی دا بابه‌تێ گه‌رمێ مامۆستایه و پتریا مامۆستا داخازا وێ چه‌ندێ دكه‌ن كو رۆژا شه‌مبی بیته بهێنڤه‌دان وه‌ك مامۆستایێن زانكۆیێ و سیسته‌مێ خواندنێ ل هه‌موو وه‌لاتان، شه‌ش رۆژ بۆ خواندنێ گه‌له‌كن.
عه‌لی ئه‌حمه‌د عه‌زیز، رێڤه‌به‌رێ قوتابخانا دیرۆك ل قه‌زا ئاكرێ بۆ رۆژناما ئه‌ڤرۆ گۆت: مامۆستا و رێڤه‌به‌رێن قوتابخانا ژی وه‌ك هه‌ر فه‌رمانبه‌ره‌كێ حوكمه‌تێ ماف هه‌یه ژبلی رۆژا ئه‌ینی بهێنڤه‌دانه‌كا دی ژی هه‌بیت، له‌وما داخاز دكه‌ین رۆژا شه‌مبی بیته بهێنڤه‌دان تایبه‌ت رێڤه‌به‌رێن قوتابخانا هه‌ر ده‌م نینه، راسته دێ به‌هره وانێن رۆژا شه‌مبی ل سه‌ر رۆژێن دی هێنه به‌لاڤه‌كرن لێ دبه‌رهه‌ڤین قوربانیێ بده‌ین و ماندی بین، دیسا هنده‌ك بابه‌ت هه‌نه دێ باشتر بیت به‌هرێن وان بهێنه كێمكرن وه‌ك وه‌رزش و هونه‌ر و مۆزیكێ، دیسا بهێنڤه‌دانا رۆژا شه‌مبی دێ قوتابیان ژی بیته بهێنڤه‌دان.
نزار مسته‌فا درباس، رێڤه‌به‌رێ قوتابخانا شابانیێ ل باتیفا ل سنورێ په‌روه‌ردا زاخۆ بۆ ئه‌ڤرۆ گۆت: هه‌كه رۆژا شه‌مبی بیته off بۆ مامۆستا دێ گه‌له‌ك باش بیت وێ رۆژێ دێ مامۆستا ژی بهێنا خوه ڤه‌كه‌ت و دیسا كاره‌كه‌ت ژی هه‌بیت دێ كه‌ت و هه‌مان ده‌م دێ بیته خوه پارێزی ژی ژ نه‌خوشیا كورونایێ و ئه‌ڤه وه‌ك مافه‌كی یه بۆ مامۆستایی وه‌ك مامۆستایێن زانكۆیێ و هه‌مان ده‌م ژی دێ قوتابی ژی بهێنا خوه ڤه‌كه‌ت..
هه‌مان رێڤه‌به‌ر گۆت: هه‌مان ده‌م دێ كارتێكرنا خوه ژی هه‌بیت و تایبه‌ت بۆ مامۆستایێن وانه‌بێژ و دێ به‌هرێن وان هێنه كێمكرن و ره‌نگه هه‌ر قوتابخانه‌كێ چه‌ند وانه‌بێژ دهێنه‌لادان.
ئه‌حمه‌د حسێن، بابێ قوتابیه‌كێ قوناغا هه‌شتێ بنه‌ره‌تی یه، ل دور بابه‌تی گۆت: راستی رۆژا شه‌مبی بیته بهێنڤه‌دان دبه‌رژوه‌ندا مامۆستا و قوتابیان و سه‌میانێن قوتابیان ژی دایه چونكه مافه‌كێ سرۆشتی یه و مامۆستا ژی گه‌له‌ك جاران كاره‌كێ ل پارێزگه‌هه‌كا دی هه‌ی و دڤێت سه‌رۆدانێ بۆ بكه‌ت و له‌وما گرنگه وه‌زاره‌تا په‌روه‌ردێ ل سه‌ر ڤێ داخازا مامۆستا رازیبت ، هه‌مان ده‌م ژی دایك و بابێن قوتابیان وێ رۆژێ بهێنڤه‌دان هه‌نه و گه‌له‌ك جاران حه‌زا هه‌ی سه‌ردانا جهه‌كی بكه‌ن لێ ژ به‌ر خواندنا كورێ خوه نه‌شێن وێ سه‌ردانێ بكه‌ن.
هه‌مان رێڤه‌به‌رێ باتیفا ئه‌و ژی گۆت: دێ باشتر بیت ده‌ست هه‌لات ب رێڤه‌به‌رێن قوتابخانا بهێته‌دان هه‌ر مامۆستایه‌كی رۆژه‌كێ بۆ ده‌ست نیشان بكه‌ت كو بیته off بڤی ره‌نگی دێ باشتر بیت .
عه‌بدوالواحد محه‌مه‌د، سه‌رۆكێ ئێكه‌تیا مامۆستایێن كوردستانێ ئاشكراكر كو بتنێ ده‌نگۆیێ تورێن جڤاكی یه كو رۆژا شه‌مبی بۆ په‌روه‌ردێ بیته بهێنڤه‌دان و هه‌ر چ تشتێ فه‌رمی نینه و نه‌هاتیه داخازكرن نه‌ژلایێ مه ڤه وه‌ك ئێكه‌تیا مامۆستاو نه ژلایێ وه‌زاره‌تا په‌روه‌ردێ ڤه، دڤێت هه‌می بزاڤ و شیانێن مه بۆ وێ چه‌ندێ بن پرۆسێسا په‌روه‌ردێ به‌ره‌ف باشیێ ڤه بچیت.
سه‌رۆكێ ئێكه‌تیا مامۆستایێن كوردستانێ ئه‌و ژی گۆت: ل پتریا وه‌لاتێن جیهانێ رۆژا شه‌مبی بهێنڤه‌دانه و بابه‌تێن رۆژێن شه‌مبی ل سه‌ر رۆژێن دی هاتیه به‌لاڤه‌كرن و ئه‌و رۆژ، ل كوردستانێ ره‌نگه یا ب ساناهی نه‌بیت چونكه هه‌ر ئاڤاهیه‌كی چه‌ند قوتابخانه تێدا هه‌نه و ره‌نگه نه‌شێن قه‌ره‌بوویا ئه‌وان وان بكه‌ن ئه‌وێن ژ رۆژا شه‌مبی بهێنه راكرن.
عه‌بدوالحد ئه‌و ژی گۆت: هه‌ر دو سالێن بووری گه‌له‌ك زیان گه‌هشتیه پرۆسێسا په‌روه‌ردێ و دڤێت ب هه‌می ره‌نگا كار ل سه‌ر وێ چه‌ندێ بهێـته‌كرن كو پرۆسێسا په‌روه‌ردێ رێكارێن په‌روه‌رده‌یی و قانوونی ببریت و ئه‌ڤه ژی پێدڤی یه پتر گرنگی ب ئاستێ زانستیێ قوتابیان بهێته‌دان، ئه‌و بۆچوونا دبێژن ده‌ست هه‌لات ل رێڤه‌به‌رێ قوتابخانێ بهێته‌دان كو رۆژێن ده‌ستیردان بۆ مامۆستا ته‌رخان بكه‌ت، ناڤبری گۆت: بڤی ره‌نگی گه‌له‌ك بۆچوون دروست دبن و گه‌له‌ك نه دادپه‌روه‌ری تێدا هه‌یه.
هه‌لز ئه‌حمه‌د، ئه‌نداما لژنا په‌روه‌ردێ ل په‌رله‌مانێ كوردستانێ ل دور رۆژا بهێنڤه‌دانێ گۆت: چ تشتێ فه‌رمی نینه كو داخاز هاتبیته‌كرن كو رۆژا شه‌مبی وه‌ك هه‌می وه‌لاتێن جیهانێ بیته بهَنڤه‌دان و بتنێ ل گرۆپێ سه‌رپه‌رشتیاران بابه‌ت هاتیه ئازراندن و هه‌مان ده‌م ل گه‌ل ڤێ بۆچوونێ نینم چونكه ل كوردستاتێ هه‌ر ئاڤاهیه‌كی دو قوتابخانه یان سێ قوتابخانه تێدا هه‌نه و هه‌كه رۆژا شه‌مبی رابیت دێ كارتێكرن هه‌بیت ل سه‌ر رۆژێن دی و ئه‌ڤه نه دبه‌رژوه‌ندا قوتابیان دایه.
هه‌مان ئه‌نداما په‌رله‌مانی ئه‌و ژی گۆت: ل گه‌ل وێ بۆچوونێ ژی نینم كو ده‌ستهه‌لات رێڤه‌به‌رێ قوتابخانێ هه‌بیت رۆژه‌كێ بۆ مامۆستا بكه‌ته بهێنڤه‌دان و ڤی بابه‌تی ژی نه دادپه‌روه‌ردی تێدا هه‌یه.
